ۆاكسينالاۋ ۇيىمداستىرماعان جۇمىس بەرۋشىلەردى قانداي جازا كۇتىپ تۇر
بۇل تۋرالى نۇر-سۇلتان قالاسى باس سانيتار دارىگەرىنىڭ ورىنباسارى جاننا پراليەۆا ايتتى، دەپ حابارلايدى قازاقپارات ءتىلشىسى.
«جۇمىسشىلار اراسىندا كوروناۆيرۋس ينفەكسياسىنا قارسى ۆاكسيناتسيانى ۇيىمداستىرماعانى ءۇشىن جۇمىس بەرۋشىلەر كودەكستىڭ 425-بابىنىڭ 1-بولىگى بويىنشا اكىمشىلىك جاۋاپكەرشىلىك ارقالايدى»، - دەدى قالالىق باس سانيتار دارىگەردىڭ ورىنباسارى.
سونداي- اق، ول ەلوردالىقتار اراسىندا ءالى دە ۇجىمدىق يممۋنيتەت قالىپتاسپاعانىن ەسكە سالدى. «كەيىنگى ءبىر ايدا ۆاكسينا العىسى كەلەتىندەردىڭ سانى ارتقانىمەن، ۇجىمدىق يممۋنيتەت قالىپتاساتىنداي اۋقىمعا جەتكەن جوقپىز. اۋرۋدىڭ تارالۋىن ءارى قاراي بولدىرماۋ ءۇشىن 15-شىلدەدە باس سانيتار دارىگەر قاۋلى شىعارعانىن بىلەسىزدەر. وسى قۇجات بويىنشا 10-تامىزعا دەيىن كوروناۆيرۋسقا قارسى ەكپەنىڭ ءبىرىنشى كومپونەنتىن، 1-قىركۇيەككە دەيىن ەكىنشى كومپونەنتىن الماعان جۇمىسشىلاردىڭ وفلاين رەجيمدە جۇمىس ىستەۋى شەكتەلەدى. تەك مەديتسينالىق قارسى تۇراقتى كورسەتىلىمدەرى بار جانە 3-اي كولەمىندە اۋىرىپ شىققان ادامدارعا بۇل شەكتەۋدىڭ قاتىسى جوق»، - دەدى جاننا پراليەۆا.
اۆتور: ەسىمجان ناقتىباي