+7 (701) 759 90 19
4 °С : نۇر-سۇلتان
19 °С : الماتى
USD 423.91 EUR 497.37
RUB 5.82 CNY 65.59
جاڭالىقتار

ۆاكسيناتسيا: ادامداردا ەشقانداي كۇمان بولماۋى كەرەك - دارىگەر

22 شىلدە 09:25
:ءبولىسۋ
ۆاكسيناتسيا: ادامداردا ەشقانداي كۇمان بولماۋى كەرەك - دارىگەر

نۇر-سۇلتان. قازاقپارات - وڭىردە كوروناۆيرۋسقا قارسى ۆاكسيناتسيالاۋ جۇمىستارى ەرتە باستالعانىمەن، جەلىدە جەلدەي ەسكەن دالەلسىز اقپاراتتار ادامداردى اداستىرۋدا.

كوكشەتاۋ قالالىق ەمحاناسىنىڭ جۇقپالى اۋرۋلار كابينەتىنىڭ مەڭگەرۋشىسى ۆالەنتينا گريشمانوۆسكايا ۆيرۋستىڭ جاڭا شتاممىنىڭ قانشالىقتى قاۋىپ توندىرەتىنى جانە قالىپتى ومىرگە ورالۋعا كۆي ۆاكسيناسى قالاي كومەكتەسەتىنى تۋرالى ايتىپ بەردى.

العاشقى كەزدەگىدەي ەمەس، ادامداردىڭ ەكپەگە دەگەن كوزقاراسى وزگەرە باستادى. باستاپقىدا جۇرتشىلىق ۆاكسيناتسياعا كۇمانمەن قارايتىن. نەگىزىنەن دارىگەرلەر، مۇعالىمدەر ەكپە الدى. قازىر كونتينگەنتتەر ءارتۇرلى، ادامدار ۆاكسيناتسياعا سانالى تۇردە قاراي باستادى دەۋگە بولادى. مەن ءوزىم جۇقپالى اۋرۋلار دارىگەرى رەتىندە ادامداردان ۆاكسيناتسياعا نە ءۇشىن كەلگەندەرىن مىندەتتى تۇردە سۇرايمىن. بىرەۋلەر جۇمىستا ايتتى دەيدى، ءبىراق باسىم كوپشىلىگى - وزدىگىنەن شەشىم قابىلداعاندار. بۇعان دەيىن قاۋىپتى ىندەتپەن اۋىرعاندار ءوز ەرىكتەرىمەن ەكپە الۋعا نيەت بىلدىرۋدە. اسىرەسە، اۋرۋدىڭ اۋىر ءتۇرىن باستان وتكەرگەن قارت ادامدار ءجيى كەلەدى. ۆاكسيناعا قاتىستى ءتۇسىندىرۋ جۇمىستارىنىڭ ارقاسىندا ادامدار ەكپە جۇمىستارىنا سانالى تۇردە قاراي باستايدى، - دەيدى ۆالەنتينا گريشمانوۆسكايا.

ونىڭ ايتۋىنشا، ادامزاتتى جالماعان كوروناۆيرۋس ىندەتىنىڭ زاردابى ادامداردى ويلاندىرۋى ءتيىس. جاڭا شتامم ءبىز ويلاعاننان الدەقايدا اگرەسسيۆتى جانە جاستار اراسىندا دا كەڭىنەن تارالۋدا.

ەگەر بۇرىن 70-80 جاستاعى ناۋقاستار كوپ بولسا، قازىر 50-60 جاستاعىلاردان انىقتالۋدا. جۇكتى ايەلدەر، جاسوسپىرىمدەر مەن بالالار اراسىندا دا اۋرۋلار كوپ تىركەلە باستادى. سوڭعىسى، ارينە، وتباسىنداعى قارىم- قاتىناسقا بايلانىستى جۇقتىرادى. بىزدە ادامدار قاراپايىم سانيتارلىق تالاپتاردى ساقتامايدى، اۆتوبۋستاردا، دۇكەندەردە ولار بەتپەردەسىز جۇرگەندەر كوپ. سوندىقتان دا ناۋقاستار سانى ارتۋدا. ەگەر بۇرىن ءبىر ناۋقاس 3-5 ادامدى جۇقتىرعان بولسا، قازىر 7 دەن 10 عا دەيىن وسۋدە. ۆيرۋستىڭ اگرەسسيۆتىلىگى ارتتى. جاڭا شتامم وتە جىلدام جۇعادى. اۋرۋ بەلگىلەرى دە باسقاشا وتەدى. ەگەر بۇرىن ءيىس سەزۋ جوعالسا، قازىر تاماق اۋرۋى، دەنە قىزۋى، باس اۋرۋى، السىزدىك، بولۋى مۇمكىن، ءبىراق اۋرۋ جالعاسادى. ەگەر بۇرىن ۆيرۋس وكپەگە بەلگىلى ءبىر ۋاقىت وتكەننەن كەيىن اسەر ەتسە، قازىر 2-3 كۇننەن كەيىن، ال قىسقا ۋاقىت ىشىندە يممۋنيتەت ءالسىز بولسا، اۋرۋدىڭ اۋىر تۇرىنە ۇلاسۋى مۇمكىن. دەمەك اۋرۋحاناعا تۇسەتىندەر سانى دا كوبەيەدى، - دەيدى دارىگەر.

ونىڭ ايتۋىنشا، كوپ جاعدايدا ادامدار اۋرۋ بەلگىلەرى باستالعاندا دارىگەرگە قارالماۋىنان اۋرۋدى اسقىندىرىپ جىبەرەدى. ۇيدە وتىرادى جانە ءوزىن-ءوزى ەمدەۋگە ۇمتىلادى. سۇزگى كابينەتتەرىنە، موبيلدى بريگادالارعا نەمەسە توتەنشە جاعدايدا جەدەل جاردەمگە جۇگىنۋگە بولاتىنىن ءبارى جاقسى بىلەدى. ءتىپتى انتيبيوتيكتەردى وزدەرى تاعايىندايتىن ادامدار دا بار. ناتيجەسىندە اۋرۋدىڭ اسقىنعان فورمالارى پايدا بولادى.

بىزدە ۇجىمدارعا باراتىن ەگۋ بريگادالارى دا بار. كەيدە ولار كۇنىنە بەس-التى ۇجىمعا بارا الادى. بۇل كوپتەگەن ادامدار ءۇشىن ۆاكسيناتسيا كابينەتىنە كەزەككە تۇرماۋ جانە ۋاقىتتى ىسىراپ ەتپەۋ ءۇشىن ىڭعايلى. دارىگەر مامان رەتىندە بارشا اقمولالىقتاردى كەزەكتى ۆاكسيناتسيالاۋعا شاقىرعىم كەلەدى. تۇرعىنداردىڭ %60 ى ەگىلگەنگە دەيىن نەمەسە ادامداردىڭ بارلىعى اۋىرعانشا كوروناۆيرۋس ىندەتى توقتامايدى. سوڭعى ۋاقىتتا ادامدار دا كۇيزەلىسكە تۇسۋدە، ويتكەنى كارانتين بارلىعىن شارشاتتى، ادامدار بۇرىنعى قالىپتى ءومىردى قالايدى. ءبىراق ول ءۇشىن مىندەتتى تۇردە ۆاكسينا الۋىڭىز قاجەت. ۆاكسينا كوپتەگەن ينفەكسيالىق اۋرۋلاردىڭ الدىن الۋ ءۇشىن ەرتەدەن-اق قولدانىلىپ كەلگەنى بەلگىلى. سوندىقتان دا ەكپەگە ەشقانداي كۇمان بولماۋى كەرەك. ەگەر قارسى كورسەتىلىمدەر بولسا، بۇل تۇسىنىكتى. ءبىراق قالعان ادامدار ءوز دەنساۋلىعىمەن قاتار باسقالاردىڭ دا دەنساۋلىعى تۋرالى ويلانۋى كەرەك. ۆيرۋستى ۆاكسيناتسيا ارقىلى عانا توقتاتا الامىز، - دەپ تۇيىندەدى ۆالەنتينا گريشمانوۆسكايا.

baq.kz


:ءبولىسۋ
پئكئر قالدئرؤ
+7
جئبةرؤ
سونداي-اق... وقىڭىز
ونلاين قىزمەتكەرلەر

مۇراعات