رەانيماتسياعا ءتۇسىپ، قايتىس بولعانداردىڭ دەنى - دەر كەزىندە دارىگەرگە قارالماي، ءوزىن-ءوزى ەمدەگەندەر
30 جىلدىق تاجىريبەسى بار ينفەكسيونيست دارىگەر، نۇر-سۇلتان قالاسىنىڭ كوپسالالى مەديتسينالىق ورتالىعى ديرەكتورىنىڭ ورىنباسارى ساۋلە اتىعايەۆا وسىلاي دەيدى.
دارىگەر ءوزىن ءوزى ەمدەۋ قانداي جاعدايعا جەتكىزەتىنىن، رەانيماتسيالىق توسەكتەرگە كىمدەر ءجيى تۇسەتىنىن، ال ك ۆ ي- مەن اۋىرعاندا الدىمەن نە ىستەۋ كەرەكتىگىن جانە ۆاكسيناتسيانىڭ ماڭىزىن تىلگە تيەك ەتتى . ونىڭ ايتۋىنشا، ءوزىن-ءوزى ەمدەۋمەن بىرنەشە كۇن اينالىسقان اۋىر ناۋقاستار ينفەكسيالىق ستاتسيونارلارعا جاتقىزىلادى.
«ينتەرنەتتەگى اقپاراتتار نەگىزىندە بيولوگيالىق قوسپالاردى، شوپتەردى، يممۋنوستيمۋلياتورلاردى پايدالانىپ ەمدەلەتىندەر بار. ولار انتيكواگۋليانتتاردى بىردەن قابىلداپ جاتادى. ونى پايدالى جانە يممۋندىق جۇيەنى نىعايتادى دەپ سانايدى. دەگەنمەن بۇل ۇيدە ەمدەلۋدىڭ ەڭ ءتيىمسىز جانە ەڭ ساۋاتسىز ءتاسىلى. مامانداندىرىلعان مەديتسينالىق كومەككە جۇگىنبەۋى ارقىلى ءوز دەنساۋلىعىنا زيان كەلتىرەدى. كوروناۆيرۋستىڭ وتە قاۋىپتى ەكەنىن ءتۇسىنۋىمىز كەرەك. ال مۋتاتسيالانعان «دەلتا» شتاممى تىپتەن جۇقپالى. ياعني، ءوزىڭ عانا ەمەس جاقىندارىڭنىڭ دا رەانيماتسياعا تۇسۋىنە سەبەپ بولۋىڭ مۇمكىن»، - دەيدى ساۋلە اتىعايەۆا.
دارىگەر ناۋقاستار اۋرۋ دەندەپ كەتكەن كەزدە مەديتسينالىق كومەككە جۇگىنەتىنىن اتاپ ءوتتى. «جوعارى تەمپەراتۋرا، ەنتىگۋ، دەم الا الماۋ سەكىلدى بەلگىلەرى شىققاندا عانا دارىگەرلەرگە حابار بەرەدى. وكىنىشتىسى، التىن ۋاقىتىن ءوزىن- ءوزى ەمدەيمىن دەپ جوعالتادى. قانشا دەگەنمەن ستاتسيونارلىق ەمدەۋ مەن رەانيماتسياعا جەتكىزبەيتىن ۋاقىتى بولدى ەمەس پە؟!» - دەيدى ول. ماماننىڭ ايتۋىنشا، ناۋقاستاردىڭ باسىم بولىگى اۋىر جاعدايدا كەلىپ، تىنىس الۋ اپپاراتىن قولدانادى.
«وكىنىشكە قاراي، ءوزىن-ءوزى ەمدەۋدەن كەيىن ءبارى بىردەي امان قالا بەرمەيدى. ءبىز ۋاقىت جوعالتامىز، سالدارىنان ناۋقاستاردى امان الىپ قالۋ مۇمكىن بولماي جاتادى. رەانيماتسياعا ءتۇسىپ، قايتىس بولعان پاتسيەنتتەردىڭ باسىم بولىگى دەر كەزىندە دارىگەرگە حابار بەرمەي، ءوزىن-ءوزى ەمدەۋمەن اينالىسقان. ال ايرىقشا ايتا كەتەرلىگى، بۇل ناۋقاستار ۆاكسيناتسيالانباعان! ۆاكسينانى تولىعىمەن الىپ، رەانيماتسيا توسەگىندە جاتقان بىردە-ءبىر ناۋقاس بولعان جوق. سەبەبى ءبىز بىلەتىندەي، ۆاكسيناتسيا كوروناۆيرۋستىڭ اۋىر تۇرىنەن قورعايدى. ال رەانيماتسيادا جاتقان ناۋقاستار ۋاقىتىندا ۆاكسيناتسيالانباعانىنا وكىنىپ جاتادى»، - دەيدى س. اتىعايەۆا.