+7 (701) 759 90 19
17 °С : نۇر-سۇلتان
18 °С : الماتى
USD 425.3 EUR 501.05
RUB 5.85 CNY 65.88
جاڭالىقتار

جاپونيا تاريحتاعى ەڭ ەكولوگيالىق تازا وليمپيادانى وتكىزەدى

21 شىلدە 20:29
:ءبولىسۋ
جاپونيا تاريحتاعى ەڭ ەكولوگيالىق تازا وليمپيادانى وتكىزەدى

نۇر-سۇلتان-قازاقپارات - وليمپيادا مەن پاراليمپيادا ويىندارى توكيودا شىلدە مەن تامىز ايلارىندا وتەدى.

جاپونيا بايراقتى باسەكەگە تىڭعىلىقتى دايىندالىپ، تاريحتاعى ەڭ ەكولوگيالىق تازا وليمپيادا وتكىزبەكشى. جارىس جەڭىمپازدارى مەن جۇلدەگەرلەرى قايتا وڭدەلگەن قۇرىلعىلاردان جاسالعان مەدال الادى.

جاپونيا توكيو وليمپياداسىندا بىرىككەن ۇلتتار ۇيىمى ۇسىنعان تۇراقتى دامۋ تۇجىرىمداماسىن نەگىزگە الىپ، «ادامدار مەن عالامشار ءۇشىن جاقسى جاققا وزگەر» دەگەن ۇران ارقىلى الەمدەگى ەڭ ءىرى شاراعا جينالعانداردى جاھاندىق ەكولوگيا ماسەلەسىن شەشۋگە شاقىردى.

ۇيىمداستىرۋشىلار 1964-جىلى توكيودا وتكەن وليمپيادا ويىندارى جاپونيانى تۇبەگەيلى وزگەرتكەنىن العا تارتىپ، ناتيجەسىندە جاپون حالقى سىرتقى الەمدى جاقىنىراق تانىپ، ەل ەكونوميكاسى قارقىندى ءوسۋ جولىنا تۇسكەنىن ايتادى. بيىلعى وليمپيادا ويىندارى ارقىلى قازىر قۋاتتى ەكونوميكاسى بار جاپونيا بۇكىل الەمدە جاقسى وزگەرىستەر باستالىپ، كەيىنگى ۇرپاققا ۇلگى بولارلىق مۇرا قالدىرۋعا كۇش سالادى دەپ ءۇمىت ءبىلدىردى.

توكيونىڭ وليمپيادانى ۇيىمداستىرۋشى كوميتەتى Tokyo 2020 Medal Project جوباسى اياسىندا تۇرعىنداردان قاجەت ەمەس تەحنيكالار مەن قۇرىلعىلاردى جينادى.

2017-جىلدان باستاپ جاپونيانىڭ تۇكپىر-تۇكپىرىندە گادجەتتەردى تاستاۋعا ارنالعان سارى قوقىس سالعىش تۇر. ەكى جىلدىڭ ىشىندە ۇيىمداستىرۋشىلار 79 تونن قالدىقتى جيناعان. ودان 32 كەلى التىن، 3500 كەلى كۇمىس جانە 2200 كەلى قولا العان. بۇل 5 مىڭعا جۋىق مەدالدى جاساۋعا جەتتى.

مەدالدىڭ سىرتقى ءپىشىنىن جاپون ديزاينەرى يۋنيچي كاۆانيسي جاساپ شىققان. ونىڭ جۇمىسى كونكۋرسقا قاتىسقان وزگە 400 ديزاينەردىڭ ىشىنەن سۇرىپتالىپ الىندى.

مەدال سىرتى وڭدەلگەن تاسقا ۇقسايدى. ۇيىمداستىرۋشىلار جۇلدەگە ارنايى كونتسەپتسيا جاساعان. ول: «سپورتشىلار اتاق-داڭققا جەتۋ ءۇشىن كۇندە جەڭىسكە جەتۋگە ۇمتىلۋ قاجەت» دەگەن ماعىنانى بەرەدى. مەدالدىڭ ءبىر جاق بەتىندە جەڭىس قۇدايى نيكا سۋرەتتەلسە، قارسى بەتىندە «توكيو 2020» تاڭباسى مەن وليمپيادانىڭ سيمۆولى بەينەلەنگەن. ونىڭ ۇستىڭگى جاعىندا جاپون حالقىنىڭ ۇلتتىق ناقىشى تۇر.

ءار التىن مەدال كۇمىستەن قۇيىلعان، تەك سىرتى 6 گرام التىنمەن جالاتىلعان. ال قولا مەدالدى قىزىل جەزدەن جاساعان. ءار مەدالدىڭ سالماعى 450-556 گرام اراسىندا. لەنتادا جاپون حالقىنىڭ ەجەلدەن كەلە جاتقان قولونەر ءداستۇرى مەن وليمپيادا قۇندىلىقتارىنا باسا نازار بەرگەن. مەدالدىڭ قورابى جاپوننىڭ شاعان اعاشىنان جاسالىپ، وليمپيادا ەمبلەماسىنىڭ تۇسىنە بويالعان.

جاپوندار مەدالدى قايتا وڭدەلگەن شيكىزاتتان جاساۋدا العاشقى ەمەس. بۇعان دەيىن ۆانكۋۆەردە وتكەن قىسقى وليمپيادادا ميكروسحەما مەن ەلەكتر پلاتاسىنان الىنعان تەمىردەن مەدالدى جاساعان ەدى. وتكەن ريو وليمپياداسىندا كۇمىس جانە قولا جۇلدەلەرى %30 قايتا وڭدەلگەن ەلەكتر قۇرىلعىلارىنان جاسالعان.

جاپونيانىڭ PG كومپانياسى مەن ۇيىمداستىرۋ كوميتەت بىرىگىپ، جەڭىمپازدار تۇعىرىن مۇحيتتان جينالعان جانە حالىق وتكىزگەن پلاستيكتەردەن دايىنداعان. Coca Cola كومپانياسى دا وليمپيادا الاۋىن الىپ جۇرەتىن ادامداردىڭ فورماسىن پلاستيك بوتەلكەلەردەن وڭدەلگەن ماتەريالدان تىگۋ باستاماسىنا سەرىكتەس بولدى.

جاپوندار، ءتىپتى، وليمپيادا قىزمەتكەرلەرى مەن ەرىكتىلەردىڭ فورماسىن تىگۋدە ەكولوگيالىق تازا ونىمدەر، وڭدەلگەن پوليەستەر مەن وسىمدىك تالشىقتارى پايدالانعان. ال وليمپيادا الاۋىنىڭ تۇعىرىن جاساۋعا 2011-جىلى بولعان ءىرى جەر سىلكىنىسى كەزىندە حالىق قونىستانعان ۋاقىتشا ۇيلەردەن قالعان ءاليۋمينييدى قولدانعان.

ايتا كەتسەك، وليمپيادالىق ويىندار 2021-جىلدىڭ 23- شىلدەسى مەن 8- تامىزى ارالىعىندا وتەدى، ال پاراليمپيادالىق ويىندار 24- تامىز بەن 5- قىركۇيەك ارالىعىندا بولادى.

توكيودان - ايبار رىسداۋلەت

massaget.kz


:ءبولىسۋ
سونداي-اق... وقىڭىز
پئكئر قالدئرؤ
+7
جئبةرؤ
ونلاين قىزمەتكەرلەر
رەداكتور
كۇنسۇلتان وتارباي
كۇنسۇلتان وتارباي
954-049

مۇراعات