شاڭحايدا الەمدەگى ەڭ ءىرى پلانەتاري اشىلدى
مۋزەي لينگانگتىڭ ەكسپەريمەنتتىك ەركىن ساۋدا ايماعىندا ورنالاسقان جانە شامامەن 58,6 مىڭ شارشى مەتردى الىپ جاتىر. استرونوميالىق مۋزەيدە ايدان اكەلىنگەن 70 كە جۋىق مەتەوريت، مارس جانە ۆەستا استەرويدى، سونىمەن قاتار نيۋتون، گاليلەي جانە كەپلەردىڭ جۇمىستارى بار 120 دان اسا مادەني جادىگەرلەر جيىنتىعى بار.
قىتايدىڭ Chang'e-5 اي زوندىمەن جەتكىزىلگەن اي توپىراعىنىڭ ءبىر بولىگى دە كوپشىلىككە ۇسىنىلادى. مۋزەي يننوۆاتسيالىق ساۋلەتىمەن، ءتۇرلى تاقىرىپتاعى كورمە الاڭدارىمەن، يممەرسيۆ تەحنولوگياسىمەن جانە قۇندى كوللەكتسيالارىمەن ەرەكشەلەنەدى.
سىرتقى جاعىنان قاراعاندا، كەشەن فانتاستيكالىق فيلمدەردەگى ۇلكەن عارىش كەمەسىنە ۇقسايدى. نەگىزگى عيماراتتىڭ اينالاسىنداعى جاياۋ جۇرگىنشىلەر جولدارى گالاكتيكالىق سپيرال سىزىعىنا ۇقساس ەتىپ سالىنعان. پلانەتاريدىڭ قۇرىلىسىندا ەكولوگيالىق تازا ماتەريالدار قولدانىلعان.
كۇندىز كەلۋشىلەر سيحە مۇناراسىنداعى وپتيكاسى بار تەلەسكوپ ارقىلى كۇندى تاماشالاي الادى جانە كۇن داقتارىنىڭ سۋرەتتەرىن اجىراتىپ، انىق كورە الادى.
پلانەتاريگە كىرۋ بيلەتتەرى ەرەسەكتەر ءۇشىن 30 يۋان (1980 تەڭگە) جانە ستۋدەنتتەر مەن بالالار ءۇشىن 15 يۋان (990 تەڭگە) تۇرادى. جەرگىلىكتى ب ا ق-تىڭ مالىمەتىنشە، جۇمىستىڭ العاشقى كۇنىندە پلانەتاريگە بىرنەشە مىڭ ادام كەلگەن، ال كەلەسى اپتاعا بيلەتتەر ساتىلىپ كەتكەن.
بۇعان دەيىن شانحايدا جارىق شوۋى ۇيىمداستىرىلىپ، گيننەستىڭ الەمدىك رەكوردىن جاڭارتىلدى.