د د ۇ باسشىسى كوروناۆيرۋستىڭ قازىرگىدەن دە قاۋىپتى شتامى پايدا بولۋىن ەسكەرتتى
بۇل تۋرالى ول سارسەنبىدە توكيودا حالىقارالىق وليمپيادا كوميتەتىنىڭ (ح و ك) 138-سەسسياسىندا سويلەگەن سوزىندە ايتتى.
«ۆيرۋس كەڭىنەن تارالعان سايىن، ونىڭ دەلتا نۇسقاسىنا قاراعاندا قاۋىپتىرەك نۇسقاسى پايدا بولۋى مۇمكىن. مۇنداي نۇسقالارى كوبەيگەن سايىن، ولاردىڭ بىرەۋى بولماسا بىرەۋىنە ۆاكسينامىز قارسى تۇرا الماي قالۋى ىقتيمال. سونىڭ سالدارىنان ءبىز ءاۋ باستاعى جاعدايىمىزعا ءتۇسىپ، قايتا باسىنان باستاۋعا تۋرا كەلەدى»، - دەدى ول.
د د ۇ ديرەكتورى ودان «پاندەميا قاشان اياقتالادى؟» دەپ ءجيى سۇراق قويىلاتىنىن ايتتى.
«شىنىندا دا، كوۆيد پەن پاندەميا ءبىزدى كوپتەگەن ماسەلەگە بەتپە-بەت اكەلدى... پاندەميا - بۇل سىناق جانە الەم ونى جەڭە الماي جاتىر»، - دەدى ول.
گەبرەيەسۋس الەمنىڭ پاندەميانى توقتاتا الماي وتىرعانىنىڭ وزىندىك سەبەبى بار دەدى. «بارلىق قاجەتتى قۇرالدار بار» بولعانىمەن، «ناقتى ساياسي مىندەتتەمەلەردىڭ جوقتىعىنان» وسىنداي جاعداي ورىن الىپ وتىرعانىن العا تارتتى.
«ەلدەردىڭ ۇكىمەتتەرى، اسىرەسە G20، ۇجىمدىق ەرىك-جىگەر تانىتىپ، ادام ءومىرىن ساقتاپ قالۋ ءۇشىن بارلىق شارانى قولدانۋى كەرەك. ولار ۆاكسينامەن ءبولىسىپ، ۆيرۋستى الدىن الۋعا ستيمۋل بەرسە، پاندەميانى بىرنەشە ايدا باقىلاۋعا الا الادى»، - دەپ قوستى ول.
اۆتور: گۇلزات اقجولوۆا