ءانشىنىڭ ۇستازى رۋحيانىڭ «سلاۆيان بازارىندا» العا سۋىرىلىپ شىعۋ سەبەبىن ايتتى

نۇر-سۇلتان. قازاقپارات - بەلارۋس ەلىنىڭ ۆيتەبسك قالاسىندا وتكەن «سلاۆيان بازارى» كونكۋرسىنىڭ جەڭىمپازى رۋحيا بايدۇكەندى نۇر-سۇلتان اۋەجايىنان ۇستازدارى مەن جاقىندارى كۇتىپ الدى، دەپ حابارلايدى قازاقپارات ءتىلشىسى.

قازاق ۇلتتىق ونەر ۋنيۆەرسيتەتىنىڭ وقىتۋشىسى ەلەنا ۆولوۆيكوۆا جەڭىمپاز شاكىرتىن قارسى الۋ كەزىندە ونىڭ بەلارۋس جەرىندە كورسەتكەن ونەرىنە باعا بەردى.

«رۋحيا بۇل جولى ءان ورىنداۋ كەزىندە باتىس تەحنيكاسىن قولداناتىن كرەاتيۆتى مۋزىكانت، ۆوكاليست بولۋىمەن سۋىرىلىپ شىقتى. ونىڭ كورسەتكەن ونەرى سان قىرلى بولدى. بۇل - ۆوكاليستىڭ قانشالىقتى كاسىبي ەكەنىدىگىنىڭ كورسەتكىشى. ول ءارتۇرلى ادىستەردى قولدانا الادى، جاي ءان ايتىپ قانا قويماي، وزگەرىپ وتىرادى. ال ونداي دەڭگەيدىڭ ار جاعىندا تىنىمسىز ءارى ءتۇپسىز ەڭبەك جاتىر. تۋا ءبىتتى تالانت ساتتىلىككە %50 عانا سەپ بولا الادى. قالعانى - ەڭبەكتىڭ ارقاسى. ياعني، كۇندەلىكتى ساباق پەن كۇندەلىكتى جاتتىعۋلار جەمىسىن بەرىپ جاتىر. بۇل جەڭىسكە ول ءبىر كۇندە جەتە سالعان جوق. بالا كۇنىنەن بەرى وسىنداي بيىككە ورمەلەپ، تىرمىسىپ جەتتى»، - دەدى ەلەنا ۆولوۆيكوۆا.

كاسىبي مامان ەندى رۋحيا بايدۇكەنگە ءوز الەۋەتىن اشاتىن جاقسى ءان جازعىزىپ، سوعان بەينەكليپ شىعارۋ كەرەكتىگىن ايتادى.

«ول ءار ۆوكاليستىڭ قولىنان كەلە بەرمەيتىن قيىن اندەردى ايتۋ ارقىلى جوعارى دەڭگەي كورسەتتى. رۋحيا بۇل مەجەنى باعىندىردى. كۇردەلى اندەردى ءمىنسىز ورىنداپ قانا قويماي، ولارعا جاڭا ءار بەردى. ياعني تانىمال اندەرگە ءوز جانىنان مازمۇن قوستى. ونىڭ ورىنداۋ مانەرىندە سۋرەتشىنىڭ قولتاڭباسى بار. ول شىرقاعان اندەر مۇلدەم باسقا بوياۋلارمەن قانىعىپ شىعا كەلەدى»، - دەدى ە. ۆولوۆيكوۆا.

بۇعان دەيىن حابارلاعانىمىزداي، رۋحيا بايدۇكەن ءوز جەڭىسىن قازاق ەلىنە ارنايتىنىن ايتتى.

ايتا كەتەيىك ، 14 مەملەكەتتەن كەلگەن قاتىسۋشى سلاۆيان ەلىنەن شىققان كومپوزيتوردىڭ تۋىندىسىن سلاۆيان توبىنا جاتاتىن ءتىلدىڭ بىرىندە وركەستردىڭ سۇيەمەلدەۋىمەن ورىندادى. بايقاۋ ناتيجەسىندە جەرلەسىمىز گران- پري يەگەرى اتانىپ، «التىن ليرا» مۇسىنشەسىمەن بىرگە 20 مىڭ ا ق ش دوللارىنا يە بولدى.

بايقاۋ جەڭىمپازى رۋحيا بايدۇكەندى مەملەكەت باسشىسى قاسىم-جومارت توقايەۆ ارنايى قۇتتىقتادى.

ودان بولەك، جاس ءانشىنى جەڭىسىمەن ەلىمىزدىڭ مادەنيەت جانە سپورت ءمينيسترى اقتوتى رايىمقۇلوۆا دا قۇتتىقتادى.

«بايقاۋعا جالعىز ءوزىم باردىم. الدىمەن بەلارۋس استاناسى مينسكىدە پرەزيدەنت وركەسترىمەن دايىندىق وتكىزدىك، سوسىن ۆيتەبسكىگە باردىق. بايقاۋ ەكى كۇنگە سوزىلدى، جەڭىسكە جەتەتىنىمە العاشىندا كۇمانداندىم، سەبەبى قارسىلاستارىم مىقتى بولدى. دەگەنمەن بارىنشا وزىمە سەنىمدىلىك تانىتتىم»، - دەيدى ول.

اۆتور: ەسىمجان ناقتىباي