قازاقستاندىق ءانشى «سلاۆيان بازارى» فەستيۆالىنىڭ باس جۇلدەسىن جەڭىپ الدى - ۆيدەو

ۆيتەبسك. بەلتا- قازاقپارات - ۆيتەبسكتە وتكەن «سلاۆيان بازارى» بايقاۋىنىڭ گران- پري جۇلدەسىن قازاقستاندىق ءانشى رۋحيا بايدۇكەن «ليرا» الدى، دەپ حابارلايدى قازاقپارات بەلتا اگەنتتىگىنە سىلتەمە جاساپ.

«ليرانى» قازاقستاندىققا ХХХ حالىقارالىق ونەر فەستيۆالىنىڭ جابىلۋ سالتاناتىندا تابىستادى. بايقاۋدىڭ جابىلۋ سالتاناتىندا ديماش قۇدايبەرگەن ءان ورىندادى، رۋحيا بايدۇكەن 1998 -جىلى تالدىقورعان قالاسىندا دۇنيەگە كەلگەن.

ول قازاق ۇلتتىق ونەر ۋنيۆەرسيتەتىندە «ەسترادا جانە ۆوكال» ماماندىعىندا وقيدى. ونىڭ داۋىسى ءتورت جارىم وكتاۆاعا جەتەدى. «مەن ونەرگە بالا كەزىمنەن قۇشتارمىن، وتباسىمدا بايدۇكەن اتام ونەرگە جاقىن بولدى. 4-سىنىپتان باستاپ تالدىقورعان قالاسىنداعى ونەر مەكتەبىندە ۆوكال سىنىبىندا ءبىلىم الدىم. قازىر ۆوكالدان ساباق بەرەمىن جانە مەنىڭ وقۋشىلارىم - ءبىر-بىرىنە ۇقسامايتىن جەكە تۇلعالار. ونىڭ اراسىندا 5 جاسار بالا دا بار، 30 دان اسقان ەرەسەكتەر دە بار. 22 جاسىمدا ۇستازدىقتى بىرگە الىپ ءجۇرۋ - ۇلكەن مىندەت دەپ ويلايمىن. ونىڭ بارلىعى ادامنىڭ وسۋىنە كومەكتەسەدى»، - دەيدى جاس ءانشى قازاقپارات تىلشىسىنە بەرگەن سۇحباتىندا.

رۋحيا بايدۇكەن «سلاۆيان بازارى» بايقاۋىنا دايىندىقتىڭ قالاي ءجۇرىپ جاتقانىن ايتىپ بەردى.

ايتا كەتەيىك، «سلاۆيان بازارى» بايقاۋى 1992 -جىلدان بەرى وتكىزىلىپ كەلەدى. 2015 -جىلى ديماش قۇدايبەرگەن، ال 2019 -جىلى - ءادىلحان ماكين قازاقستان اتىنان قاتىسىپ، باس جۇلدە يەلەنگەن ەدى.