+7 (701) 759 90 19
13 °С : نۇر-سۇلتان
31 °С : الماتى
USD 425.3 EUR 501.05
RUB 5.85 CNY 65.88
جاڭالىقتار

كورەرمەننىڭ ەرەكشە ىقىلاسىنا بولەنگەن ابىلاي - شەتەلدەگى قازاق ءتىلدى ب ا ق-قا شولۋ

18 شىلدە 14:35
:ءبولىسۋ
كورەرمەننىڭ ەرەكشە ىقىلاسىنا بولەنگەن ابىلاي - شەتەلدەگى قازاق ءتىلدى ب ا ق-قا شولۋ

نۇر-سۇلتان. قازاقپارات - «قازاقپارات» ح ا ا ادەتتەگىدەي شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.

شاۆكات ميرزيايەۆ قازاقستان س ءى م باسشىسىن قابىلدادى – ءو ز ا

وزبەكستان رەسپۋبليكاسىنىڭ پرەزيدەنتى شاۆكات ميرزيايەۆ «ورتالىق جانە وڭتۇستىك ازيا: ايماقتىق بايلانىس. قاۋىپتەر مەن مۇمكىندىكتەر» اتتى حالىقارالىق كونفەرەنسياسىنا قاتىسىپ وتىرعان قازاقستان رەسپۋبليكاسى پرەمەر-ءمينيسترىنىڭ ورىنباسارى - سىرتقى ىستەر ءمينيسترى مۇحتار تىلەۋبەردىنى قابىلدادى، دەپ حابارلادى ءوزا اقپارات اگەنتتىگى.


تاراپتار وزبەكستان مەن قازاقستان اراسىنداعى دوستىق، تاتۋ كورشىلىك جانە ستراتەگيالىق سەرىكتەستىك بايلانىستى ودان ءارى نىعايتۋ ماسەلەلەرىن تالقىلادى. ق ر سىرتقى ىستەر ءمينيسترى مۇحتار تىلەۋبەردى وزبەكستان باسشىسىنا قازاقستان پرەزيدەنتى قاسىم-جومارت توقايەۆ پەن قازاقستان رەسپۋبليكاسىنىڭ تۇڭعىش پرەزيدەنتى - ەلباسى نۇرسۇلتان نازاربايەۆتىڭ قۇتتىقتاۋى مەن ىزگى تىلەكتەرىن جەتكىزگەن. ءوزا- نىڭ دەرەگىنشە، وسى كەزدەسۋدە بولاشاق جوعارى دەڭگەيدەگى ءىس- شارالارعا دايىندىق كورۋ، سونداي-اق ەكى ەل اراسىنداعى ەكونوميكالىق جوبالار مەن ءوزارا ءتيىمدى ىنتىماقتاستىق باعدارلامالارىن ىلگەرىلەتۋگە ەرەكشە نازار اۋدارىلدى.


«اۋعانستانداعى جاعدايعا بايلانىستى ايماقتىق كۇن تارتىبىندەگى ماسەلەلەر جانە تامىز ايىنىڭ باسىندا تۇركىمەنستاندا وتەتىن كەزەكتى ورتالىق ازيا سامميتىنە دايىندىق ماسەلەسى دە تالقىلاندى»، دەپ تۇيىندەيدى وزبەكستاندىق ب ا ق.

قاتيرا قالي قىزى «ەڭبەك سىڭىرگەن ۇستاز» اتاندى - Kaznews

بايان- ولگي ايماعىنىڭ جالپى ءبىلىم بەرەتىن №1-مەكتەپتىڭ اعا ۇستازى قاتيرا قالي قىزى «موڭعول ەلىنە ەڭبەك سىڭىرگەن ۇستاز» قۇرمەتتى اتاعىمەن ماراپاتتالدى» دەپ حابارلايدى Kaznews اقپارات پورتالى.


اتالعان ب ا ق-تىڭ دەرەگىنە سۇيەنسەك، عۇن يمپەرياسىنا 2230 جىل، ۇلى موڭعول مەملەكەتىنە 815 جىل، ۇلت ازاتتىق قوزعالىسىنا 110 جىل، موڭعول حالىق رەۆوليۋتسياسىنىڭ توڭكەرىسىنە 100 جىل، دەموكراتيالىق قوزعالىسقا 32 جىل تولۋىنا وراي موڭعوليا پرەزيدەنتى ۋ. حۇرەلسۇح جارلىق شىعارىپ ءبىلىم، دەنساۋلىق، اۋىل شارۋاشىلىعى جانە مادەنيەت سالاسىندا ابىرويلى قىزمەت اتقارعان 5 ازاماتقا «موڭعول ەلىنە ەڭبەك سىڭىرگەن قايراتكەر» اتاعىن بەردى.

قازاقستاننىڭ بۇرىنعى باس ءمۇفتيى دۇنيەدەن وزدى - Parstoday

ءدىن تانۋشى، شىعىستانۋشى ءارى يسلامتانۋشى عالىمنىڭ قازاسى تۋرالى حابار يراننىڭ Parstoday اقپارات اگەنتتىگىندە دە جاريالاندى.


وسى اپتادا يراننىڭ Parstoday اقپارات اگەنتتىگىندە قازاقستانعا قاتىستى بىرنەشە اقپارات جارىق كوردى. سونىڭ ىشىندە اتالعان باسىلىم كوزىنىڭ ارنايى توقتالعانى شىعىستانۋشى، ءدىنتانۋشى، ادەبيەت زەرتتەۋشىسى، فيلولوگيا عىلىمدارىنىڭ دوكتورى ءابساتتار دەربىسالىنىڭ دۇنيەدەن ءوتۋى تۋرالى حابار دەۋگە بولادى.

يراندىق ب ا ق قازاقستاننىڭ بۇرىنعى باس ءمۇفتيى بەيسەنبى كۇنى تاڭەرتەڭ 74 جاسىندا دۇنيەدەن وزعانىن ايتا كەلىپ، قازاقستان مۇسىلماندارىنىڭ ءدىني باسقارماسى مەن قازاقستاننىڭ اقپارات جانە قوعامدىق دامۋ ءمينيسترى ايدا بالايەۆانىڭ وسى ءدىنتانۋشى، شىعىستانۋشى ءارى يسلامتانۋشى عالىمنىڭ جانۇياسى مەن دوستارىنا كوڭىل ايتقانىن تىلگە تيەك ەتكەن.

ايتا كەتۋ كەرەك، ءابساتتار دەربىسالى 2000 -جىلى ماۋسىمنان 2013 -جىلى اقپانعا دەيىن قازاقستان مۇسىلماندارى ءدىني باسقارماسىنىڭ ءتوراعاسى جانە ورتا ازيا مۇفتيلەرى كەڭەسىنىڭ باسشىسى قىزمەتىن اتقاردى.

كورەرمەننىڭ شىنايى ىقىلاسىنا بولەنگەن جاس ءارتىس ابىلاي - CNR

قازىر ابىلاي ايدىن ۇلى جۇمىس ىستەيتىن «انار ءپىسىپ- جەتىلدى» (ۆەب-دراما) كومانداسى قىزمەتىن 2016 -جىلى قاڭتاردا باستاعان.

«انار ءپىسىپ- جەتىلدى» - بۇل تۇراقتى اكتەرلەر، قىزىقتى كورىنىستەر مەن ينتەرنەتتەگى ءازىل مادەنيەتىن بەينەلەيتىن شاعىن سيۋجەتتىك ميني- سەريالار. اتالعان شىعارماشىق توپ قازىرگە دەيىن ءوز ورتاسىندا كوپتەگەن كورەرمەن جيناپ ۇلگەردى. كومەديالىق ۆەب-دراما كومانداسى - ءدال وزدەرىنە قويىلعان «انار» وسىمدىگى سياقتى مىقتى، جاراسىمدى ۇجىم. ولاردىڭ ەڭ باستى تاعى ءبىر ەرەكشەلىگى - شىعارماشىلىق ۇيىمنىڭ مۇشەلەرى ءار ۇلتتان قۇرالعان» دەپ حابارلايدى kazakcnr.com.


قىتايلىق باسىلىم بۇل جولى ءبىر جىلدان بەرى اتالعان ۇجىمعا جاڭادان ءارتىس بولىپ قوسىلعان، كورەرمەننىڭ ەرەكشە ىقىلاسىنا بولەنگەن قانداسىمىز ابىلاي ايدىن ۇلىن ارنايى تانىستىرۋدى ءجون كورگەن.

ابىلاي ايدىن ۇلى 1995 -جىلى ماۋسىم ايىندا التايدىڭ قابا اۋدانىندا تۋعان. باسكەتبولعا قاتتى قىزىعاتىن ول 9-سىنىپتى بىتىرگەننەن كەيىن ءۇرىمشى قالالىق باسكەتبول كومانداسىنا سپورتشى بولىپ قابىلدانادى. سوڭىندا سپورتتاعى جوعارى ناتيجەسىمەن شىڭجاڭ پەداگوگيكا ۋنيۆەرسيتەتىنە وقۋعا تۇسەدى.


2019 -جىلى ابىلاي «جينشان» دەگەن لاقاپ اتپەن قىسقاشا ۆيدەولار ءتۇسىرىپ، الەۋمەتتىك جەلىلەرگە سالا باستايدى. ونىڭ وسىنداي قىزىقتى بەينەروليكتەرى تەز ارادا كوپ قارالىم جيناپ، «جينشاننىڭ» تانىمالدىعى ارتا تۇسكەن.

سوڭىنان «انار ءپىسىپ-جەتىلدى» كومانداسىنىڭ باس ديرەكتورى ونىڭ تالانتىنا ءتانتى بولىپ، ابىلايدى اتالعان كومانداعا قوسىلۋعا شاقىرادى.


«ابىلايدىڭ بۇگىنگى ناتيجەسى وڭاي- وسپاق قولعا كەلگەن جوق. «ەردىڭ اتىن ەڭبەك شىعارار» دەگەندەي «انار ءپىسىپ- جەتىلدىگە» العاش قوسىلعان كەزىنەن-اق، ابىلاي ءوزىنىڭ باسقا ارىپتەستەرىنەن كوبىرەك ەڭبەك ەتۋ كەرەكتىگىن ءبىلىپ، العاشقى كۇندەرى 40 نەشە كۇن ۇيىنە قايتپاي، جۇمىس ورنىندا قالىپ، سەناري جازۋمەن اينالىستى. سونداي-اق، ءوز ءرولىن سومداۋ جاعىندا ماشىقتاندى» دەپ جازادى CNR.


بۇرىن مىقتى سپورتشى، قازىر ەل ىشىندە تالانتتى ءارتىس اتانىپ ۇلگەرگەن ابىلاي قيىندىقتان قورىقپايتىن، مويىماعان ادام عانا قاشاندا جەڭىس تۇعىرىندا بولاتىنىن ايتادى.

«مەن ۇنەمى وزگەلەردىڭ نازارىنداعى قيىن، بۇرالاڭ دەپ سانالاتىن جولداردى تاڭدايمىن. ويتكەنى قيىنشىلىققا ءدوپ كەلگەن سايىن جىگەرىم تاسقىنداي تۇسەدى. قيىنشىلىققا مويىنسال بولماعان ادام ءارقانداي جەردە التىنداي جارقىراپ، ءوز قۇنىن ساقتاي الادى»، - دەيدى ابىلاي ايدىن ۇلى.


تۇركيا قازاقستانعا 96 ميلليون دوللار ينۆەستيتسيا جاسادى - TRT

قازاقستاننىڭ تۇركياداعى وكىلەتتى ەلشىلىگى قازاقستان ۇلتتىق بانكىنىڭ تۇركيادان قازاقستانعا جاسالعان ينۆەستيتسياعا بايلانىستى 2021 -جىلعى العاشقى شيرەكتەگى مالىمەتتەردى جاريالادى. مالىمەتتەرگە قاراعاندا 2021 -جىلدىڭ العاشقى شيرەگىندە تۇركيادان قازاقستانعا 96.1 ميلليون دوللارلىق تىكەلەي ينۆەستيتسيا جاسالعان.


بۇل تۋرالى وسى اپتادا تۇركيا راديو تەلەۆيزيا پورتالى حابارلاعان بولاتىن.

تۇركيالىق ب ا ق- تىڭ دەرەگىنشە، وسى مالىمەت 2020 -جىلعى وسىنداي كەزەڭمەن سالىستىرعاندا 139 پايىز ارتقان. بۇل - 2005 -جىلعى العاشقى شيرەكتەن بەرگى ەڭ جوعارعى ينۆەستيسيا رەتىندە تىركەلگەن.


«سونىمەن بىرگە 2005-2020 -جىلدارى اراسىنداعى 1-شيرەكتە تۇركيادان قازاقستانعا ورتاشا 39.7 ميلليون دوللارلىق تىكەلەي ينۆەستيتسيا جاسالعان. 2021 -جىلعى ۇقساس مەزگىلدەگى ينۆەستيسيا اتالمىش ورشادان 142 پايىز جوعارى بولدى» دەپ جازدى تۇركيا راديو تەلەۆيزيا پورتالى.

اۆتور: بەيسەن سۇلتان ۇلى


:ءبولىسۋ
سونداي-اق... وقىڭىز
پئكئر قالدئرؤ
+7
جئبةرؤ
ونلاين قىزمەتكەرلەر
رەداكتور
ريزابەك نۇسىپبەك
ريزابەك نۇسىپبەك
954-049

مۇراعات