ابايدى ۆەتنام تىلىندە سويلەتكەن اۋدارماشى پرەزيدەنتتىڭ العىس حاتىن الدى
سىرتقى ساياسي ۆەدومستۆو تاراتقان مالىمەتكە سەنسەك، سالتاناتتى ءراسىم بارىسىندا ەلشى ەرلان بايجانوۆ قازاقستان مادەنيەتىن ۆەتنامدا كەڭىنەن ناسيحاتتاعانى ءۇشىن شىن جۇرەكتەن ريزاشىلىعىن ءبىلدىرىپ، ماراپاتتالعان ازاماتقا جاڭا شىعارماشىلىق تابىس تىلەدى.
ءوز كەزەگىندە ۆەتنامدىق كوركەم اۋدارما شەبەرى ونىڭ جۇمىسىنا جوعارى باعا بەرگەنى ءۇشىن شىنايى العىسىن ايتىپ، قازاقستان پرەزيدەنتىنە جىلى لەبىزدەرىن جانە ىزگى تىلەكتەرىن جەتكىزۋدى سۇرادى. - كۇتپەگەن قۇرمەتكە بولىنگەنىمە وتە قۋانىشتىمىن. قازاقستان پرەزيدەنتىنىڭ وسى شەشىمى مەنى قازاق حالقىنىڭ بىرەگەي باي مادەنيەتىن ۆەتنامدا ناسيحاتتاۋدى جالعاستىرۋعا قۇلشىندىرادى، - دەدى دوان زان نگيەپ.
ابايدىڭ «قارا سوزدەرىن» ۆەتنام تىلىندە باسىپ شىعارۋ بويىنشا اۋدارما توبىنىڭ ۇيىمداستىرۋشىسى جانە جەتەكشىسى دوان زان نگيەپ، اۋدارما رەداكتورى جانە رەتسەنزەنتى، ۆەتنام جازۋشىلار وداعىندا شەتەل ادەبيەتىن تاراتۋدى قولداۋ قورىنىڭ ديرەكتورى تحۋ توان جانە ۆەتنام جازۋشىلار وداعىندا شەتەل ادەبيەتىن تاراتۋدى قولداۋ قورىنىڭ ديرەكتورىنىڭ ورىنباسارى لە دىك مان جۇمىس جاسادى.