ماۋلەن اشىمبايەۆ ماڭعىستاۋداعى قۋاڭشىلىق تۋرالى: ۇكىمەتتىڭ رەزەرۆى پايدالانىلادى
بۇل تۋرالى ول جەلىدەگى پاراقشاسىندا جازدى، دەپ حابارلايدى قازاقپارات.
«سەناتورلاردىڭ وڭىرلەردەگى جۇمىسى جالعاسۋدا. وسىعان وراي ماڭعىستاۋ وبلىسىنا كەلدىم. قازىرگى تاڭدا وڭىردەگى قۋاڭشىلىق ءبارىمىزدى الاڭداتىپ وتىر. مال شىعىنى دا تىركەلگەنى بەلگىلى. ساپار بارىسىندا ءوڭىر باسشىلىعىمەن، سونداي-اق، جۇرتشىلىقپەن كەزدەسىپ، وسى جانە وزگە دە وزەكتى ماسەلەلەردى تالقىلادىق. بۇل جاعداي مەملەكەت باسشىسىنىڭ باقىلاۋىندا. پرەزيدەنتىمىز جۋىردا عانا وتكەن ۇكىمەتتىڭ كەڭەيتىلگەن وتىرىسىندا ءتيىستى ورگاندار مەن اكىمدىكتەرگە ناقتى تاپسىرمالار بەردى. سوعان سايكەس قيىندىققا تاپ بولعان شارۋالارعا جۇيەلى قولداۋ كورسەتىلەدى. ناقتى ايتقاندا، شارۋاشىلىقتاردى جەم-شوپپەن قامتاماسىز ەتۋ ءۇشىن ۇكىمەتتىڭ رەزەرۆى پايدالانىلادى. قوسىمشا سۋبسيديالار بەرىلەدى. توتەنشە شارا رەتىندە ەرەكشە قورعالاتىن تابيعي اۋماقتاردان ءشوپ جيناۋ مۇمكىندىگى قاراستىرىلادى. پرەزيدەنت جەم- ءشوپتىڭ ىشكى نارىقتا جەتكىلىكتى بولۋى ءۇشىن ونى شەتكە شىعارۋدى ۋاقىتشا توقتاتا تۇرۋدى دا تاپسىردى. بۇل جاعدايدى وڭالتۋ جولىنداعى ماڭىزدى شەشىم ەكەنى ءسوزسىز. قۋاڭشىلىق - تابيعي جانە قايتالانىپ وتىراتىن قۇبىلىس. سوندىقتان جەدەل شارالارمەن قوسا كەشەندى ءىس-قيمىل الگوريتمىن ازىرلەۋ دە ماڭىزدى. جيىندا مەملەكەت باسشىسى وسىنداي ناقتى مىندەتتەردى جۇكتەدى. بۇگىنگى ساپار بارىسىندا وسى ماسەلەلەرگە باسا ءمان بەرىپ، پرەزيدەنتىمىزدىڭ تاپسىرمالارىن وڭىردە ىسكە اسىرۋ بارىسىنا نازار اۋداردىق»، - دەپ جازدى ماۋلەن اشىمبايەۆ.
سونىمەن قاتار، ول ساپار بارىسىندا «كاسپي» سۋ تۇشىتۋ زاۋىتىنىڭ جۇمىسىمەن تانىستى.
«ماڭعىستاۋدا تازا اۋىز سۋ ماسەلەسى وتە وزەكتى ەكەنى كوپشىلىككە ءمالىم. ونى شەشۋ ءۇشىن وسىنداي نىسانداردىڭ ماڭىزى زور. ساپار اياسىندا بالىق جانە نان زاۋىتتارىنىڭ قىزمەتكەرلەرىمەن دە كەزدەسىپ، مەملەكەت باسشىسىنىڭ جاڭعىرۋ باعدارى مەن قابىلدانعان زاڭداردىڭ ماڭىزىنا توقتالدىق. سونداي-اق، بۇگىن ءابىش كەكىلباي ۇلى اتىنداعى مادەني ورتالىققا ارنايى ات باسىن بۇردىم. قابىرعالى قالامگەر ءارى قايراتكەر ءابىش اعامىزدىڭ ۇلت تاريحىنداعى ورنى ەرەكشە. سوندىقتان، ول كىسىنىڭ ەسىمىن ۇلىقتاۋ، باي ادەبي مۇراسىن دارىپتەۋ - بارشامىز ءۇشىن ابىرويلى مىندەت»، - دەپ تولىقتىردى م. اشىمبايەۆ.
