زايساندا «شىلىكتى» ساپار ورتالىعى سالىنادى

زايسان. قازاقپارات - شىعىس قازاقستان وبلىسىنىڭ زايسان اۋدانىندا «شىلىكتى» ساپار ورتالىعى سالىنادى.

بۇل تۋرالى قازاقپارات بەرەل قورىق مۋزەيىنە سىلتەمە جاساپ حابارلايدى.

بۇگىن «بەرەل» مەملەكەتتىك تاريحي-مادەني قورىق-مۋزەيىنىڭ ديرەكتورى نۇربولات احمەتجانوۆ زايسان اۋدانىنىڭ اكىمى س . ءزاينۋلديننىڭ قابىلداۋىندا بولىپ «شىلىكتى» ساپار ورتالىعىنىڭ ورنالاساتىن جەرى بويىنشا كەلىسسوزدەر جۇرگىزدى.

ق ر مادەنيەت جانە سپورت مينيسترلىگىنىڭ قولداۋىمەن بوي كوتەرەتىن عيمارات «بەرەل» مەملەكەتتىك تاريحي-مادەني قورىق-مۋزەيىنە قاراستى شىلىكتى قورعاندارىن كورۋگە كەلۋشىلەردىڭ سانىن ارتتىرۋ، تۋريستەرگە كەڭىنەن ناسيحاتتاۋ جانە جايلىلىقتى قامتاماسىز ەتۋ ماقساتىندا قولعا الىنعان.

ساپار ورتالىعىندا زاماناۋي ۇلگىدە جابدىقتالعان مۋزەي زالى، قوناق ءۇي عيماراتى جانە اقپاراتتىق- ناسيحاتتىق ورتالىق سىندى ءبىرقاتار بولىمدەر قاراستىرىلعان. سونداي-اق، «بەرەل» مەملەكەتتىك تاريحي-مادەني قورىق-مۋزەيى «ر م ق ك ديرەكتورى نۇربولات احمەتجانوۆ قورىق-مۋزەيگە قاراستى زايسان اۋدانىنداعى شىلىكتى قورعاندارىنا بارىپ، تاريحي مەكەندە اتقارىلىپ جاتقان جۇمىستار مەن الداعى جوسپارلار تۋرالى كەڭەس وتكىزدى. زايسان وڭىرىندە 6 تاريحي، 21 مادەني - ارحيتەكتۋرالىق، 8 ارحەولوگيالىق ەسكەرتكىشتەر تىركەلگەن. ولكەدەگى تاريحي ەسكەرتكىشتەردىڭ ءبىرى دە بىرەگەيى - شىلىكتى قورعاندارى. شىلىكتى قورىمى زايسان اۋدانى، شىلىكتى اۋىلىنىڭ وڭتۇستىك باتىسىنان 3 ك م جەردە ورنالاسقان. ۇزىندىعى - 80، ەنى - 30 شاقىرىمدى قامتيدى.

شىلىك قورعانىنىڭ وڭتۇستىگىن تارباعاتاي، شىعىسىن ساۋىر-سايقان، سولتۇستىگىن ماڭىراق تاۋلارى قورشاپ جاتىر. شىلىكتى جازىعى ساقتاردىڭ العاشقى مەملەكەتىنىڭ ورداسى تىگىلگەن قاسيەتتى مەكەن. شىلىكتى ەرتە ساقتار زامانىنداعى ەليتارلىق ەسكەرتكىشتەردىڭ بىرەگەيى. تابيعاتتىڭ ۇيلەسىمدى اسەرىنىڭ جانە ادامنىڭ عاسىرلار بويى قىزمەتىنىڭ سالدارىنان پايدا بولعان تاريحي- مادەني لاندشافت ايماقتىڭ باستى قۇندىلىعى بولىپ تابىلادى. ونىڭ ەڭ كوپ شوعىرلانعان جەرىن شىلىكتى ەسكەرتكىشتەرى دەپ اتايدى.

شىلىكتى وباسى ب. ز. ب. VII - Ⅵعاسىرعا جاتقىزىلادى.

شىلىكتى قورىمىندا بارلىعى 51 وبا بار.