ۆاكسينا العان ەلوردالىقتار اراسىندا ۇتىس ويىندارى اپتا سايىن وتكىزىلەدى

نۇر-سۇلتان. قازاقپارات - نۇر-سۇلتاندا ۆاكسيناتسيالانعاندار اراسىندا باعالى سىيلىقتار اپتا سايىن ويناتىلادى.

بۇل تۋرالى قازاقپارات اكىمدىككە سىلتەمە جاساپ حابارلايدى.

تاعى ەكى iPhone12 جانە باسقا دا قۇندى سىيلىقتاردىڭ ەكىنشى ۇتىس ويىنىنا 7- شىلدە مەن 16- شىلدە ارالىعىندا ۆاكسيناتسيالانعان ادامدار قاتىسادى.

ۇتىس ويىنى تىكەلەي ەفيردە 17- شىلدە (سەنبى) كۇنى نۇر-سۇلتان قالاسى اكىمدىگىنىڭ الەۋمەتتىك جەلىلەردەگى (Facebook، YouTube) پاراقشالارىندا وتەدى.

IPhone12 جانە باسقا دا قۇندى سىيلىقتاردىڭ العاشقى ۇتىس ويىنى 9- شىلدە كۇنى وتكەن بولاتىن.

بۇل اۆتوماتتى ۇتىس ويىنىنا ۆاكسيناتسيا باستالعان ساتتەن باستاپ قالادا 6- شىلدەگە دەيىن (قوسا العاندا) ۆاكسيناتسيالانعاندار قاتىستى.

Birge پلاتفورماسىندا بايقاۋ جەڭىمپازدارىن انىقتاۋ ءۇشىن ارنايى راندومايزەر قىزمەتى ورناتىلدى، ول جەڭىمپازداردى ID ارقىلى تاڭدايدى. ونى ازىرلەۋگە IT- قاۋىمداستىق تا قاتىستى.

بۇگىنگى كۇنى سەرۆيس ق ر دەنساۋلىق ساقتاۋ مينيسترلىگىنىڭ ۆاكسيناتسيالانعاندار تۋرالى مالىمەتتەرىمەن بىرىكتىرىلگەن.

وسىعان بايلانىستى ەكپە العان ەلوردا تۇرعىندارى كونكۋرسقا اۆتوماتتى تۇردە قاتىسادى، وعان ارنايى قۇجات تولتىرىپ، قوسىمشا ۆاكسينا الۋدىڭ ەش قاجەتى جوق. IPhone12 جانە باسقا دا قۇندى سىيلىقتاردىڭ ۇتىس ويىنىن ەلوردا اكىمدىگى اپتا سايىن جازدىڭ سوڭىنا دەيىن وتكىزەدى.

ەسكە سالساق، نۇر-سۇلتاندا ۆاكسينا العان ەكى تۇرعىن iPhone12 ۇتىپ العان بولاتىن.