نۇر-سۇلتاندا قاي جەردە سۋعا شومىلۋعا رۇقسات ەتىلگەن

نۇر-سۇلتان. قازاقپارات - ەلوردانىڭ اۋماعىندا سۋعا شومىلۋعا رۇقسات ەتىلگەن ايماقتاردىڭ اتى بەلگىلى بولدى، دەپ حابارلايدى قازاقپارات.

بۇل تۋرالى نۇر-سۇلتان قالاسى توتەنشە جاعدايلار دەپارتامەنتى ازاماتتىق قورعانىس باسقارماسىنىڭ باستىعى راتبەك دەمەۋبەرگەن قالا اكىمدىگىنىڭ ونلاين بريفينگىندە ايتتى.

«بيىل نۇر-سۇلتان قالاسى اكىمدىگىنىڭ قاۋلىسى بويىنشا سۋعا شومىلۋعا رۇقسات ەتىلگەن 3 اۋماق ايقىندالدى. ولار - «ورتالىق جاعاجاي»، «تري پەسكاريا» جانە «استانالىق اۋلا». سونىمەن قاتار، ءماسليحات شەشىمىنىڭ جوباسى قاراستىرىلۋدا. جوبا شەڭبەرىندە شومىلۋعا تىيىم سالىناتىن 20 ۋچاسكە ايقىندالدى. قازىر ءماسليحات شەشىمى ادىلەت مينيسترلىگىندە قارالىپ جاتىر. ۆەدومستۆودان شىققاننان كەيىن ءتيىستى وتىرىستا بۇل قاۋلى قابىلدانادى»، - دەگەن ازاماتتىق قورعانىس وكىلى شومىلۋعا بولمايتىن الگى ۋچاسكەلەردىڭ قالانىڭ قاي اۋداندارىندا ورنالاسقانىن اتادى.

«20 ۋچاستەكتىڭ جەتەۋى الماتى اۋدانىندا، بايقوڭىر اۋدانىندا - 4، ەسىل اۋدانىندا - 6 جانە سارىارقا اۋدانىندا - 3 ۋچاسكە. ءماسليحات شەشىمى قابىلدانعاننان كەيىن ءتىزىم ب ا ق ارقىلى، ۇگىت-ناسيحات جۇمىستارى جاريالانادى»، - دەدى راتبەك دەمەۋبەرگەن.