ەلوردانىڭ قۇرمەتتى ازاماتى اتاعى كىمدەرگە بەرىلدى؟
«ەلوردانىڭ ءاربىر تۇرعىنى قالانىڭ دامۋىنا، ونىڭ قالىپتاسۋىنا ءوز ۇلەسىن قوسىپ كەلەدى. قالامىزدىڭ ءاربىر ازاماتى ءتۇرلى سالادا ەڭبەك ەتىپ ءجۇر. مۇعالىمدەر، مەديتسينا قىزمەتكەرلەرى، ءتارتىپ ساقشىلارى، قۇرىلىسشىلار، كوممۋنالدىق قىزمەتكەرلەر نەمەسە سۋرەتشىلەر، ولاردىڭ قاي-قايسىسىن الساق تا قوعامنىڭ دامۋى ءۇشىن ايانباي قىزمەت ەتىپ ءجۇر»، - دەپ جازدى التاي كولگىنوۆ.
ءماسليحات شەشىمىمەن ەلوردانىڭ قۇرمەتتى ازاماتى اتاعىن بەلگىلى كارديوحيرۋرگ يۋري پيا، ساۋلەتشى سارسەمبەك ءجۇنىسوۆ، ەڭبەك ارداگەرى اۋسادىق اۋبەكوۆ الدى.
«ولاردىڭ ءارقايسىسىنىڭ كاسىبي جولى قۇرمەتكە لايىق. مىسالى، كارديوحيرۋرگ يۋري پيا ادام ومىرىنە اراشا ءتۇسىپ، قانشاما ناۋقاستى امان الىپ قالدى. 2012-جىلى يۋري پيا العاش رەت دونورلىق جۇرەكتى ترانسپلانتاتسيالاۋ وپەراتسياسىن جاسادى، ال 2016-جىلى رەسپۋبليكادا العاش رەت ەڭ كۇردەلى وپەراتسيالاردىڭ ءبىرى بولىپ سانالاتىن وكپە ترانسپلانتاتسياسىن ءساتتى اياقتادى.
2017-جىلى ونىڭ باسشىلىعىمەن العاش رەت حالىقارالىق دەڭگەيدە جاساندى جۇرەك يمپلانتاتسيالاندى. يۋري پيا — ەل ماقتانىشى، مەديتسينالىق ستۋدەنتتەر ءۇشىن ۇلگى. سارسەمبەك ءجۇنىسوۆ ۇزاق جىلدار بويى ەلوردانى قالىپتاستىرۋ بويىنشا جۇمىس ىستەدى: قالانىڭ كەشەندى كولىك سحەماسىن، جەلەكجول قۇرىلىسى جوباسىن ازىرلەۋگە، سونداي-اق باسقا دا كوپتەگەن باستامالاردى ازىرلەۋگە بەلسەندى قاتىستى. سونداي-اق، قالانىڭ ينفراقۇرىلىمىن دامىتۋعا جانە نىسانداردى سالۋ پروتسەسىنە اۋسادىق اۋبەكوۆ بەلسەندى قاتىستى»، - دەدى قالا اكىمى.
