جۇزدەن استام ءورت ءسوندىرۋشى كوكشەتاۋ ماڭىنداعى دالا ورتىمەن ارپالىسىپ جاتىر

كوكشەتاۋ. قازاقپارات - كوكشەتاۋ قالاسى ماڭىنداعى دالادا قۇرعاق ءشوپ ورتەندى، دەپ حابارلايدى قازاقپارات ءتىلشىسى اقمولا وبلىستىق ت ج د باسپا ءسوز قىزمەتىنە سىلتەمە جاساپ.

ۆەدومستۆونىڭ مالىمەتىنشە، بۇگىن پودحوز كەنتى اۋماعىندا «كوكشەتاۋ - شۋچە» تاس جولىنىڭ 7 شاقىرىمى تۇسىندا دالا ورتەندى.

«قىزىل جالىن 20 گەكتار اۋماقتى شارپىدى. ءورتتى سوندىرۋگە ت ج د جەكە قۇرامىنان 96 ادام جانە 10 ءورت ءسوندىرۋ تەحنيكاسى، م. عابدۋللين ازاماتىق قورعاۋ اكادەمياسىنىڭ 28 قىزمەتكەرى جانە 1 تەحنيكاسى، «بۇقپا» ورمان شارۋشىلىعى مەكەمەسىنىڭ 25 قىزمەتكەرى جانە 5 تەحنيكاسى جۇمىلدىرىلۋدا. ورتتەن زارداپ شەككەندەر جوق، سونداي-اق، ەلدى-مەكەندەرگە دە قاۋپ ءتونىپ تۇرعان جوق. قازىرگى كەزدە ءورتتى ءسوندىرۋ جۇمىستارى ودان ءارى جالعاسۋدا»، - دەيدى ۆەدومستوۆودان.

ايتا كەتسەك، اقمولا وبلىسىنىڭ ءبىرجان سال اۋدانىندا نايزاعاي ءتۇسىپ، دالا ءورتى ءورشىدى، ونى سوندىرمەكشى بولعان ەر ادامنىڭ دەنەسىن كۇيىك شالىپ كوز جۇمعان ەدى. وسى رەتتە، اقمولا وبلىستىق ت ج د ماماندارى وڭىردە كۇننىڭ اپتاپ ىستىق بولۋىنا بايلانىستى تۇرعىندارىن ءورت قاۋىپسىزدىگى ەرەجەلەرىن ساقتاۋعا شاقىرادى.