قازاقستاندىقتار شەنگەن ۆيزاسىن قاشان الا الادى - ساراپشىلار جاۋابى

نۇر -سۇلتان. قازاقپارات - شەنگەن ايماعىنا ءۇشىنشى ەلدەر ازاماتتارىنىڭ كىرۋىنە ۋاقىتشا شەكتەۋ ەنگىزىلگەنىنە ءبىر جىلدان استى.

الايدا، سوڭعى كەزدە ب ا ق-تا ۆيزانىڭ قايتا بەرىلە باستالعانى تۋرالى حابارلامالار پايدا بولا باستادى. ساراپشىلار قازاقستاندىقتار شەنگەن ايماعىنا قاشان كىرۋى مۇمكىن ەكەنىنە قاتىستى پىكىرىمەن بولىسەدى.

«قازاقستاندىقتار ءۇشىن شەنگەن ايماعىنىڭ اشىلۋى قازاقستان مەن ەۋروپاداعى ەپيدەميولوگيالىق جاعدايعا بايلانىستى. جازدا ءبىز تۋريستىك اعىمنىڭ قالپىنا كەلۋىن كۇتپەيمىز، كۇزدە دە بۇل ماسەلە قالادى. ءبىز تەك ەۋروپا ەلدەرىنەن عانا ەمەس، دۇنيەجۇزىلىك دەنساۋلىق ساقتاۋ ۇيىمىنان دا شەشىم كۇتەمىز. قازىر ەلدەردە ۆاكسينالاۋ جۇرگىزىلۋدە، مۇمكىن وسىدان كەيىن ەلدەر اشىلادى. ءبىز قازىر كەيبىر ەل ۆاكسينا سالدىرعان تۋريستەر ءۇشىن شەكتەۋلەر مەن پ ت ر- سىناقتارىن الىپ تاستايتىنىن كورىپ وتىرمىز.

مىسالى، قازاقستاندىقتار مىسىرعا نەمەسە گرۋزياعا پ ت ر- تەست تاپسىرماي، ءبىراق ۆاكسينا سەرتيفيكاتى بولعان جاعدايدا بارا الادى. مۇنداي جۇيەنى ەۋروپا ەلدەرى دە ۇستانۋى مۇمكىن. ءبىراق بۇل ەرىكتى ۆاكسينالاۋ ەكەنىن ۇمىتپاڭىز، سوندىقتان تۋريستەرگە شەكارادان ءوتۋ ءۇشىن پتر- سىناعى تۇرىندە تاڭداۋ بەرىلۋى كەرەك»، - دەدى تۋراگەنتتىك ديرەكتورى ماكسيم بانين

سونىمەن قاتار، ۆيزا ورتالىعىنىڭ وكىلى ارمان سىدىقوۆ تۋريستەر شەنگەن ايماعىنا كىرۋ ءۇشىن شەكارالاردىڭ اشىلۋىن كۇتىپ وتىرعانىن اتاپ ءوتتى.

«قازىر تۋريستىك شەنگەن ۆيزالارى ءۇشىن قۇجاتتار قابىلدانبايدى. ءبىراق ەلشىلىكتەر ىسكەرلىك ساپارلار، مەديتسينالىق ساپارلار، وقۋ ءۇشىن ۆيزا بەرەدى. سۇرانىس جوعارى. ادامدار شەنگەن ايماعىنا ۆيزا قاشان بەرىلەتىنى، ۆيزا الۋدىڭ قانداي جولدارى بار ەكەنىن سۇراپ، ءجيى حابارلاسادى. مەديتسينالىق ۆيزالار مەديتسينالىق ورتالىقتىڭ نەمەسە كلينيكانىڭ شاقىرۋى بويىنشا بەرىلەدى. ولار ءوتىنىش بەرەدى، كلينيكا ەسەپشوت ۇسىنادى. سودان كەيىن ولار كلينيكاعا الدىن الا تولەم جاساپ، مەديتسينالىق تەكسەرۋدەن وتۋگە شاقىرۋ الادى»، - دەيدى ۆيزالىق ورتالىقتىڭ ديرەكتورى.

سونداي- اق Kaztengritravel.kz ءتىلشىسى ەلشىلىكتەرگە تىكەلەي جۇگىندى. گەرمانيا ەلشىلىگى قازىرگى ۋاقىتتا قازاقستاننان ساياحاتشىلارعا ارنالعان ۆيزالار كىرۋگە قويىلعان شەكتەۋلەردەن ەرەكشە جاعدايلاردا عانا بەرىلۋى مۇمكىن ەكەنىن حابارلادى.

«قازىرگى ۋاقىتتا قازاقستاننان شىعۋ تەك ەرەكشە جاعدايلاردا عانا مۇمكىن بولادى. مىندەتتى تۇردە قاتتى قاجەتتىلىك، ماڭىزدى جاعداي بولۋى كەرەك. گەرمانيانىڭ استاناداعى ەلشىلىگىندە، ارينە، ەگەر ساپار شۇعىل سەبەپتەر بويىنشا قاجەت بولسا، ۆيزا الۋ مۇمكىندىگى بار»، - دەپ ءتۇسىندىردى ەلشىلىكتەگىلەر.