قازاقستاندا «ياندەكس. تاكسيدىڭ» جۇمىسىن توقتاتۋ تۋرالى سوت شەشىمىنىڭ كۇشى جويىلدى

الماتى. قازاقپارات - بۇگىن اپەللياتسيالىق ساتىداعى سوتتا قازاقستاندا «ياندەكس. تاكسي» سەرۆيسىنىڭ جۇمىسىن توقتاتۋ تۋرالى سوت شەشىمىنىڭ كۇشى جويىلدى.

بۇل تۋرالى الماتى پروكۋراتۋراسى Instagram-داعى پاراقشاسىندا جازدى، دەپ حابارلايدى قازاقپارات.

وسىعان دەيىن الماتى قالاسىنىڭ ءبىرىنشى ساتىداعى سوتى «G-taxi « ج ش س- نىڭ تالاپ-ارىزى بويىنشا «ياندەكس. تاكسي» كومپانياسىن قازاقستان رەسپۋبليكاسىنىڭ اۋماعىندا تاكسيگە تاپسىرىس بەرۋ جۇيەسىنە بايلانىستى اقپاراتتىق قىزمەتتەر كورسەتۋىن توقتاتۋعا مىندەتتەگەن ەدى.

سوت ءىسى پاتەنتتىك داۋ-دامايعا قاتىستى بولدى. پروكۋراتۋرادان ءمالىم ەتكەندەي، ۆەدومستۆو اتالمىش سوت شەشىمىنە قاتىستى اپەللياتسيالىق شاعىم تۇسىرگەن. سەبەبى 100 مىڭعا جۋىق تاكسيست جۇمىسسىز قالۋى مۇمكىن ەدى.

«بۇگىن اپەللياتسيالىق ساتىداعى سوت القاسى ءىستى قايتا قارادى. پروكۋروردىڭ اپەللياتسيالىق ءوتىنىم حاتى بويىنشا سوت شەشىمىنىڭ كۇشىن جويىپ، «G-taxi « ج ش س- نىڭ تالابىن نەگىزسىز دەپ تاني وتىرىپ، جاڭا شەشىم شىعاردى»، - دەلىنگەن حابارلامادا.