قامشىبەك قوڭقابايەۆ وليمپياداداعى باستى قارسىلاسىن اتادى

نۇر-سۇلتان. قازاقپارات - توكيو وليمپياداسىندا قازاقستاننىڭ نامىسىن اسا اۋىر سالماقتا قورعايتىن قامشىبەك قوڭقابايەۆ باستى قارسىلاستارى تۋرالى پىكىر ءبىلدىردى، دەپ حابارلايدى قازاقپارات.

«بىرىنشىدەن، ءبىر عانا وزبەك بوكسشىسى ەمەس، ودان بولەك 15 قارسىلاس بار. سوندىقتان ءارقايسىسى وتە قاۋىپتى. قۇداي قالاسا، وليمپيادادا وزبەك بوكسشىسىمەن كەزدەسىپ جاتساق، بۇل جولى جەڭىسكە جەتەمىز دەگەن سەنىمىمىز بار. باس باپكەرىمىز عالىمبەك قالي ۇلى مەن جەكە باپكەرلەرىم بار. تاكتيكا دايىندادىق. بۇيىرتسا ەسەمدى قايتارامىن دەگەن ماقسات قويىپ وتىرمىن»، - دەدى سپورتشى.

ەسكە سالساق، دۋبايدا وتكەن ازيا چەمپيوناتىندا قامشىبەك قوڭقابايەۆ وزبەكستاندىق ەجەلگى قارسىلاسى ءباحادۇر جالولوۆپەن كەزدەسىپ، 0:5 ەسەبىمەن ۇتىلعان بولاتىن.

قامشىبەك قوڭقابايەۆ بۇل وليمپياداعا قازاقستاننىڭ تۋىن ۇستايتىن ەكى سپورتشىنىڭ ءبىرى ەكەنىن ايتۋ كەرەك.

بۇگىن توكيو وليمپياداسىنا باراتىن سپورتشىلارمەن كەزدەسكەن پرەزيدەنت قاسىم-جومارت توقايەۆ قازاقستان رەسپۋبليكاسىنىڭ مەملەكەتتىك تۋىن العاش رەت ەكى بىردەي تۋ ۇستاۋشىعا - جەڭىل اتلەتيكادان وليمپيادا چەمپيونى ولگا رىپاكوۆا مەن بوكستان الەم چەمپيوناتىنىڭ كۇمىس جۇلدەگەرى قامشىبەك قوڭقابايەۆقا تابىستادى.