ق ر پرەزيدەنتى كولونيادا جازاسىن وتەپ جاتقان ايەلگە راقىمشىلىق جاسادى

None
None
وسكەمەن. قازاقپارات - قازاقستان پرەزيدەنتى قاسىم-جومارت توقايەۆ شىعىس قازاقستانداعى كولونيادا جازاسىن وتەپ جاتقان ايەلگە راقىمشىلىق جاسادى، دەپ حابارلايدى قازاقپارات Polisia.kz سايتىنا سىلتەمە جاساپ.

مەملەكەت باسشىسى لاريسا انتونيۋكتىڭ راقىمشىلىق جاساۋ تۋرالى وتىنىشىنە قول قويدى، ەندى ايەل مەرزىمىنەن بۇرىن بوساتىلادى.

لاريسا انتونيۋك 2011-جىلى جۇبايىن ولتىرگەنى ءۇشىن سوتتالعان. ونى تۇركىمەنستان سوتى 21 جىلعا باس بوستاندىعىنان ايىرعان بولاتىن. تاعى 10 جىلى قالعان.

لاريسا بولاشاق جۇبايىمەن قازاقستاندا تانىسقان، كەيىن ءبىراز ۋاقىتتان سوڭ قارىم-قاتىناسىن زاڭداستىرعان.

ۇيلەنگەننەن كەيىن جاستار جىگىتتىڭ تۋعان جەرىنە - تۇرىكمەنستانعا كوشىپ بارادى.

سوتتالۋشىنىڭ ايتۋىنشا، كۇيەۋىنىڭ اتا-اناسى ونى بىردەن قابىلداماعان. كەيىن ول جۇبايىنىڭ ەسىرتكىگە تاۋەلدى ەكەنىن بىلگەن.

ەر ادام قارجىلىق قيىندىقتارعا تاپ بولىپ، وتباسى مۇشەلەرىنە قول كوتەرە باستاعان، ەسىرتكى الۋ ءۇشىن اقشا تالاپ ەتكەن.

لاريسا جۇمىستا جۇرگەندە بالالاردىڭ ءومىرى ءۇشىن ۇنەمى قورقىپ وتىراتىنىن ايتقان. الايدا ءبىر كۇنى كەزەكتى جانجال كەزىندە ول ءوزىن قورعايمىن دەپ كۇيەۋىن ءولتىرىپ الادى.

لاريسا جەرگىلىكتى كولونياعا قامالىپ، ءتورت بالاسى بالالار ۇيىنە جىبەرىلەدى. كەيىن ول قازاقستانعا قايتارىلادى، وندا وسكەمەننەن 200 شاقىرىم جەردەگى ايەلدەر كولونياسىندا جازاسىن وتەيدى.

لاريسانىڭ اپكەسى بالالاردى بالالار ۇيىنەن الىپ كەتىپ، قامقورلىعىنا الدى.

2020-جىلدىڭ مامىرىندا قىلمىستىق-اتقارۋ جۇيەسىنىڭ قىزمەتكەرلەرى وعان بالالارىمەن ۆيدەوقوڭىراۋ ارقىلى سويلەسۋگە مۇمكىندىك بەرەدى، ول سول كەزدە 10 جىلدا العاش رەت بالالارىن كوردى. سوتتالعان كەزدە بالاسى ەكى جاستا بولعان. وعان قامقورلىقتى ۇلكەن قىزى موينىنا الدى، قازىر ول كۇيەۋىمەن كىشكەنتايلارعا قارايدى، ءبارى ءبىر شاڭىراق استىندا تۇرادى.

«مەكەمە قىزمەتكەرلەرى قاجەتتى ماتەريالداردى ۋاقىتىلى جيناپ، جىبەردى. قازاقستان پرەزيدەنتى لاريسا انتونيۋككە راقىمشىلىق جاسادى. سوتتالۋشىنىڭ مەرزىمى 21 جىلدان 16 جىلعا قىسقارتىلدى. ول ءتيىستى قۇجاتپەن تانىستى. راقىمشىلىققا بايلانىستى ونىڭ رەسمي مەرزىمى 2021-جىلدىڭ شىلدەسىنىڭ سوڭىندا اياقتالادى. لاريسا جازاسىن وتەۋ كەزىندە ءوزىن جاقسى جاعىنان كورسەتتى. تىگىن سەحىندا جۇمىس ىستەيدى. بارلىق مادەني ءىس-شارالارعا بەلسەندى قاتىسادى»، - دەپ حابارلادى ش ق و بويىنشا قىلمىستىق-اتقارۋ جۇيەسى دەپارتامەنتىنىڭ باسشىسى جانبولات قالەتايەۆ.

سوڭعى جاڭالىقتار