نۇر-سۇلتاندا بيىل قانشا جاڭا مەكتەپ سالىنادى؟
بۇل تۋرالى نۇر-سۇلتان قالاسىنىڭ اكىمى التاي كولگىنوۆ ايتىپ بەردى، دەپ حابارلايدى قازاقپارات ءتىلشىسى.
«نۇر-سۇلتاندا قالا تۇرعىندارىنىڭ جىل سايىنعى ءوسۋى ەسكەرىلە وتىرىپ، ءىرى مەكتەپتەر سالىنىپ جاتىر. بيىل 15 مەكتەپ سالىنادى، وسىلايشا 40 مىڭنان استام وقۋشىعا جاڭا ورىن بولادى. بۇل 2020-جىلمەن سالىستىرعاندا ەكى ەسە، ال 2019-جىلعى كورسەتكىشتەن ءتورت ەسە كوپ»، - دەدى ا. كولگىنوۆ ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.
اكىمنىڭ ايتۋىنشا، ەلوردادا جىل سايىن ىشكى كوشى-قون ەسەبىنەن دە، تۋۋ كورسەتكىشى ەسەبىنەن دە قالا تۇرعىندارىنىڭ سانى ءوسىپ كەلەدى. مىسالى، 2010-جىلى قالا مەكتەپتەرىندە 74 مىڭ وقۋشى ءبىلىم السا، قازىر 193 مىڭ وقۋشى بار. جىل سايىن ءبىرىنشى سىنىپ وقۋشىلارىنىڭ دا سانى ءوسىپ كەلەدى.
«مىسالى، 2019-جىلى 5,5 مىڭنان استام تۇلەك مەكتەپ بىتىرسە، ءبىرىنشى سىنىپقا 24,5 مىڭعا جۋىق بالا كەلدى. ال 2020-جىلى - 6,6 مىڭ تۇلەك بولسا، ءبىرىنشى سىنىپقا 21 مىڭنان استام بالا كەلدى. 2030-جىلعا قاراي - نۇر-سۇلتاندا 400 مىڭعا جۋىق وقۋشى بولادى دەپ بولجاپ وتىرمىز. ارينە، بۇل تاماشا كورسەتكىش، تيىسىنشە مەكتەپتەردىڭ كوبىرەك اشىلۋىن تالاپ ەتەدى. ءبىز ءىرى مەكتەپتەردىڭ قۇرىلىسىنا كوشتىك. ءبىلىم مەكەمەلەرى قالانىڭ بارلىق اۋدانىندا، سونىڭ ىشىندە تۇرعىن ءۇي ماسسيۆتەرىندە سالىنىپ جاتىر. قاجەتتىلىگى بار اۋداندارعا ەرەكشە نازار اۋدارىلادى»، - دەدى ەلوردا اكىمى التاي كولگىنوۆ.
الداعى بەس جىلعا ەلوردادا 67 مەكتەپ قۇرىلىسى جوسپارلانىپ وتىر. مەكتەپ قۇرىلىسى جەكە ينۆەستيتسيالاردى تارتۋ ەسەبىنەن دە جۇرگىزىلۋدە. ەلوردا اكىمىنىڭ تاپسىرماسىمەن بولاشاق پەداگوگتاردى ىنتالاندىرۋ ماقساتىندا گرانت سانى ۇلعايتىلدى.
جىل سايىن ورتا ارناۋلى وقۋ ورىندارىنا كەمىندە 800 گرانت، ال جوعارى ءبىلىم الۋعا تاعى 300 گرانت ءبولۋ جوسپارلانىپ وتىر.