كاسىپكەرلەر قانداي جاعدايدا كوپوراتيۆتىك تابىس سالىعىنان بوساتىلادى

نۇر- سۇلتان. قازاقپارات - ۇلتتىق ەكونومكا مينيسترلىگى سالىق زاڭناماسىنا ەنگىزىلگەن تۇزەتۋلەردىڭ ارتىقشىلىقتارىن اتادى، دەپ حابارلايدى قازاقپارات.

24 -ماۋسىمدا «سالىق جانە بيۋدجەتكە تولەنەتىن باسقا دا مىندەتتى تولەمدەر تۋرالى» قازاقستان رەسپۋبليكاسىنىڭ كودەكسىنە جانە «سالىق جانە بيۋدجەتكە تولەنەتىن باسقا دا مىندەتتى تولەمدەر تۋرالى» قازاقستان رەسپۋبليكاسىنىڭ كودەكسىن قولدانىسقا ەنگىزۋ تۋرالى» زاڭعا وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسىنىڭ زاڭىنا قول قويعان بولاتىن. ۇلتتىق ەكونوميكا مينيسترلىگىنىڭ باسپا ءسوز قىزمەتى تاراتقان مالىمەتكە سۇيەنسەك، زاڭدا پاندەميادان تۋىنداعان شەكتەۋ شارالارى كەزەڭىندە بيزنەستى قولداۋعا، سالىق مىندەتتەمەلەرىنىڭ ورىندالۋىن جەڭىلدەتۋگە جانە ىسكەرلىك بەلسەندىلىكتى ىنتالاندىرۋعا باعىتتالعان وزگەرىستەر بار.

«جاڭا تىركەلگەن بيزنەس كاسىپورىندارى ءۇشىن ءوز ونىمدەرىن وتكىزۋ كەزىندە قوسىلعان قۇن سالىقتى %70 عا تومەندەتۋ سياقتى سالىق جەڭىلدىكتەرى كوزدەلگەن. بۇل جەڭىلدىك زاڭدى تۇلعا تىركەلگەن ساتتەن باستاپ ەكى جىل بويى قولدانۋعا بولادى»، - دەپ جازىلعان رەسمي مالىمەتتە.

ال وندەۋ ونەركاسىبىندەگى شاعىن بيزنەس نىساندارىن جاڭا نەگىزگى قورلارعا قايتا ينۆەستيتسيالانعان جاعدايدا الىنعان تابىستان كورپوراتيۆتىك تابىس سالىعىنان بوساتۋ كوزدەلگەن. بۇل ينۆەستيتسيالىق احۋالدى جاقسارتۋعا جانە وڭدەۋ ونەركاسىبىن دامىتۋعا مۇمكىندىك بەرەدى دەگەن بولجام بار.

«سونداي- اق، زاڭدا پاندەمياعا بايلانىستى تەكسەرۋ مەن ەمدەۋدى قوسا العاندا، سانيتاريالىق- ەپيدەميولوگيالىق، سانيتاريالىق- پروفيلاكتيكالىق ءىس- شارالاردى ۇيىمداستىرۋعا جانە جۇرگىزۋگە جۇمىس بەرۋشىنىڭ شىعىنى بويىنشا قىزمەتكەردى تابىس سالىعىنان بوساتاتىن نورمالار بار. جاڭا ەنگىزىلىمدەردىڭ ءبىرى موبيلدىك قوسىمشانى پايدالانۋ ارقىلى ارنايى سالىق رەجيمىن ەنگىزۋ بولىپ تابىلادى. ول سالىق تولەۋشىنىڭ قىزمەتىن تىركەۋدى، توقتاتۋىن جانە سالىق مىندەتتەمەلەرىن ورىنداۋىن جەڭىلدەتۋگە مۇمكىندىك بەرەدى»، - دەلىنگەن مينيسترلىكتىڭ مالىمەتىندە.