مينيستر دوكتورانتۋرا ەمتيحاندارى قايدا ءوتۋى ءتيىس ەكەنىن ايتتى
بۇل تۋرالى ق ر ءبىلىم جانە عىلىم ءمينيسترى اسحات ايماعامبەتوۆ ايتتى، دەپ حابارلايدى قازاقپارات ءتىلشىسى.
«بۇل ماسەلەنى بىرنەشە رەت تالقىلادىق. جوعارى وقۋ ورىندارى ماسەلەنى بىلەدى دەپ ويلايمىن. وزدەرىڭىز بىلەسىزدەر، بيىل دوكتورانتۋراعا قابىلداۋدى ەلەكتروندى فورماتقا كوشىرىپ جاتىرمىز. ماگيستراتۋرا بويىنشا وتكەن جىلى پيلوتتىق فورماتتا ءبىرىنشى رەت ەلەكتروندى تۇردە وتكىزگەن ەدىك. بيىل ماگيستراتۋراعا قابىلداۋ وسى فورماتتا جالعاساتىن بولادى.
ال دوكتورانتۋراعا قابىلداۋ العاش رەت ەلەكتروندى فورماتتا وتەدى. بۇل، ەڭ باستىسى، اكادەميالىق ادالدىق قاعيداتتارىن ساقتاۋعا باعىتتالعان. سوندىقتان جەرگىلىكتى باقىلاۋ دەپارتامەنتتەرى وسى جۇمىستى قامتاماسىز ەتسىن. ارينە، ەمتيحاندار وبلىس ورتالىقتارىندا ورنالاسقان تەستىلەۋ پۋنكتەرىندە عانا ءوتۋى كەرەك. وسى پۋنكتەردە عانا تەستىلەۋدى ۇيىمداستىراتىن بولامىز»، - دەدى اسحات ايماعامبەتوۆ مينيسترلىكتىڭ اپپارات جينالىسىندا.
ايتا كەتەيىك، قازىرگى ۋاقىتتا ماگيستۋراتۋرا جانە دوكتورانتۋراعا قۇجاتتار ۇلتتىق تەستىلەۋ ورتالىعىنىڭ اقپاراتتىق جۇيەسى ارقىلى قابىلدانىپ جاتىر.
ماگيستراتۋراعا كەشەندى تەستىلەۋ 20-شىلدەدەن 10-تامىزعا دەيىن جالعاسادى. ال دوكتورانتۋراعا ءتۇسۋ ەمتيحانى 4-20-تامىز ارالىعىندا وتەدى.
اۆتور: مارلان جيەمباي