قازاقستان جانە تۇرىكمەنستان پرەزيدەنتتەرى تەلەفون ارقىلى سويلەستى
قازاقپارات بۇل تۋرالى اقورداعا سىلتەمە جاساپ حابارلايدى.
مەملەكەت باسشىلارى دوستىققا، تاتۋ كورشىلىككە جانە ستراتەگيالىق سەرىكتەستىككە نەگىزدەلگەن قازاق- تۇرىكمەن قاتىناستارىنىڭ مىزعىماس سيپاتىن ناقتىلاپ، ەكىجاقتى ىقپالداستىقتىڭ اۋقىمدى ماسەلەلەرىن تالقىلادى.
گۋربانگۋلى بەردىمۇحامەدوۆ جان-جاقتى ىنتىماقتاستىققا تىڭ سەرپىن بەرۋ ماقساتىمەن قاسىم- جومارت توقايەۆتى بيىل تۇرىكمەنستانعا رەسمي ساپارمەن كەلۋگە شاقىردى. اتالعان ساپار اياسىندا ءبىرقاتار ماڭىزدى كەلىسىمدەرگە قول قويىلماق.
مەملەكەت باسشىسى شاقىرۋدى قابىل الدى جانە بيىل كۇزدە اشحابادتا وتەتىن VI كاسپيي سامميتىنە قاتىسۋعا دايىن ەكەنىن جەتكىزدى.
سونىمەن قاتار تاراپتار وڭىرلىك ىقپالداستىقتى جانداندىرۋعا، ورتالىق ازياداعى تۇراقتىلىق پەن قاۋىپسىزدىكتى قامتاماسىز ەتۋگە قاتىستى الداعى ۇجىمدىق شارالار جايىندا پىكىر الماستى.
قاسىم- جومارت توقايەۆ ورتالىق ازيا مەملەكەتتەرى باسشىلارىنىڭ كەزەكتى كونسۋلتاتيۆتىك كەزدەسۋىن تۇرىكمەنستاندا وتكىزۋ جونىندەگى گۋربانگۋلى بەردىمۇحامەدوۆتىڭ ۇسىنىسىن قولدادى.
قاسىم- جومارت توقايەۆ گۋربانگۋلى بەردىمۇحامەدوۆتى تۋعان كۇنىمەن قۇتتىقتاپ، ونىڭ باۋىرلاس تۇرىكمەنستاندى وركەندەتۋ جولىنداعى اسا جاۋاپتى مەملەكەتتىك قىزمەتىنە تابىس تىلەدى.