كوروناۆيرۋس: الماتىدا «ءۇندى» شتامى بار ناۋقاستار قالاي ەمدەلىپ جاتىر؟

الماتى. قازاقپارات- الماتىدا كوروناۆيرۋستىڭ جاڭا «ءۇندى» شتامى بار پاتسيەنتتەر قالاي ەمدەلىپ جاتىر.

بۇل تۋرالى ونلاين-بريفينگ بارىسىندا الماتى قالاسى قوعامدىق دەنساۋلىق باسقارماسىنىڭ باسشىسى ناريمان تابىنبايەۆ ايتتى، دەپ حابارلايدى قازاقپارات ءتىلشىسى.

كوروناۆيرۋستىڭ «ءۇندى» شتامىمەن اۋىرعاندا ۇزاق ۋاقىت بويى تەمپەراتۋرا تۇسپەيدى. ناۋقاستىڭ ەستۋ قابىلەتى جوعالۋى مۇمكىن. بۇگىنگى تاڭدا ناۋقاستاردى ەمدەۋ بۇرىنعىداي ءجۇرىپ جاتىر. دەنساۋلىق ساقتاۋ مينيسترلىگى ەمدەۋدىڭ ارنايى حاتتاماسىن بەكىتكەن جوق»، - دەپ اتاپ ءوتتى قالالىق دەنساۋلىق ساقتاۋ باسقارماسىنىڭ باسشىسى.

ەستەرىڭىزگە سالا كەتەيىك، بۇعان دەيىن جانداربەك بەكشيننىڭ ورىنباسارى ءسادۋاقاس بايعابىلوۆ الماتىدا كوروناۆيرۋستىڭ ءۇندى شتامى اينالىمىنىڭ ىقتيمالدىعىن انىقتاعانىن ايتقان بولاتىن.

قالانىڭ باس سانيتارلىق دارىگەرى اتاپ وتكەندەي، ۆيرۋس جۇقتىرعاندار سانىنىڭ كۇرت وسۋىنە بايلانىستى مۋتاتسياعا ۇشىراعان شتامدارعا زەرتتەۋلەر جۇرگىزىلدى.

«ناتيجەسىندە ك ۆ ي ناۋقاستارىنان الىنعان 131 ۇلگىنىڭ 77 ءسى «الفا» - بريتاندىق شتامدار جانە 46 ۇلگىدە «دەلتا» - ءۇندى شتامدارى انىقتالدى. سونىمەن قاتار، ەكى «گامما» - وڭتۇستىك افريكا شتامدارى جانە نيۋ-يوركتىك ءبىر «بەتتا» شتاممى تىركەلدى»، - دەپ ناقتىلادى ج. بەكشين.

2021-جىلدىڭ 26- ماۋسىمىنان باستاپ الماتى «قىزىل» ايماققا كىردى. مەگاپوليستەگى ەپيدەميولوگيالىق جاعداي «دەلتا» شتامىنىڭ تارالۋىنا بايلانىستى قيىندادى. قالانىڭ باس سانيتارلىق دارىگەرى كوروناۆيرۋستىڭ ءتورتىنشى تولقىنىنىڭ پايدا بولۋى مۇمكىن ەكەنىن مالىمدەدى.