التايدا كوشى-قون مادەنيەتى مەرەكەسى ءوتتى - شەتەلدەگى قازاق ءتىلدى ب ا ق-قا شولۋ

نۇر-سۇلتان. قازاقپارات - «قازاقپارات» ح ا ا ادەتتەگىدەي شەتەلدە قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.

تۇركى الەمى تۋريزمىنىڭ كارتاسى جاسالادى - «ءوزا» اقپارات اگەنتتىگى

24-ماۋسىمدا ەجەلگى قولونەرشىلەر قالاسى قوقاندا (وزبەكستان) تۇركى كەڭەسىنىڭ تۋريزم مينيسترلەرىنىڭ قاتىسۋىمەن VI- شى وتىرىس ءوتىپ، وندا تۇركى الەمى تۋريزمىنىڭ كارتاسىن جاساۋ تۋرالى كەلىسىم جاسالدى، دەپ حابارلايدى وزبەكستاننىڭ «ءوزا» اگەنتتىگى. بۇل كارتادا تۇركى مەملەكەتتەرىندەگى نەگىزگى تاريحي، مادەني جانە تۋريستىك باعىتتار قامتىلماق. سونىمەن قاتار، تۇركى الەمىنىڭ تۋريستىك كارتاسى تۇرىك كەڭەسىنە مۇشە ەلدەردىڭ نەگىزگى تۋريستىك باعىتتارىن انىقتايتىن ەتالوندىق جوبا بولادى دەپ كۇتىلۋدە. وسى كەزدەسۋدە تۇركى كەڭەسىنىڭ تۋريزم مينيسترلەرى ەكى مىڭ جىلدىق تاريحى بار قوقان قالاسىن تۇركى كەڭەسىنىڭ العاشقى تۋريزم استاناسى دەپ جاريالاعان.

التايدا كوشى-قون مادەنيەت مەرەكەسى ءوتتى - «اعاجاي- التاي»

2021 -جىلعى «التاي قويى جانە كوشى- قون مادەنيەت مەرەكەسى» مادەني- سپورتتىق ءىس- شاراسى التايدىڭ بۋرىلتوعاي اۋدانى، ساربۇلاق قالاشىعىندا سالتاناتپەن اشىلدى، دەپ حابارلايدى قىتايدىڭ «اعاجاي- التاي» اقپارات پورتالى.

اتالعان ب ا ق-تىڭ كەلتىرگەن دەرەگىنە سۇيەنسەك، مەرەكە بارىسىندا اقىندار ايتىسى، قازاقشا كۇرەس، قول كۇرەسى، بۇقاشا تارتىس جانە قوي قىرقۋ، كيىز باسۋ، سىرماق تىگۋ مەن ۇرشىق ءيىرۋ سىندى قازاقتىڭ سان ءتۇرلى ءداستۇرىن قامتىعان ءىس- شارالار ءوتتى.

وسى ارقىلى كوپشىلىكتى كوشپەلى قازاقتىڭ مادەنيەتىمەن تانىستىردى.

ايتا كەتەرلىگى، قىتايدىڭ بۋرىلتوعاي اۋدانىندا قازاقتىڭ ءداستۇرلى كوشى-قون مادەنيەتى بۇگىنگە دەيىن ساقتالىپ كەلەدى. قازاق باقتاشىلارىنىڭ كوكتەم، جاز، كۇز ماۋسىمدارىندا مىڭعىرعان مالىن ايداپ، تۇيەمەن كوشۋى كوپتەگەن تۋريستى قىزىقتىرادى.

وسى جولعى شارادا بۋرىلتوعاي اۋدانى وڭىرلىك تۋريزمدى دامىتۋ ءۇشىن «كوشى- قون مادەنيەتىنىڭ فوتو- سۋرەت كورمەسى» اتتى ءىس-شارانى دا وتكىزگەن. بۇل جولعى كوشى- قون مادەنيەتمەرەكەسى وتكەن وڭىردە التاي ايماعىنداعى ەڭ ۇزاق، ەڭ كولەمدى كوش جولى بار ەكەن.

«ماۋسىمدىق كوشى- قوندا مالشىلار مالىن ايداپ، كيىز ءۇي مەن تۇرمىستىق بۇيىمدارىن تۇيەگە ارتىپ، ساربۇلاقتان جايلاۋعا كوشكەندە ەرەكشە كورىنىس قالىپتاسادى. بۋرىلتوعاي اۋدانىنىڭ جىرا شاتقالى - ساربۇلاق - قىزىلتاۋ كوش جولى التاي ايماعىنداعى، ءتىپتى قىتايداعى ەڭ ۇزاق، كولەمى ەڭ ۇلكەن كوشى- قون مادەنيەتى تولىق ساقتالعان كوش جولى. وڭتۇستىكتەن سولتۇستىككە دەيىن 480 شاقىرىمعا جەتىپ «مىڭ شاقىرىمدىق كوشى- قون» جولى دەپ اتالىپ كەتكەن»، - دەپ جازادى altxw.com.

بايان-ولگەي ايماعى اكىمدىگىندە جاڭا كادرلىق تاعايىنداۋلار بولدى - Kaznews

ايماق اكىمىنىڭ وكىمىمەن بايان-ولگەي ايماعى اكىمىنىڭ ءىس باسقارماسىنىڭ باسشىسى بولىپ مۇحامەد بولاي ۇلى تاعايىندالدى. سونداي- اق، ايماق اكىمىنىڭ ءىس باسقارماسىنىڭ باسشىسىنىڭ قاۋلىسىمەن قارجى جانە مەملەكەتتىك قازىنا دەپارمەنتىنىڭ باسشىلىعىنا فەستيۆال تەكەناي ۇلى تاعايىندالدى، دەپ حابارلايدى موڭعوليالىق Kaznews باسىلىمى.

ايتا كەتەيىك، مۇحامەد بولاي ۇلى بۇعان دەيىن ايماقتىق ماماندىق باقىلاۋ باسقارماسىنىڭ باسشىسى قىزمەتىن، فەستيۆال تەكەناي ۇلى ايماقتىق سالىق دەپارتمەنتىنىڭ باسشىسى لاۋازىمىن اتقارىپ كەلگەن.

نۇر-سۇلتاندا سيريا كەلىسسوزدەرىنىڭ جاڭا كەزەڭى وتەدى - Parstoday

يراننىڭ Parstoday اقپارات اگەنتىگىندە وسىنداي تاقىرىپتا اقپارات جارىق كوردى. سيريا تۋرالى «استانا پروتسەسى» كەلىسسوزدەرىنىڭ 16-شى كەزەڭى 7-8-شىلدە ارالىعىندا قازاقستاننىڭ استاناسى نۇر- سۇلتان قالاسىندا وتەدى، دەپ جازدى يراندىق ب ا ق. Parstoday-دىڭ كەلتىرگەن دەرەگىنە سۇيەنسەك، قازاقستان سىرتقى ىستەر مينيسترلىگى كەلىسسوزدەرگە سيريادا بەيبىتشىلىككە كەپىلدىك بەرەتىن ي ي ر، رەسەي مەن تۇركيا دەلەگاتسيالارى، سونداي-اق سيريا ۇكىمەتى مەن بۇل ەلدىڭ قارۋلى وپپوزيتسياسىنىڭ قاتىساتىنىن مالىمدەگەن.

«بۇل كەلىسسوزدەرگە بۇۇ، يوردانيا، ليۆان جانە يراكتىڭ وكىلدەرى باقىلاۋشى رەتىندە قاتىسادى. سيرياداعى ەكونوميكالىق، الەۋمەتتىك، دەنساۋلىق ساقتاۋ جانە ەپيدەميولوگيالىق احۋال، بۇل ەلگە حالىقارالىق گۋمانيتارلىق كومەك كورسەتۋ، كەپىلگە الىنعان ادامداردى بوساتۋ جانە ءىز- ءتۇزسىز جوعالعان ادامداردى ىزدەۋ - كەلىسسوزدەردىڭ نەگىزگى تاقىرىپتارى»، - دەپ جازادى يراندىق ب ا ق.

TRT- نىڭ قازاقستانداعى تىلشىلەرىنە ماراپات - TRT

28-ماۋسىم كۇنى قازاقستاندا اتاپ وتىلەتىن بۇقارالىق اقپارات قۇرالدارى قىزمەتكەرلەرىنىڭ مەرەكەسى اياسىندا ەلدىڭ ۇزدىك جۋرناليستەرى مەن باسپا ءسوز وكىلدەرى ماراپاتتالدى. بۇل تۋرالى وسى اپتادا تۇركيا راديو تەلەۆيزيا پورتالى حابارلادى.

تۇركيالىق ب ا ق- تىڭ دەرەگىنە سۇيەنسەك، ق ر ۇلتتىق مۋزەيى ت ر ت قازاقستان وكىلدىگىنىڭ توبىن دا قازاقستانداعى كورنەكتى جانە ۇلگىلى جۇمىستارى ءۇشىن ماراپاتتاعان. اتالعان ماراپاتتاۋ شاراسى جۋرناليستەر كۇنىنە وراي قازاقستاننىڭ ۇلتتىق مۋزەيىندە وتكەن. قازاقستان ۇلتتىق مۇراجايىنىڭ ديرەكتورى ارىستانبەك مۇحامەدي ۇلى قيىن ەپيدەميالىق جاعدايلاردا ءوز مىندەتتەرىن ورىنداۋعا كۇش سالعان باسپا ءسوز وكىلدەرىنە العىسىن جەتكىزگەن.

«قازاقستانداعى ترت توبى دا ماراپاتتالعان باسپا ءسوز مۇشەلەرىنىڭ قاتارىندا بولدى. TRT قازاقستان وكىلدىگىنىڭ توبى قازاقستاننىڭ مادەني قۇندىلىقتارىن جانە تۇركى الەمىنىڭ الەمدىك مۇرا بولىپ تابىلاتىن رۋحاني قۇندىلىقتارىن ناسيحاتتاعانى ءۇشىن ماراپاتتالدى»، دەپ جازادى تۇركيا راديو تەليەۆيزيا پورتالى.

اۆتور: بەيسەن سۇلتان ۇلى