الماتىداعى ازىق-تۇلىك باعاسىنا قاتىستى قالا اكىمى پىكىر ءبىلدىردى
«بىلتىر ءبىز اينالىمدىق سحەمانى ىسكە قوسقان بولاتىنبىز. ول بويىنشا ءىرى ساۋدا ورتالىقتارى مەن وندىرۋشىلەرگە جەڭىلدەتىلگەن نەسيە بولەمىز. وسى نەسيەنى الا وتىرىپ ولار الەۋمەتتىك ماڭىزى بار ازىق- تۇلىك باعاسىن كوتەرمەۋگە مىندەتتەمە الادى. وسىلايشا باعانىڭ كۇرت ءوسۋىن بولدىرمايمىز»، - دەدى ورتالىق كوممۋنيكاتسيالار قىزمەتىندە وتكەن بريفينگىدە قالا اكىمى باقىتجان ساعىنتايەۆ.
اكىم سورەلەردەگى كارتوپ پەن ءسابىز باعاسىن رەتتەۋ ءۇشىن وڭتۇستىك وڭىرلەرمەن تىعىز جۇمىس جاسالىپ جاتقانىن اتادى.
«ءيا، ماۋسىم ارالىعىندا كارتوپ، ءسابىز، قىرىققابات سياقتى ونىمدەردىڭ باعاسى قىمباتتاپ كەتتى. قازىر ءبىز تۇركىستان وبلىسىمەن بارلىق ازىق- تۇلىك ءتۇرىن جەتكىزۋ بويىنشا كەلىسىم جاسادىق. قانت بويىنشا بىلتىردان بەرى الماتى وبلىسىنداعى اقسۋ زاۋىتىمەن جۇمىس ىستەپ كەلەمىز. كەلىسىمشارتتا كورسەتىلگەن باعا قازىر بىزگە وزگە جەتكىزۋشىلەر ۇسىنىپ جاتقان باعادان تومەن ەكەنىن ايتۋ كەرەك. وسى شارالاردىڭ ءبارى قازىر بىزگە قاجەتتى ازىق- تۇلىك باعاسىن قىمباتتاتپاي ۇستاۋعا مۇمكىندىك بەرىپ وتىر. سونداي- اق، قازىر تاجىكستانمەن تىكەلەي جۇمىس ىستەپ جاتىرمىز. قالالىق بيزنەس ءتۇرلى ونىمدەر جەتكىزۋ بويىنشا تىكەلەي بايلانىس ورناتىپ، دەلەگاتسيالار الماستى. تاجىكستاننان العاشقى كولەم كەلىپ جاتىر»، - دەدى باقىتجان ساعىنتايەۆ.
قالا اكىمى بۇل ىستە ىرگەدەگى الماتى وبلىسىنىڭ الەۋەتى تولىق پايدالانىلماي جاتقانىنا توقتالدى.
ت«الماتى وبلىسىنىڭ اكىمىمەن كەزدەسكەن كەزدە دە ايتقانمىن، ءبىز جىلىنا 1 ميلليون توننا ازىق- تۇلىك تۇتىنامىز. الماتى وبلىسى وسى كولەممەن ءبىزدى قامتۋعا تولىقتاي جۇمىس ىستەي الادى. قازىر ءىشىنارا 1 ميلليون توننا دەگەن - وتە ۇلكەن نارىق. اتالمىش ولكەدەگى وسى اقىلى شارۋالارعا دا قولداۋ كورسەتكەن بولار ەدىك. قازىر ءىشىنارا تۇركىستان جانە الماتى وبلىستارىمەن جۇمىس ىستەپ جاتىرمىز. كارتوپتى قازىر پاۆلودار وبلىسىنان الىپ وتىرمىز. ەكىنشى ارالىق ماۋسىمعا دايىندىق بارىسىندا 22 ميلليارد تەڭگەگە فورۆاردتىق كەلىسىمشارت جاساپ قويدىق. بۇل ماقساتقا بيۋدجەتتەن جەتكىلىكتى قاراجات ءبولىنىپ وتىر»، - دەدى اكىم.
ونىڭ سوزىنە قاراعاندا، قالانىڭ بارلىق بازارلارىندا الەۋمەتتىك ازىق- تۇلىك دۇڭگىرشەكتەرى اشىلعان. ونداعى باعا باسقا وزگە ساۋدا نۇكتەلەرىنە قاراعاندا 30-50 پايىز تومەن.
«ءتىپتى سول بازارداعى ىرگەلەس سورەلەردىڭ ءوزى سوعان قاراپ، باعانى ءتۇسىرىپ جاتىر. جۇمىرتقا باعاسىنا دا شەكتى باعا بەكىتتىك. ەندى قىرىققاباتتىڭ باعاسىن دا بەكىتپەكشىمىز»، - دەدى قالا باسشىسى.
اۆتور: ەسىمجان ناقتىباي