كارانتين: ەلوردا ماڭىنداعى اۋدانداردا قوسىمشا شەكتەۋلەر ەنگىزىلەدى

كوكشەتاۋ. قازاقپارات - اقمولا وبلىسىنىڭ باس مەملەكەتتىك سانيتارلىق دارىگەرى ايناگۇل مۋسينا جۋرناليستەرمەن وتكىزگەن بريفينگتە ەلوردا ماڭىنداعى اۋدانداردىڭ تۇرعىندارىن قانداي وزگەرىستەر كۇتىپ تۇرعانىن مالىمدەدى، دەپ حابارلايدى قازاقپارات ءتىلشىسى.

ا. مۋسينانىڭ ايتۋىنشا، قازىرگى ۋاقىتتا اقمولا وبلىسىندا كوروناۆيرۋستىق ينفەكتسيامەن سىرقاتتانۋشىلىق بويىنشا ەپيدەميولوگيالىق جاعداي سالىستىرمالى تۇردە تۇراقتى.

15 - ماۋسىمنان باستاپ ءوڭىر «جاسىل» ايماقتا ورنالاسقان. سوڭعى اپتادا تىركەلگەن جاعدايلاردىڭ سانى 1,2 ەسە ازايدى. ياعني، 295 تەن 246 عا دەيىن، بۇل 50 جاعدايعا از. «تاۋلىگىنە 40 جاڭا COVID-19 جاعدايى تىركەلەدى. الايدا، بۇگىنگى تاڭدا قوستاناي، پاۆلودار وبلىستارىمەن شەكتەسەتىن اۋدانداردا COVID-19 جۇقتىرعاندار سانىنىڭ ءوسۋى بايقالادى. سونىمەن قاتار، كوروناۆيرۋستىق ينفەكتسيانىڭ تارالۋ قارقىنى بويىنشا ءالى دە «قىزىل» ايماقتا تۇرعان نۇر-سۇلتان قالاسىنان حالىقتىڭ قاتىناۋى ساقتىقتى جانە ەپيدەميولوگيالىق جاعدايدىڭ ناشارلاۋىنان قورعانۋدى تالاپ ەتەدى»، - دەپ اتاپ ءوتتى ول.

بريفينگتە ايتىلعانداي، ەلوردا ماڭىنداعى اۋدانداردا وبلىستىڭ باسقا وڭىرلەرىمەن سالىستىرعاندا ۆيرۋستىڭ تارالۋ دەڭگەيى جوعارى. ماسەلەن، ماۋسىم ايىندا ارشالى اۋدانىندا - 83، سەلينوگراد اۋدانىندا - 90، اقكول اۋدانىندا - 40، شورتاندى اۋدانىندا - 24 جاعداي تىركەلگەن. ءوڭىردىڭ باس مەملەكەتتىك سانيتارلىق دارىگەرىنىڭ ايتۋىنشا، 27- ماۋسىمنان باستاپ جاڭا قاۋلىمەن اقمولا وبلىسىنىڭ ءتورت استانالىق ءوڭىرى - سەلينوگراد، شورتاندى، اقكول جانە ارشالى اۋداندارى ءۇشىن قوسىمشا شەكتەۋ كارانتيندىك شارالارى ەنگىزىلەدى.

سونىمەن، بۇل اۋداندار ءۇشىن نە وزگەرەدى؟ ساۋدا-ويىن-ساۋىق ورتالىقتارى، ساۋدا ۇيلەرى، ساۋدا ورتالىقتارى، ازىق-تۇلىك ەمەس دۇكەندەر 27- ماۋسىمنان باستاپ ساعات 10 نان 22 گە دەيىن جۇمىس ىستەيدى.

«Ashyq» جوباسىنا قاتىساتىن نىسانداردى قوسپاعاندا، بالالار ويىن الاڭدارى مەن اتتراكتسيوندارىنىڭ قىزمەتىنە تىيىم سالىنادى. ءدامحانا، مەيرامحانالار، دۇكەندەر جانىنداعى بارلار جانە ت. ب. ۇلگىدەگى قوعامدىق تاماقتانۋ نىساندارى (ءۇي-جايدا) 50 پايىزعا دەيىن تولتىرىلعان جاعدايدا، ساعات 07:00 دەن 20:00 گە دەيىن جۇمىس رەجيمى بار 50 ورىننان اسپايتىن جاعدايدا جۇمىس ىستەيتىن بولادى.

20:00 دەن 07:00 گە دەيىن وسى نىسانداردىڭ ءونىمدى جەتكىزۋگە وتكىزۋىنە عانا جول بەرىلەدى. سەنبى جانە جەكسەنبى كۇندەرى فيتنەس-ورتالىقتار، يوگا-ورتالىقتار، جاتتىعۋ زالدارى مەن سپورتتىق-ساۋىقتىرۋ ورتالىقتارى، باسسەيندەر، جابىق ازىق-تۇلىك ەمەس بازارلار جۇمىسىن توقتاتادى.

سەنبى كۇنى قازپوشتا دا، ح ق ك و دا جۇمىس ىستەمەيدى. جەكسەنبى كۇندەرى قوعامدىق كولىك جۇمىسىن توقتاتادى (بار بولسا). ەگەر ۇيىمنىڭ شتات كەستەسىندە 20 دان استام قىزمەتكەر بولسا، ولاردىڭ كەمىندە 80 پايىزى قاشىقتىقتان جۇمىس ىستەۋگە كوشۋى كەرەك. سونىمەن بىرگە، ا. مۋسينا اقمولالىقتاردى بارلىق كارانتيندىك شارالاردى ساقتاۋعا شاقىردى جانە ولار ساقتالماعان جاعدايدا وڭىردەگى جاعداي كەز كەلگەن ۋاقىتتا ناشار جاققا وزگەرۋى مۇمكىن ەكەنىن ەسكە سالدى.