نۇر-سۇلتاندا كوروناۆيرۋس ۆاكسيناسىن العىسى كەلەتىندەر قاتارى كۇرت ارتتى

نۇر-سۇلتان. قازاقپارات - ەلوردادا كوروناۆيرۋسقا قارسى ۆاكسينا العىسى كەلەتىندەردىڭ قاتارى كۇن ساناپ ارتىپ كەلەدى.

بۇل تۋرالى قالالىق قوعامدىق دەنساۋلىق ساقتاۋ باسقارماسىنان ءمالىم ەتتى، دەپ حابارلايدى قازاقپارات.

ماسەلەن، وتكەن اپتامەن سالىستىرعاندا ۆاكسينا الىپ جاتقاندار كورسەتكىشى تاۋلىگىنە ەكى ەسەدەن استامعا ارتتى. مامانداردىڭ ايتۋىنشا، «دەلتا» شتامى پايدا بولعاننان كەيىن حالىقتىڭ كوپشىلىگى دەنساۋلىعىنا اسقان جاۋاپكەرشىلىكپەن قاراي باستاعان.

«ۆاكسينانىڭ العاشقى دوزاسىن 24- ماۋسىمداعى جاعداي بويىنشا، 190,5 مىڭنان استام ازامات الدى. تۇرعىندار ءوز دەنساۋلىعىنا جانە وزگەلەردىڭ دەنساۋلىعىنا جاۋاپتى ەكەنىن ءتۇسىنىپ كەلەدى. ءبىز مۇنى «دەلتا» شتامىنىڭ (ءۇندى شتامى دەگەن اتاۋمەن بەلگىلى) قاۋىپتىلىگىن تۇسىنە باستاعاندىعىمەن بايلانىستىرامىز»، — دەدى قوعامدىق دەنساۋلىق ساقتاۋ باسقارماسىنان.

قالا تۇرعىندارىن ىنتالاندىرۋ ءۇشىن ساۋدا، ويىن-ساۋىق ورتالىقتارى مەن ساۋدا ۇيلەرىندە كومپيۋتەرلىك جانە تۇرمىستىق تەحنيكا، جەڭىلدىك كۋپوندارى مەن سەرتيفيكاتتار تۇرىندەگى باعالى سىيلىقتار ويناتىلادى.

بۇل اكسياعا جاقىندا «مەچتا» ەلەكترونيكا جانە تۇرمىستىق تەحنيكا دۇكەندەرىنىڭ ساۋدا جەلىسى قوسىلادى.

مىسالى، «Mega Silk Way» س و و ۆاكسينانىڭ ءبىرىنشى دوزاسىن العاندار اراسىندا اۆتوموبيل ويناتۋدا. وتكەن تاۋلىكتىڭ وزىندە عانا مۇندا 450 گە جۋىق ادام ۆاكسينا العان. وسىعان دەيىن ۆاكسينالانعانداردىڭ سانى ەكى جارىم ەسە از بولاتىن.

«ءبىز ۆاكسيناتسيا پۋنكتەرىندە ەكپە العىسى كەلەتىندەردىڭ سانى ارتىپ كەلە جاتقانىن كورىپ وتىرمىز. مىسالى، «ەۋرازيا» ساۋدا ۇيىندە بۇرىن كۇنىنە 50-60 ادام ەگىلسە، كەشە شامامەن 100 ادام قابىلدادىق. سونداي-اق ەمحانالارىمىزدا دا ۆاكسيناتسيانىڭ ءوسۋى بايقالادى: كەشە كەشكە 50 دەن استام ادام ەگىلدى. ال وتكەن تاۋلىكتە ۆاكسينالانعانداردىڭ سانى 100 گە دەيىن ءوستى. قالا تۇرعىندارى جاڭا شتامدى جۇقتىرماس ءۇشىن قاۋىپتەنە باستاعانىن ايتادى. ءوز دەنساۋلىعىنا جاۋاپكەرشىلىكپەن قاراي باستاعانى ءبىزدى قاتتى قۋانتادى»، — دەيدى قالالىق 6№ ەمحانانىڭ ديرەكتورى دينارا بايسەركينا.

ەسكە سالا كەتەيىك، ەلوردا اكىمى التاي كولگىنوۆ ۆاكسينا الاتىندار اراسىندا (جەكە قاراجات ەسەبىنەن) ەكى بولمەلى پاتەردىڭ ۇتىس ويىنى وتكىزىلەتىنىن جاريالاعان بولاتىن.

ۇتىس ويىنىنا وسى جىلدىڭ 25- ماۋسىمى مەن 31- تامىزى ارالىعىندا پرەپاراتتىڭ ءبىرىنشى كومپونەنتىن الاتىن 18 جاستان اسقان ازاماتتار قاتىسا الادى.

بۇل اكسياعا مەديتسينالىق مەكەمەلەر، سونداي-اق س و و/س ۇ سياقتى قالانىڭ ۆاكسيناتسيا پۋنكتەرىندە ەكپە العاندار قاتىسا الادى. كونكۋرستى ءادىل وتكىزۋ جانە ەگىلگەن ازاماتتاردى تولىق قامتۋ ءۇشىن (كورسەتىلگەن كەزەڭدە) قالانىڭ IT- قوعامداستىعى جۇمىلدىرىلاتىن بولادى.