اۋىل اكىمدەرى سايلاۋىنا قانشا قارجى جۇمسالادى؟

نۇر-سۇلتان. قازاقپارات - ق ر ورتالىق سايلاۋ كوميسسياسىنىڭ حاتشىسى ءسابيلا مۇستافينا اۋىل اكىمدەرىن سايلاۋىن وتكىزۋگە قانشا قارجى جۇمسالاتىندىعىن ايتتى، دەپ حابارلايدى قازاقپارات ءتىلشىسى.

«ولاردى ۇيىمداستىرۋ جانە وتكىزۋ جونىندە قابىلدانعان نورمالاردى جۇزەگە اسىرۋ ورتالىق سايلاۋ كوميسسياسى ارقىلى رەسپۋبليكالىق بيۋجەتتەن اعىمداعى ماقساتتى ترانسفەرتتەر ءبولۋ ارقىلى جۇزەگە اسىرىلادى. اتاپ ايتقاندا، بيۋجەت كودەكسىنىڭ 42-بابى 7-تارماعىنا سايكەس جوعارى تۇرعان ورگان قابىلداعان نورماتيۆتىك-قۇقىقتىق اكتىلەردەن تۋىندايتىن تومەنگى بيۋجەتتەردىڭ شىعىستارىن وتەۋ جوعارى تۇرعان بيۋجەتتەن اعىمداعى ماقساتتى ترانسفەرتتەر ءبولۋ ارقىلى جۇرگىزىلەدى»، - دەدى ءسابيلا مۇستافينا و س ك وتىرىسىندا.

ايتا كەتەيىك، 2021-جىلدىڭ 24- مامىرىندا پرەزيدەنت «2021-2023-جىلدارعا ارنالعان رەسپۋبليكالىق بيۋجەت تۋرالى» ق ر زاڭىنا وزگەرتۋلەر مەن تولىقتىرۋلار ەنگىزۋ تۋرالى زاڭعا قول قويعان بولاتىن.

وندا اۋداندىق ماڭىزى بار قالالاردىڭ، اۋىلداردىڭ، كەنتتەردىڭ، اۋىلدىق وكۋرگتەردىڭ اكىمدەرىن سايلاۋعا قاراجات قاراستىرىلعان.

«رەسپۋبليكالىق بيۋجەت تۋرالى» زاڭدا اۋىل اكىمدەرىن سايلاۋعا وسى جىلدىڭ سوڭىنا دەيىن 4,7 ميلليارد تەڭگە قاراستىرىلىپ وتىر.

«شىعىنداردىڭ الدىن الا شىعىسى بازالىق شىعىنعا نەگىزدەلگەن. ولار: جالپى سمەتانىڭ 80 پايىزىنا جۋىقتايتىن سايلاۋ كوميسسياسى مۇشەلەرىنىڭ جالاقىسى، ب ا ق- تاعى جاريالانىمدار، پوليگرافيا جانە باسقا ونىمدەر، كولىك جالداۋ، بايلانىس قىزمەتى، ءىس-ساپار شىعىستارى، سونىمەن قاتار سايلاۋ كوميسسيالارىنىڭ بارلىق مۇشەلەرىن جەكە قورعانىس زاتتارمەن قامتۋ»، - دەدى ول.