كوروناۆيرۋس: ۇلى بريتانيا حالىقتىڭ شەتەلگە شىعۋىنا رۇقسات بەرەدى، يزرايلدە اتا- انالارعا ايىپپۇل سالىنادى
ۇلى بريتانيا بيلىگى كوروناۆيرۋسقا قارسى ەكپە سالدىرعان تۇرعىنداردىڭ الەم بويىنشا ساياحاتتاۋىنا رۇقسات بەرۋدى جوسپارلاپ وتىر.
بۇل تۋرالى دەنساۋلىق ساقتاۋ ءمينيسترى مەتت حانكوك مالىمدەدى. بۇل ازاماتتارعا فرانسيا، يتاليا، يسپانيا، پورتۋگاليا، گرەتسيا جانە ا ق ش سياقتى مەملەكەتتەرگە بارۋعا مۇمكىندىك بەرەدى. ونىڭ ايتۋىنا قاراعاندا، ۇكىمەت ۆاكسيناتسيا ارقىلى الەمنىڭ كەز كەلگەن ەلىندە ەركىن ءجۇرۋ مۇمكىندىگىن قالپىنا كەلتىرۋگە سەپتىگىن تيگىزەتىن جوسپارلاردى ىسكە اسىرماق.
«بۇل شارالار كلينيكالىق تۇرعىدان ءالى ۇسىنىلعان جوق. ءبىز وسى ماسەلەلەردى قازىرگى تاڭدا شەشىپ جاتىرمىز. ۆاكسيناتسيا باعدارلاماسىنىڭ ماقساتى دا سول. مىنە، سوندىقتان ءاربىر ەرەسەك ادامنىڭ ەكپە الۋى وتە ماڭىزدى»، - دەپ ءتۇسىندىردى مينيستر.
سونىمەن قاتار، ساياحاتشىلارعا ۇيگە ورالعاننان كەيىن وقشاۋلانۋدىڭ قاجەتى دە بولمايدى. ءيزرايلدىڭ دەنساۋلىق ساقتاۋ مينيسترلىگى بالالارىنىڭ كارانتين تالاپتارىن بۇزعانى ءۇشىن اتا- انالارعا 5000 شەكەل (شامامەن 660 مىڭ تەڭگە) ايىپپۇل سالۋ سانكسياسىن ەنگىزدى. ءتيىستى بۇيرىققا دەنساۋلىق ساقتاۋ مينيسترلىگىنىڭ باس ديرەكتورى پروفەسسور حەزي لەۆي 23-ماۋسىمدا قول قويدى. بۇل شارا كوروناۆيرۋس ينفەكسياسىن جۇقتىرۋ وقيعالارى سانىنىڭ ارتۋىنا بايلانىستى قولعا الىنىپ وتىر. ينفەكسيانى جۇقتىرۋدىڭ جاڭا ەپيزودتارى ەلدىڭ ءارتۇرلى ايماقتارىندا تىركەلۋدە. ەندى كارانتينگە جاتقىزىلعان بالا شەكتەۋ شارالارىن بۇزعان جاعدايدا، بالامەن بىرگە تۇراتىن ەرەسەك ادامعا 5000 شەكەل ايىپپۇل سالىنۋى مۇمكىن.
كولۋمبياعا Janssen ۆاكسيناسىنىڭ العاشقى پارتياسى جەتكىزىلدى. ەل پرەزيدەنتى يۆان دۋكە ءوزىنىڭ Twitter- ىندە كولۋمبياعا Janssen كومپانياسى شىعارعان ەكپەنىڭ العاشقى 480 مىڭ دوزاسىنىڭ جەتكىزىلگەنىن حابارلادى.
ونىڭ ايتۋىنشا، ۆاكسينانىڭ بۇل پارتياسى ەلدىڭ شالعاي اۋداندارىنداعى تۇرعىنداردى ەكپەمەن قامتاماسىز ەتۋگە مۇمكىندىك بەرەدى. كولۋمبيادا COVID-19 كوروناۆيرۋس ينفەكسياسى انىقتالعان جاعدايلاردىڭ سانى شامامەن 4 ميلليوندى قۇرايدى.