مۇرات ايتەنوۆ ماجبۇرلەپ ۆاكسينالاۋعا قاتىستى پىكىر ءبىلدىردى

نۇر-سۇلتان. قازاقپارات - شىمكەنت قالاسىنىڭ اكىمى مۇرات ايتەنوۆ حالىقتى ۆاكسينالاۋ تۋرالى ونلاين جيىندا مەكتەپ ديرەكتورلارىن «قامشىلاۋ» تۋرالى تاپسىرما بەرگەن ورىنباسارىنىڭ ارەكەتىنە پىكىر ءبىلدىردى، دەپ حابارلايدى قازاقپارات.

«بىرىنشىدەن، ول مامان جاۋاپقا تارتىلاتىنداي زاڭدى بۇزعان جوق. ول - مەنىڭ ءبىرىنشى ورىنباسارىم. بۇل تۋرالى ءبارىمىز بىلەمىز. وقيعا بۇقارالىق اقپارات قۇرالدارىنا جاقسى تارالدى. ەكىنشىدەن، قازاقتىڭ «قامشى» دەگەن ءسوزى ءارتۇرلى ماعىنانى بىلدىرەدى. ول تەك قامشىمەن ۇرۋ دەگەن ءسوز ەمەس. قامشىلاۋ دەگەن باقىلاۋعا الىپ، تىكەلەي تاپسىرما بەرۋ دەگەن ماعىنا دا بەرەدى. مەن ورىنباسارىمدى شاقىرىپ، بۇل ماسەلە تۋرالى سويلەستىم. «قامشىلاۋ» دەگەندى قانداي ويمەن ايتقانىن سۇرادى. ول باقىلاۋعا الۋ ماعىناسىندا قولدانعانىن ءتۇسىندىردى»، - دەدى اكىم ورتالىق كوممۋنكاتسيالار قىزمەتىندە.

مۇرات ايتەنوۆ قازىر قالادا ۆاكسيناتسيا قارقىندى ءجۇرىپ جاتقانىن اتاپ، قالاعا جەتكەن العاشقى ۆاكتسينانى وزىنە سالعىزعانىن ەسە الدى.

«قازىر جاعدايدى بىلەسىز. ۆاكسينا بارىنە مىندەتتى ەمەس، ءبىراق ۆاكينا الۋعا شاقىرۋ - اكىمشىلىكتىڭ جاۋاپكەرشىلىگى. ەرتەڭ ازاماتتار اۋىرىپ، باسقا دا قيىن جاعدايعا ۇشىراپ جاتسا، وكىنىش بولادى. سول سەبەپتى قالا تۇرعىندارىنا ءالى دە ءتۇسىندىرىپ جاتىرمىز. ۆاكسينادان قورقۋدىڭ قاجەتى جوق. ونىڭ اعزاعا ەشقانداي زيانى جوق. شىمكەنتكە ءبىرىنشى ۆاكسينا 1-اقپاندا جەتكىزىلگەن. سول كەزدە ءوزىم ءبىرىنشى بولىپ ۆاكسينا العانمىن. قازىر، قۇدايعا شۇكىر دەنساۋلىعىم ءبىرقالىپتى»، - دەدى شاھار باسشىسى.

اكىمنىڭ ايتۋىنشا، قازىر ۆاكسينا الۋعا مۇمكىندىگى بار شىمكەنتتىكتەردىڭ 44 پايىزى ەكپە قابىلداعان.