سەنات ءتوراعاسى سەسسيا جۇمىسىن قورىتىندىلادى
«بۇگىن ءبىز جەتىنشى شاقىرىلىمداعى پارلامەنتتىڭ ءبىرىنشى سەسسياسىنداعى سەناتتىڭ قورىتىندى وتىرىسىن وتكىزىپ وتىرمىز. سەسسيا بارىسىندا مەملەكەت باسشىسىنىڭ ەلىمىزدى جاڭعىرتۋ باعدارىن زاڭنامالىق تۇرعىدان قامتاماسىز ەتۋ ءۇشىن اۋقىمدى جۇمىس اتقارىلدى. پارلامەنت 63 زاڭ قابىلدادى. ولاردىڭ ىشىندە 15-ىنە دەپۋتاتتىق كورپۋس باستاماشىلىق جاسادى. پالاتانىڭ قاراۋىنا تۇسكەن ءار زاڭ جوباسى جان- جاقتى قارالىپ، تۇراقتى كوميتەتتەر مەن جالپى وتىرىستاردا كەڭىنەن تالقىلاندى. ازاماتتار مەن ساراپشىلار قوعامداستىعىنىڭ ۇسىنىستارى دا نازاردان تىس قالمادى. وسى ورايدا، پرەزيدەنتتىڭ باستاماشى بولۋىمەن قابىلدانعان جەردى شەتەلدىكتەرگە ساتۋعا جانە جالعا بەرۋگە تىيىم سالعان زاڭدى ەرەكشە اتاپ وتكەن ءجون. وسىلايشا بۇل ماسەلە تۇبەگەيلى شەشىلدى. سايلاۋ زاڭناماسىنا ماڭىزدى وزگەرىستەر جاسالدى. اۋىل اكىمدەرىن تىكەلەي سايلاۋ تۋرالى نورما قابىلداندى. ساياسي پارتيالاردىڭ ءماجىلىس پەن ءماسليحاتتارعا ءوتۋ شەگى تومەندەتىلدى جانە سايلاۋ بيۋللەتەندەرىنە «بارىنە قارسىمىن» دەگەن جول قوسىلدى»، - دەدى م. اشىمبايەۆ.
ونىڭ ايتۋىنشا، جەرگىلىكتى مەملەكەتتىك باسقارۋ مەن ءوزىن- ءوزى باسقارۋدى دامىتۋ بويىنشا دا شارالار قابىلداندى. اۋىل حالقىنىڭ وزەكتى ماسەلەلەرىن ءتيىمدى شەشۋ ءۇشىن جەرگىلىكتى بيلىك ورگاندارىنا قوسىمشا فۋنكتسيالار مەن وكىلەتتىكتەر بەرىلدى. سەنات دەپۋتاتتارى ەكونوميكالىق ءوسىمدى قالپىنا كەلتىرۋگە، ىندەتتىڭ تارالۋىنا توسقاۋىل قويۋعا، شاعىن جانە ورتا بيزنەستى قولداۋعا كوپ كوڭىل ءبولدى. بۇل وزگەرىستەردىڭ تۇپكى ماقساتى - ازاماتتارىمىزدىڭ ءال- اۋقاتىن ارتتىرۋ ەكەنى ءسوزسىز.
«اشىقتىقتى ارتتىرۋ ءۇشىن كۆازيمەملەكەتتىك سەكتوردىڭ ساتىپ الۋلارى العاش رەت زاڭمەن رەگلامەنتتەلدى. سوت- قۇقىق قورعاۋ سالاسىندا قابىلدانعان زاڭنامالىق وزگەرىستەردىڭ اۋقىمدى بولىگى ازاماتتاردىڭ قۇقىقتارىنىڭ قورعالۋىنا، كاسىپكەرلەردى زاڭسىز ارالاسۋدان قورعاۋعا باعىتتالدى. مەملەكەت باسشىسىنىڭ تاپسىرمالارىن ىسكە اسىرۋ ءۇشىن ۇلتتىق زاڭنامادا العاش رەت «الەۋمەتتىك كاسىپكەرلىك» ۇعىمىنا انىقتاما بەرىلدى. مەملەكەت تاراپىنان وسى باعىتتى قولداۋدىڭ ناقتى شارالارى مەن تەتىكتەرى بەلگىلەندى. بۇل ماڭىزدى زاڭ جوباسىن سەناتورلار قىسقا مەرزىمدە ۇكىمەتپەن جانە الەۋمەتتىك كاسىپكەرلەرمەن بىرلەسىپ دايىندادى»، - دەدى سەنات ءتوراعاسى.
بىلتىرعى قىركۇيەك ايىنان بەرى سەناتورلار 7 زاڭ جوباسىنا باستاماشى بولىپ، ونىڭ 6-ۋى قابىلداندى. سونداي- اق، سەنات دەپۋتاتتارىنىڭ باستاماشىلىعىمەن تاعى 14 زاڭ جوباسى بويىنشا جۇمىس جۇرگىزىلۋدە. سەنات قابىرعاسىندا «جاھاندانۋ داۋىرىندە ۇلتتىق قۇندىلىقتاردى دارىپتەۋ - كەشەندى جاڭعىرۋدىڭ نەگىزى» تاقىرىبىنا ارنالعان پارلامەنتتىك تىڭداۋ وتكىزىلدى.
وتىرىس بارىسىندا ۇلتتىق مۇددەمىزگە قاتىستى ماڭىزدى ماسەلەلەر كوتەرىلىپ، ءتيىستى ۇسىنىمدار ازىرلەندى. سەناتتا مەملەكەت باسشىسىنىڭ تاپسىرماسى بويىنشا جارىق كورگەن «اشارشىلىق. گولود. 1928-1934. دەرەكتى حرونيكا» اتتى جاڭا ەڭبەك كوپشىلىككە تانىستىرىلدى.
«سەناتورلار وڭىرلەرگە بارىپ، حالىقپەن جانە ەڭبەك ۇجىمدارىمەن ءۇش جۇزگە جۋىق كەزدەسۋ وتكىزدى. بۇدان بولەك، تۇراقتى كوميتەتتەر وتكىزگەن 3 ۇكىمەت ساعاتى، 5 كوشپەلى وتىرىس، 40 دوڭگەلەك ۇستەل مەن كەزدەسۋ اياسىندا پرەزيدەنت تاپسىرمالارىنىڭ، زاڭداردىڭ جانە مەملەكەتتىك باعدارلامالاردىڭ ورىندالۋ بارىسى جان- جاقتى قارالدى. وسى ءىس- شارالاردا قابىلدانعان ۇسىنىمدار جاۋاپتى مەملەكەتتىك ورگاندارعا جىبەرىلدى. ونىڭ ءبارى سەناتتىڭ باقىلاۋىندا بولادى. اعىمداعى سەسسيادا ارىپتەستەرىمىز 45 دەپۋتاتتىق ساۋال جولداپ، ورتالىق مەملەكەتتىك ورگانداردىڭ نازارىن وزەكتى ماسەلەلەرگە اۋداردى جانە ولاردى شەشۋ جولدارىن ۇسىندى»، - دەدى سەنات ءتوراعاسى. سونىمەن قاتار ول 30-ماۋسىمدا بىرلەسكەن وتىرىس وتەتىنىن، وندا ءبىرىنشى سەسسيانىڭ جۇمىسىنا قورىتىندى جاسالىپ، پارلامەتتىك كانيكۋل جاريالاناتىنىن ايتتى.
«پارلامەنتتىك كانيكۋل كەزەڭىندە دەپۋتاتتاردىڭ جۇمىسى توقتاپ قالمايتىنى بەلگىلى. سىزدەر وڭىرلەرگە بارىپ، حالىقپەن، جۇرتشىلىقپەن كەزدەسەسىزدەر. سونىڭ اياسىندا جەرگىلىكتى جەرلەردەگى پروبلەمالاردى زەردەلەپ، سىندارلى ۇسىنىستار جيناقتايسىزدار. ونىڭ بارلىعى دا الداعى دەپۋتاتتىق قىزمەتىمىزگە نەگىز بولاتىنى ءسوزسىز»، - دەدى م. اشىمبايەۆ.
اۆتور: رۋسلان عابباسوۆ