اۋىل اكىمىنە كانديداتتى تىركەۋ قالاي جۇرگىزىلەدى

نۇر-سۇلتان. قازاقپارات - ق ر ورتالىق سايلاۋ كوميسسياسىنىڭ مۇشەسى ەرلان داۋىلبايەۆ اۋىل اكىمىنە تىركەلۋ قالاي جۇرگىزىلەتىندىگىن ايتتى، دەپ حابارلايدى قازاقپارات ءتىلشىسى.

«اۋداندىق ماڭىزى بار قالا، اۋىل، كەنت، اۋىلدىق وكرۋگ اكىمىنە كانديدات ءوزىن- ءوزى ۇسىنعان جاعدايدا، داۋىس بەرۋگە قۇقىعى بار ءتيىستى سايلاۋ وكرۋگى سايلاۋشىلارىنىڭ جالپى سانىنىڭ كەمىندە 1 پايىز داۋىسىنىڭ قولداۋىنا يە بولۋى ءتيىس. سايلاۋشىلاردى قولداۋ ولاردىڭ قولدارىن جيناۋمەن كۋالاندىرىلادى. كانديداتتاردى قولداپ قول جيناۋدى سەنىم بىلدىرگەن ادامدار ۇيىمداستىرادى جانە ول ءۇشىن كانديدات وسى كونستيتۋتسيالىق زاڭدا، «قازاقستان رەسپۋبليكاسىنداعى جەرگىلىكتى مەملەكەتتىك باسقارۋ جانە ءوزىن-ءوزى باسقارۋ تۋرالى» زاڭىنىڭ 36-بابىندا، مەملەكەتتىك قىزمەت سالاسىنداعى زاڭنامادا كوزدەلگەن تالاپتارعا سايكەستىگى تەكسەرىلگەننەن كەيىن 3 كۇننەن كەشىكتىرىلمەي تيىسىنشە اۋداندىق سايلاۋ كوميسسياسى بەرەتىن قول قويۋ پاراقتارىمەن راسىمدەلەدى. تولتىرىلعان قول قويۋ پاراقتارى تيىسىنشە اۋداندىق سايلاۋ كوميسسياسىنا تاپسىرىلادى. ول 3 كۇن مەرزىمدە ىشكى ىستەر قىزمەتكەرلەرىن تارتا وتىرىپ، جينالعان قولداردىڭ راستىعىن تەكسەرەدى جانە ءتيىستى حاتتامانى راسىمدەيدى. قولداردىڭ راستىعىن تەكسەرۋ كونستيتۋتسيالىق زاڭعا سايكەس اۋداندىق ماڭىزى بار قالا، اۋىل، كەنت، اۋىلدىق وكرۋگ اكىمىنە كانديداتقا قاجەتتى انىق قولدار انىقتالعانعا دەيىن جۇرگىزىلەدى»، - دەدى كوميسسيا مۇشەسى و س ك وتىرىسى بارىسىندا.

ونىڭ ايتۋىنشا، كانديدات تىركەلۋ ءۇشىن ساياسي پارتيالار ۇسىنعان كەزدە ازاماتتىڭ كانديدات بولۋعا كەلىسىمى، ءومىرباياندىق دەرەكتەرى، كانديدات پەن جۇبايىنىڭ اكتيۆتەرى مەن مىندەتتەمەلەرى تۋرالى دەكلاراتسيانى تاپسىرعانى تۋرالى مەملەكەتتىك كىرىس ورگانىنان انىقتاماسى، ق ر مەملەكەتتىك قىزمەتىنە كىرەتىن ازاماتتى ارنايى تەكسەرۋ ءۇشىن قاجەتتى قۇجاتتاردى، ساياسي پارتيانىڭ سايلاۋ جارناسىن ەنگىزگەندىگىن كۋالاندىراتىن قۇجات، كانديداتتىڭ ساياسي پارتياعا مۇشەلىگىن راستايتىن قۇجات ۇسىنۋى قاجەت.

ال ءوزىن ءوزىن ۇسىنعان ادام كانديدات بولىپ داۋىسقا ءتۇسۋ تۋرالى ءوتىنىشى، ءومىرباياندىق دەرەكتەر، كانديدات پەن جۇبايىنىڭ اكتيۆتەرى مەن مىندەتتەمەلەرى تۋرالى دەكلاراتسيانى تاپسىرعانى تۋرالى مەملەكەتتىك كىرىس ورگانىنان انىقتاماسى، ق ر مەملەكەتتىك قىزمەتىنە كىرەتىن ازاماتتى ارنايى تەكسەرۋ ءۇشىن قاجەتتى قۇجاتتاردى، سايلاۋ جارناسىن ەنگىزەنى تۋرالى قۇجات ۇسىنۋى ءتيىس.

سونىمەن قاتار سايلاۋ وكرۋگى سايلاۋشىلارىنىڭ جالپى سانىنىڭ كەمىندە 1 پايىز داۋىسىنىڭ قولداۋىنا يە بولعاندىعىن راستايتىن اۋماقتىق سايلاۋ كوميسسياسىنىڭ انىقتاماسىن دا ۇسىنۋى كەرەك. ال اۋدان اكىمى كانديداتتى ۇسىنعان كەزدە جوعارىدا اتالعان قۇجاتتارمەن قاتار ارناۋلى ۇسىنىسى قوسا بەرىلۋى ءتيىس. «كانديداتتاردى تىركەۋ بارلىق قاجەتتى قۇجاتتاردى العاننان كەيىن باستالادى جانە سايلاۋ كۇنىنەن 10 كۇن بۇرىن جەرگىلىكتى ۋاقىتپەن ساعات 18.00-دە اياقتالادى»، - دەدى ەرلان داۋىلبايەۆ.

اۆتور: مارلان جيەمباي