اۋىل اكىمىنە كانديداتتارى ۇسىنۋ قالاي جۇرگىزىلەدى

نۇر-سۇلتان. قازاقپارات – ق ر ورتالىق سايلاۋ كوميسسياسىنىڭ مۇشەسى ەرلان داۋىلبايەۆ اۋىل اكىمدەرىن سايلاۋ ءۇشىن قانداي جايتتار نەگىز بولاتىندىعىن اتادى، دەپ حابارلايدى قازاقپارات ءتىلشىسى.

«كانديداتتاردى ۇسىنۋ سايلاۋ تاعايىندالعان كۇننەن كەيىنگى كۇنى باستالادى جانە سايلاۋ وتكىزىلەتىن ۋاقىتقا 15 كۇن قالعاندا جەرگىلىكتى ۋاقىتپەن ساعات 18.00-دە اياقتالادى. ەگەر ۇسىنۋ مەرزىمى اياقتالاتىن كۇنگە دەيىن اۋىلدىق ماڭىزى بار قالا، اۋىل، كەنت، اۋىل وكرۋگىنە ەكەۋدەن كەم كانديدات ۇسىنىلسا، وندا اۋداندىق سايلاۋ كوميسسياسى كانديتتاردى ۇسىنۋدى 5 كۇننەن اسپايتىن مەرزىمگە ۇزارتادى»، - دەدى ول و س ك وتىرىسىندا. سونىمەن قاتار و س ك مۇشەسى كانديداتتاردى ۇسىنۋ تاسىلدەرىنە دە توقتالىپ ءوتتى.

«ءبىرىنشى، ساياسي پارتيالار ءوز مۇشەلەرىنىڭ اراسىنان ۇسىنادى. بۇل رەتتە ساياسي پارتيا ءبىر سايلاۋ وكرۋگىندە 1 عانا كانديدات ۇسىنۋعا قۇقىلى. ەكىنشى، داۋىس بەرۋگە قۇقى بار ءتيىستى وكرۋگ سايلاۋشىلارىنىڭ جالپى سانىنىڭ كەمىندە 1 پايىزىنىڭ قولىن جيناۋدى قامتاماسىز ەتە وتىرىپ، ءوزىن ءوزى ۇسىنۋ ارقىلى جۇزەگە اسىرادى. ءۇشىنشى، ەگەر ۇسىنۋ اياقتالاتىن كۇنگە ەكەۋدەن كەم كانديدات ۇسىنىلسا، اۋدان اكىمى ۇسىنادى. بۇل رەتتە ۇسىنىلعان كانديداتتار بولماعان نە ۇسىنۋ مەرزىمى اياقتالاتىن كۇنى 1 كانديدات ۇسىنىلعان جاعدايدا اۋدان اكىمى جەرگىلىكتى قوعامداستىق جينالىسىنىڭ كەلىسىمى بويىنشا تيىسىنشە 2 نە 1 كانديداتتى ۇسىنۋعا قۇقىلى»، - دەدى ەرلان داۋىلبايەۆ.