مەن قازاق مانەرىن كورسەتەمىن: جانىبەك ءالىمحان ۇلى لاس- ۆەگاسقا كەلدى
مۇندا ول 26-ماۋسىم كۇنى ورتا سالماق ساناتىندا WBA Regular بۇرىنعى الەم چەمپيونى روب برانتپەن (26-2، 18 ك و) جۇدىرىقتاسادى، دەپ حابارلايدى قازاقپارات Sports.kz سايتىنا سىلتەمە جاساپ.
«ءبىز لاس- ۆەگاستامىز. سەنبى كۇنى ۆەگاستا ۇلكەن جاڭالىقتار بولادى جانە بۇكىل الەم بۇل تۋرالى بىلەتىن بولادى. ۆەگاستا نە بولىپ جاتقانى ۆەگاستا قالماۋى كەرەك. مەن قازاق مانەرىن كورسەتەمىن»، - دەپ جازدى جانىبەك Twitter- دە.
ءالىمحان ۇلى - برانت جەكپە- جەگى نۇر- سۇلتان ۋاقىتى بويىنشا 27-ماۋسىم كۇنى 08:00 شاماسىندا باستالادى.
سوڭعى رەت جانىبەك شارشى الاڭعا قازان ايىندا شىققان بولاتىن. ول كەزدە ارگەنتينالىق گونسالو كوريانى (16-4، 6 ك و) نوكاۋتپەن جەڭگەن ەدى.
روب برانت ءوزىنىڭ سوڭعى ايقاسىن 2020 -جىلدىڭ تامىز ايىندا وتكىزىپ، بەسىنشى راۋندتا ۋكراينالىق ۆيتالي كوپىلەنكونى (28-3، 16 ك و) نوكاۋتقا جىبەردى.