كوروناۆيرۋستىڭ ۇندىلىك شتامى الەمدى ابىگەرگە سالۋدا

نۇر-سۇلتان.قازاقپارارت - سوڭعى كۇندەرى الەم ەلدەرىن كوروناۆيرۋستىڭ ۇندىلىك ءتۇرى ابىگەرگە سالىپ جاتىر.

دەلتا شتامىنىڭ بەلەڭ العانى سونشا بۇگىندە ول 90 نان استام مەملەكەتتە تىركەلدى. ماسەلەن، ماسكەۋ قالاسىندا ەمحاناعا تۇسكەندەردىڭ 90 پروتسەنتىندە ءۇندى شتامى تابىلعان. وسىعان بايلانىستى جەرگىلىكتى بيلىك قاتاڭ شەكتەۋ شارالارىن ەنگىزدى. ەندى كەلەسى اپتادان كافە- بارلارعا تەك ۆاكسينا العاندار عانا كىرگىزىلەدى. ءتىپتى كەي ازاماتتارعا ەكپە سالۋ مىندەتتەلەدى.

كوروناۆيرۋستى جەڭدى دەگەن يزرايلدە دە جاعداي ءماز ەمەس. كەشە بۇل ەلدە 125 ادامنان قاۋىپتى ينفەكسيا انىقتالدى. دەنى بالالار. مامانداردىڭ سوزىنشە، بۇعان سىرتتان كەلگەن شتامم سەبەپ.

نافتالي بەننەت، يزرايل پرەمەر- ءمينيسترى:

- قولدا بار دەرەكتەرگە سۇيەنە وتىرىپ، ەلدەگى جاعدايدى ىندەتتىڭ جاڭا تولقىنى رەتىندە قاراستىرىپ وتىرمىز. ەندى مەيلىنشە تەزىرەك ونىڭ الدىن الۋىمىز قاجەت. وسىعان بايلانىستى كوروناۆيرۋس بولمەلەرىن قايتا اشۋ تۋرالى شەشىم قابىلداندى. سونىمەن قاتار اۋەجايعا كەلگەن ءار ادام ماسكامەن جۇرۋگە مىندەتتەلەدى. ال سىرتتان كەلگەن ازاماتتار پ ت ر- تەست تاپسىرۋلارى قاجەت.

ءۇندى شتامى ا ق ش- تا دا بەلەڭ العان. قاۋىپتى دەرت قۇراما شتاتتاردىڭ بارلىعىندا دەرلىك تىركەلگەن. سالدارىنان جاعدايى وڭالا باستاعان ايماقتاردا قايتادان ۆيرۋس جۇقتىرعاندار قاتارى كوبەيىپ كەتىپتى. سوڭعى بىرنەشە اپتادا كوروناۆيرۋستىڭ وسى تۇرىنە شالدىققاندار قاتارى ەكى ەسەگە ارتىپ كەتكەن.

www.24.kz