فۋتبولدان قازاقستان بىرىنشىلىگى: «توبىل» كوش باستادى

نۇر- سۇلتان. قازاقپارات - فۋتبولدان پرەمەر- ليگا كوماندالارى اراسىنداعى ەل بىرىنشىلىگىنىڭ ون جەتىنشى تۋرى مارەسىنە جەتتى، دەپ حابارلايدى قازاقپارات ءتىلشىسى.

كەشە، 22-ماۋسىمدا اتالعان تۋردا ەلوردادا «استانا» شىمكەنتتىڭ «ورداباسى» كلۋبىنان 0:2 ەسەبىمەن جەڭىلسە، ودان كەيىن «اقجايىق» پەن «شاحتەر»، «اقتوبە» مەن « قىزىلجار» 1:1 ەسەبىمەن تەڭ ءتۇستى.

بۇگىن، 23 ماۋسىمدا تالدىقورعاندا «جەتىسۋ» مەن «اتىراۋ» كوماندالارى كەزدەستى. ويىن بارىسىندا اتىراۋلىق كلۋب ساپىنان پەتر گجەلچاك 63-مينۋتتا ەسەپ اشسا، 75-مينۋتتا تالدىقورعاندىق ارتەم دميتريەۆ تارازى باسىن تەڭەستىردى. جەڭىس گولىن 83-مينۋتتا «اتىراۋ» ساپىنان برايان جەڭىس گولىن سوقتى. وسىلايشا مۇنايلى قالانىڭ كومانداسى 2:1 ەسەبىمەن باسىم ءتۇستى. ال الماتىدا «قايرات» ءوز الاڭىندا اقتاۋدىڭ «كاسپي» كومانداسىن قابىلدادى. ويىننىڭ 6-مينۋتىندا الماتىلىق ارتۋر شۋشەناچيەۆ ەسەپ اشتى. ودان كەيىن ۆاگنەر لاۆ 25, 71-مينۋتتاردا قوس گولدىڭ اۆتورى اتانسا، «كاسپي» ساپىنان رۋسلان مينگازوۆ ەسەپ ايىرماسىن قىسقارتتى. بۇدان كەيىن «قايرات» ساپىنان كامو وگانەسيان 83، گۋلجيگيت الىقۇلوۆ 90-مينۋتتاردا مەرگەندىك تانىتىپ، قورىتىندى ەسەپتى بەلگىلەدى. ناتيجەسىندە الماتىلىق كلۋب قارسىلاسىن 5:1 ەسەبىمەن تىزە بۇكتىردى، «تاراز» ءوز الاڭىندا تۇركىستاننىڭ «تۇران» كومانداسىمەن شەبەرلىك بايقاستى. ويىن بارىسىندا تۇركىستاندىق تەمىرلان ءامىروۆ 71-مينۋتتا ەسەپ اشسا، تارازدىق جاقىپ قوجامبەردى 87-مينۋتتا تارازى باسىن تەڭەستىردى. ەكى كوماندا 1:1 ەسەبىنە قاناعات ءبىلدىردى.

اتالعان تۋردى قىزىلوردادا جەرگىلىكتى «قايسار» مەن قوستانايدىڭ «توبىل» كوماندالارى تۇيىندەدى. بۇل ويىندا الدىمەن قوستانايلىق سەرگەي مالىي 13-مينۋتتا ەسەپ اشسا، وعان «قايسار» ساپىنان يوۆان چادجەنوۆيچ 27-مينۋتتا ءبىر گولمەن جاۋاپ قايىردى.

ەكىنشى كەزەڭنىڭ 63-مينۋتىندا دميتريي ميروشنيچەنكو قايتادان «توبىلدى» العا شىعاردى. ال 74-مينۋتتا قوستانايلىق كلۋبتان رومان اسرانكۋلوۆ الاڭ يەلەرى قاقپاسىنا تاعى ءبىر گول ەنگىزدى. وسىلايشا «توبىل» الاڭ يەلەرىن 3:1 ەسەبىمەن جەڭىپ، تۋرنير كەستەسىندە كوش باسىنا شىقتى. ەندى 17-تۋر ويىندارى 27 جانە 28-ماۋسىم كۇندەرى وتكىزىلەدى.