قازاقستاندا كوروناۆيرۋستىڭ ءۇندى شتامى قانشا ادامنان تابىلدى؟

نۇر-سۇلتان. قازاقپارات - ق ر د س م سانيتاريالىق-ەپيدەميولوگيالىق باقىلاۋ كوميتەتىنىڭ ءتوراعاسى ايجان ەسماعامبەتوۆا كوروناۆيرۋستىڭ «دەلتا» نەمەسە ءۇندى شتامىنا قانشا ادامعا تەست جاسالعانىن ايتىپ بەردى، دەپ حابارلايدى قازاقپارات ءتىلشىسى.

«بۇگىنگى تاڭدا نۇر-سۇلتان قالاسى بويىنشا كوروناۆيرۋس ينفەكسياسى دياگنوزى قويىلعان 55 ادام ەكسپرەسس-ادىسپەن تەستىلەۋدەن ءوتتى. ولاردىڭ %55 ىندا ياعني 30 سىنامادا ءۇندى شتامىنىڭ مۋتاتسياسى بولۋى ىقتيمال. بۇگىن الماتى قالاسىندا دا ءۇندى شتامىنىڭ تسيركۋلياتسياسى انىقتالدى. كەشە تەستىلەۋدەن وتكەندەر اراسىنان ءبىر سىناما تابىلدى»، - دەپ جاۋاپ بەردى ايجان ەسماعامبەتوۆا ورتالىق كوممۋنيكاتسيالار قىزمەتىندە ءتىلشى سۇراعىنا.

ونىڭ ايتۋىنشا، پ ت ر سكرينينگى ءۇندى شتامىنا ءتان مۋتاتسيانى انىقتايدى، ال تولىق سەنىمدى ناتيجە الۋ ءۇشىن گەنومدىق رەتتىلىك جۇرگىزىلەدى. «ياعني، ۆيرۋستىڭ د ن ق تىزبەگى تولىق قاراستىرىلىپ، ءۇندى شتامىنا ءتان مۋتاتسيانىڭ بولۋ-بولماۋى انىقتالادى. بۇل تالداۋ ادەتتە، ايتارلىقتاي ۇزاق وتەدى جانە وعان شامامەن ءۇش اپتا جۇمسالادى»، - دەپ ءتۇسىندىردى سپيكەر.

ياعني، ماماندار الدىمەن جەدەل تەستىلەۋ وتكىزىپ، پ ت ر ادىسىمەن انىقتاعان.

«ەندى ءدال وسى سىنامالار ءۇش اپتا ىشىندە تەكسەرىلەدى. سوندا تولىق گەنومدىق رەتتىلىك ءۇندى شتامىنىڭ بار-جوعىن راستايدى. دەگەنمەن، پ ت ر- جۇيەلەر وتە سەزىمتال جانە كوروناۆيرۋستىڭ قانداي دا ءبىر ءتۇرىنىڭ مۋتاتسياسىن انىقتايدى»، - دەپ تولىقتىردى ايجان ەسماعامبەتوۆا.