باسقا ۆاكسينالاردى كۇتۋدىڭ قاجەتى جوق - الەكسەي سوي
بۇل تۋرالى ق ر دەنساۋلىق ساقتاۋ ءمينيسترى الەكسەي سوي ايتىپ بەردى، دەپ حابارلايدى قازاقپارات ءتىلشىسى.
«قازاقستاننىڭ ءاربىر جەتىنشى ازاماتى ۆاكسينا الدى - بۇل ۇلكەن جەتىستىك. باسقا ۆاكسينالاردى كۇتۋدىڭ قاجەتى جوق. بارلىق ۆاكسينالاردىڭ ەل اۋماعىندا قولدانۋعا رۇقسات ەتىلگەنىن ءتۇسىنۋ وتە ماڭىزدى. ولار قاۋىپسىز، ءتيىمدى، تەكسەرىلگەن جانە شامامەن 2,9 ميلليون ادام وسى ۆاكسينالاردى سالدىرعان. تيىمدىلىگى وتە جاقسى، ءبىز ۆاكسينالاۋدىڭ كومەكتەسەتىنىن كورىپ وتىرمىز»، - دەدى مينيستر ا. سوي ورتالىق كوممۋنيكاتسيالار قىزمەتىندە تىلشىلەر سۇراعىنا بەرگەن جاۋابىندا.
سونىمەن بىرگە، ا. سوي ەلدە كوروناۆيرۋسپەن قايتا اۋىرۋ جاعدايلارى بار ەكەنىن ەسكەرتتى.
«ۆيرۋسپەن اۋىرعاندار ەندى جۇقتىرمايمىن دەپ ويلاۋى مۇمكىن، بۇل مۇلدەم دۇرىس ەمەس. قازاقستاندا قايتا اۋىرۋ جاعدايلارى تىركەلدى، الەم بويىنشا دا وسىنداي ستاتيستيكا بار - كوپتەگەن ادامدار اۋىرۋدا جانە جاعدايلارى دا وتە اۋىر. وكىنىشكە وراي، قايتىس بولىپ جاتقاندار دا بار. سوندىقتان مۇندا ءوزىن قورعاۋ ءۇشىن، وتباسىن قورعاۋ ءۇشىن مىندەتتى تۇردە ۆاكسينا سالدىرۋ قاجەت»، - دەپ اتاپ ءوتتى مينيستر.