كوروناۆيرۋسقا شالدىققان ناۋقاسقا بايلانىستى «قورداي» شەكارا بەكەتى ۋاقىتشا جابىلدى

تاراز. قازاقپارات - كوروناۆيرۋس ينفەكسياسىن جۇقتىرعان ناۋقاستىڭ انىقتالۋىنا بايلانىستى جامبىل وبلىسىنداعى «قورداي شەكارا بەكەتىن ۋاقىتشا جابۋعا تۋرا كەلگەن. بۇل تۋرالى ق ر دەنساۋلىق ساقتاۋ مينيسترلىگى سانيتاريالىق-ەپيدەميولوگيالىق باقىلاۋ كوميتەتىنەن ءمالىم ەتتى، دەپ حابارلايدى قازاقپارات.

ءمالىم بولعانداي، قازاقستان ازاماتى ەل اۋماعىنا «قورداي» شەكارا پۋنكتى ارقىلى كەلگەن.

«22- ماۋسىمدا جامبىل وبلىسىنداعى قازاق-قىرعىز شەكاراسىندا ورنالاسقان «قورداي» ورتالىق بەكەتىندە كورشى ەلدەن كەلگەن COVID 19 عا شالدىققان ناۋقاس انىقتالدى. سانيتاريالىق- ەپيدەميولوگيالىق قىزمەت ماماندارى بۇل فاكتى تۋرالى قورداي اۋداندىق سانيتاريالىق-ەپيدەميولوگيالىق باقىلاۋ باسقارماسىنىڭ باسشىسىنا جانە جامبىل وبلىسى سانيتاريالىق-ەپيدەميولوگيالىق باقىلاۋ دەپارتامەنتىنە حابارلادى. وسىدان كەيىن شۇعىل تۇردە ناۋقاستى، ونىمەن جاقىن بايلانىستا بولعان ازاماتتاردى وقشاۋلاۋ شارالارى قولعا الىندى. ازاماتتار شەكاراداعى وتكىزۋ پۋنكتىنىڭ اۋماعىندا ورنالاسقان يزولياتورعا جاتقىزىلدى. كەيىن سانيتاريالىق-ەپيدەميولوگيالىق قىزمەت ماماندارى جەدەل جاردەم بريگاداسىن شاقىردى. كوروناۆيرۋس ينفەكسياسىنا شالدىققان ناۋقاستىڭ انىقتالۋىنا بايلانىستى وتكىزۋ پۋنكتى باسشىسىنىڭ بۇيرىعىمەن «قورداي» بەكەتى ۋاقىتشا جابىلدى»، - دەلىنگەن تاراتىلعان اقپاراتتا.

اتاپ وتىلگەندەي، دەزينفەكتورلار بەكەت عيماراتىن وڭدەۋ شارالارىن جۇرگىزىپ، عيمارات اۋماعى جەلدەتىلگەننەن كەيىن پوست ءوز جۇمىسىن قايتا جالعاستىردى.

ايتا كەتەيىك، اعىمداعى جىلدىڭ باسىنان بەرى جامبىل وبلىسىنىڭ مەملەكەتتىك شەكاراسى ارقىلى 185050 ادام وتسە، ونىڭ 23 ىنەن COVID-19 انىقتالدى.