شىعارماشىلىق وداقتار قارجىلىق قيىندىقتاردان شىعا الماي وتىر - قازىبەك يسا
«ۇلتتىق مۇددەمىزدى قورعاۋ ءۇشىن، ەڭ الدىمەن، ءوز بولمىسىمىزدى جات بولمىستان قورعاي ءبىلۋىمىز كەرەك! بۇگىنگىدەي جاھاندانۋ داۋىرىندە جات بولمىستان قورعانۋدا اقپاراتتىق- رۋحاني قاۋىپسىزدىكتىڭ ءرولى زور. كەيدە تەرىس تاربيەگە، ۇلتسىزدىققا شەتەلدىك اقپاراتتىق ەكسپانسيا تەلەسەريالدارمەن بىرگە ءوزىمىزدىڭ ۇلتتىق ۇعىمنان جۇرداي ءتۇرلى فيلمدەرىمىزدىڭ دە، جەڭىل كۇلكىگە قۇرىلعان سايقىمازاقتىق شۋ مەن شوۋلاردىڭ اسەرى از ەمەس. تەلەارنالاردان تىزەسى جالتىراعان جىرتىق شالبارلى انشىلەر شىعىپ جاتقاندا، جالپى وسى ءبىزدىڭ يدەولوگيامىزدىڭ ءوزى ءبۇتىن بە دەپ ويلاۋعا تۋرا كەلەدى كەيدە...»، - دەدى قازىبەك يسا.
ونىڭ ايتۋىنشا، ءىس جۇزىندە مەملەكەتتىڭ ستراتەگيالىق سەرىكتەسى جانە قوعامداعى ۇلتتىق يدەيالاردىڭ قوزعاۋشى كۇشى بولۋعا ءتيىس شىعارماشىلىق وداقتار ءقازىر قارجىلىق قيىندىقتاردان شىعا الماي، ءوز كۇندەرىن زورعا كورىپ وتىر.
«قانداي ەلدىڭ دامۋىندا دا، ەڭ الدىمەن مادەنيەتتىڭ ماڭىزى زور! مادەنيەتىمىزدى قولداۋعا باسا نازار اۋدارىپ كەلە جاتقان قازاقستان پرەزيدەنتى قاسىم- جومارت توقايەۆتىڭ تاپسىرماسىمەن بىلتىر شىعارماشىلىق وداقتاردى قولداۋ قورى قۇرىلعان ەدى. ءقازىر بۇل قوردىڭ جۇمىسى ءالى جۇرمەي جاتىر. شىعارماشىلىق وداقتار قارجى جوق دەپ شىرىلداۋدا، ال مادەنيەت مينيسترلىگىندەگى ولاردى قولداۋعا بولىنگەن 257 ميلليون تەڭگە يگەرىلمەي قالدى. سەبەبى، شىعارماشىلىق وداقتار قۇجاتتارى كونكۋرستىق تالاپتارعا سايكەس كەلمەدى دەيدى مينيسترلىك. وزدەرى كۇن كورە الماي وتىرعان شىعارماشىلىق وداقتار وزدەرىنە تيەسىلى سىباعاسىنان ايىرىلىپ وتىر»، - دەدى دەپۋتات.
«ءبىزدىڭ ۇسىنىستارىمىزعا توقتالساق، شىعارماشىلىق وداقتاردى قارجىلاندىرۋدى زاڭنامالىق تۇرعىدان شەشۋ ءۇشىن ولارعا مەملەكەتتىڭ ستراتەگيالىق سەرىكتەسى ستاتۋسىن بەرۋ كەرەك. ەكىنشىدەن، شىعارماشىلىق وداقتاردىڭ مەملەكەتپەن ارىپتەستىك قىزمەتىن جانداندىرۋ ءۇشىن مادەنيەت پەن ونەردى دامىتۋ گرانتتارىن تاعايىنداۋ قاجەت. ۇشىنشىدەن، ۇلتتىق بولمىسىمىزدى جات بولمىستان قورعاۋ ءۇشىن ۇلتتىق يدەولوگيالىق، اقپاراتتىق- رۋحاني قاۋىپسىزدىك تەتىكتەرىن جاساۋدى شۇعىل قولعا الۋ كەرەك»، - دەدى قازىبەك يسا.