گاز وڭدەۋ زاۋىتىنداعى ءورت سالدارى جويىلدى – قازمۇنايگاز

نۇر- سۇلتان. قازاقپارات - قازاق گاز وڭدەۋ زاۋىتىندا ءورت سالدارىن جويۋ جۇمىستارى اياقتالىپ، كاسىپورىن جۇمىسى تولىعىمەن قالپىنا كەلتىرىلدى، دەپ حابارلايدى قازاقپارات «قازمۇنايگاز» باسپا ءسوز قىزمەتىنە سىلتەمە جاساپ.

قىسقا مەرزىم ىشىندە زاۋىتتى تولىق قۋاتتا ىسكە قوسۋ ءۇشىن قانداي جۇمىستاردىڭ اتقارىلعانى تۋرالى قازگوز ديرەكتورى ناقبەرگەن تولەپوۆ ءمالىم ەتتى. ونىڭ ايتۋىنشا، قالپىنا كەلتىرۋ جۇمىستارىنا ءۇش اۋىسىممەن تاۋلىك بويى جۇمىس ىستەگەن 75 مامان جۇمىلدىرىلدى. زيان كەلتىرىلگەن كونسترۋكتسيا مەن قوسالقى جابدىقتىڭ بولىكتەرىنىڭ دەمونتاجى جۇزەگە اسىرىلدى. جاڭا رادياتورلار، جىلۋ الماستىرعىشتار، جەلدەتكىشتەر، ەلەكتر قوزعالتقىشتارى اۋىستىرىلدى، ەلەكتر سىمدارى جۇرگىزىلدى جانە ت. ب.

«ۇجىمنىڭ ۇيلەسىمدى ءىس- ارەكەتى مەن «قازمۇنايگاز» قولداۋىنىڭ ارقاسىندا ءورت سالدارىن تولىق جويىپ، كاسىپورىن جۇمىسىن قالپىنا كەلتىردىك»، - دەپ اتاپ ءوتتى ن. تولەپوۆ.

جۇرگىزىلگەن جۇمىستار 100 پايىزعا شيكى گازدى قابىلداۋدى قامتاماسىز ەتۋگە مۇمكىندىك بەردى. زاۋىت قالىپتى تەحنولوگيالىق رەجيمگە شىقتى - ساعاتىنا 95-100 مىڭ تەكشە مەتر گاز.

ەسكە سالا كەتەيىك، 16-ماۋسىمدا نۇر- سۇلتان ق. ۋاقىتىمەن ساعات 23.15 ماڭعىستاۋ وبلىسىنىڭ جاڭاوزەن قالاسىندا ورنالاسقان «قازاق گاز وڭدەۋ زاۋىتى» ج ش س كومپرەسسورلىق سەحىنىڭ اۋا توڭازىتقىشىندا ءورت شىقتى. ءورت ساعات 23:52-دە تولىق جويىلدى.

قايتىس بولعاندار مەن زارداپ شەككەندەر جوق. «قازمۇنايگاز» ۇلتتىق كومپانياسىندا باسقارما ءتوراعاسى اليك ايداربايەۆتىڭ باسشىلىعىمەن جەدەل شتاب جۇمىس ىستەۋدە.