ەۋروپادا دۇربەلەڭ: ءۇندى شتامى تەز جۇعادى، تەز تارايدى

نۇر-سۇلتان.قازاقپارات -«دەلتا» دەپ اتاۋ بەرگەن كوروناۆيرۋستىڭ ءۇندى شتامىنا قاتىستى قاۋىپ كۇشەيىپ بارادى.

بۇل جۇقپالى دەرت قازىر ءۇندىستان تۇرماق ەۋروپانىڭ بىرنەشە ەلىندە دۇربەلەڭ تۋعىزدى. ەلدى الاڭداتقانى تەز جۇعادى، تەز تارايدى. ءۇندىستاندىق عالىمدار ونىڭ ۆاكسينانىڭ ەكى دوزاسىن العاندارعا دا جۇعاتىنىن حابارلايدى. ال دۇنيەجۇزىلىك دەنساۋلىق ساقتاۋ ۇيىمىنىڭ ماماندارى ەكپەلەردىڭ بارلىق شتامعا قارسى اسەرى بار ەكەنىن ايتىپ وتىر. ءۇندى شتامى ەۋروپادا تەز جايىلىپ بارادى.

ۇلىبريتانيادا بۇعان دەيىن بريتاندىق مۋتاتسيا كەڭىنەن تاراعان ەدى. ال قازىر انىقتالىپ جاتقان وقيعالاردىڭ 98 پروتسەنتى دەلتامەن بايلانىستى. ون شاقتى كۇن بۇرىن عانا بۇل كورسەتكىش 91 پروتسەنت شاماسىندا بولاتىن. ودان بولەك گەرمانيا، فرانسيا مەن يسپانيادا دا ءۇندى شتامىنىڭ وشاقتارى تىركەلگەن. كەشە عانا كومەندانتتىق ساعاتتى الىپ تاستاعان يتاليانىڭ وزىندە ءار بەسىنشى ناۋقاستىڭ وسى دەلتانى جۇقتىرعانى بەلگىلى. پورتۋگاليادا دا قازىر دەرەكتەردىڭ 96 پروتسەنتىندە ءۇندى شتامى انىقتالىپ جاتىر.

ماريانا ۆيەيرا دا سيلۆا، پورتۋگاليا مينيسترلەر كابينەتىنىڭ باسپا ءسوز حاتشىسى:

- قازىر ەل استاناسى پورتۋگاليادا نەگىزىنەن كوروناۆيرۋستىڭ دەلتا شتامى انىقتالىپ جاتىر. سوندىقتان كارانتيندىك ەرەجەلەردى كۇشەيتۋگە ءماجبۇرمىز.

وسى رەتتە دەمالىس كۇندەرى استانالىق ايماققا كىرىپ- شىعۋ شەكتەلەدى. ماماندار رەسەيدە قازىر كوروناۆيرۋستىڭ ءۇشىنشى تولقىنى باستالعانىن ايتادى كەيىنگى تاۋلىكتە مۇندا 17378 جاڭا دەرەك راستالدى.

ساراپشىلار ەپيدەميولوگيالىق احۋالدىڭ ۋشىعۋىنىڭ ءبىر سەبەبى ءۇندى شتامىمەن بايلانىستى بولۋى مۇمكىن ەكەنىن ايتادى. ماسەلەن، ماسكەۋدە قازىر ناۋقاستاردىڭ شامامەن 90 پروتسەنتىندە وسى دەلتا انىقتالىپ جاتىر. اۋرۋحاناعا ءتۇسىپ جاتقاندار اراسىندا، اسىرەسە جاستار كوپ. قالا باسشىسى ەكپە قابىلداعاندارىنا كوپ ۋاقىت وتكەن تۇرعىندارعا قايتادان ۆاكسينا سالدىرۋ قاجەت بولۋى مۇمكىن ەكەنىن ايتىپ وتىر.

سەرگەي سارەنكو، ماسكەۋ قالالىق كلينيكالىق اۋرۋحاناسى باس دارىگەرىنىڭ ورىنباسارى:

- قازىر ۆيرۋس بۇرىنعىدان دا جىلدام تاراپ بارادى. سونداي- اق ناۋقاستاردىڭ جاعدايى دە تەز ناشارلاپ كەتەتىن بولدى. ماسەلەن، ەم- دومعا قاراماستان كومپيۋتەرلىك توموگرافيا ناتيجەسى بىرنەشە كۇن ىشىندە ەمحاناعا تۇسكەن ادامنىڭ اۋرۋى ءبىرىنشى دەڭگەيدەن بىردەن ءتورتىنشى دەڭگەيگە ءوتىپ كەتكەنىن كورسەتەدى.

ساراپشىلار: «سپۋتنيك V» ۆاكتسيناسى كوروناۆيرۋستىڭ بارلىق مۋتاتسيالارىنان قورعايدى

ماماندار ءۇندى شتامىنىڭ تەز تاراۋىمەن قاتار ناۋقاستىڭ جاعدايى دا ساناۋلى ساعاتتا ناشارلاپ كەتەتىنىن ايتادى. كەيبىر بەلگىلەرى تۇماۋعا ۇقساس. ءبىراق ادەتتەگى تۇماۋعا ءتان ەمەس تاعى 4 سيمپتومى بار. اتاپ ايتقاندا، ناۋقاستا ءىش ءوتۋ، ەستۋ قابىلەتىنىڭ ناشارلاۋى، اسقازان اۋرۋى مەن قاننىڭ ۇيۋى سياقتى بەلگىلەر پايدا بولۋى مۇمكىن.

الەكساندر گينتسبۋرگ، ن. ف. گامالەيا اتىنداعى زەرتتەۋ ورتالىعىنىڭ ديرەكتورى:

- دەلتا - قاۋىپتى شتامم. ول ءبىزدىڭ جاسۋشالارىمىزعا باسقاشا اسەر ەتەدى. ءۇندى شتامى ىندەتتىڭ جەڭىل فورمادان اۋىر تۇرىنە ءوتۋ ۋاقىتىن قىسقارتادى. سوندىقتان ادامدا انتيدەنەلەر قالىپتاسىپ ۇلگەرمەيدى.

«سپۋتنيك V» ۆاكسيناسى كوروناۆيرۋستىڭ بارلىق مۋتاتسيالارىنان قورعايتىنىن ايتا كەتكەن ءجون. دۇنيەجۇزىلىك دەنساۋلىق ساقتاۋ ۇيىمىنىڭ وكىلدەرى دە قازىرگى ۆاكتسينالار كوروناۆيرۋستىڭ بارلىق شتامدارىنان قورعايتىنىن ايتادى.

«ءبىر ايتا كەتەرلىگى - ءار ەكپەنىڭ تيىمدىلىگى ءار ءتۇرلى بولادى ، - دەيدى ماماندار.

ءبىراق، قالاي بولعاندا دا، ساراپشىلار قولدا بار پرەپاراتتار ۆيرۋستى جۇقتىرۋدان قورعاماعان كۇننىڭ وزىندە دە، ىندەتتىڭ اۋىر فورمادا ءوتۋى مەن ءولىمنىڭ الدىن الۋعا كومەكتەسەتىنىن ايتادى.

اۆتورى: جۇلدىز اتاگەلديەۆا

www.24.kz