يندونەزيالىق مۋزىكانت «دايديداۋ» ءانىن كونە اسپاپتا ورىندادى
2017-جىلى Dimash Indonesia Dears فان-كلۋبى بارلىق يندونەزيالىق جانكۇيەردىڭ ريزاشىلىعىن ءبىلدىرۋ ءۇشىن ديماشقا ساساندو اسپابىن سىيعا بەرۋدى شەشكەن. سولاي، يندونەزيالىق فان-كلۋب ساساندودا كاسىبي جانە شەبەر ويىنايتىن ناتالينو مەللامەن بايلانىس ورناتقان.
ن. مەللامەن جاساعان مۋزىكالىق قۇرال 2021-جىلعى 26- مامىردا نۇر-سۇلتان قالاسىندا ورنالاسقان يندونەزيا ەلشىلىگىندە ديماشقا سىيعا تارتۋ ەتىلدى. ءمالىم بولعانداي، ساساندونى قازاقستانعا جىبەرۋ ءۇشىن يندونەزيالىق فان-كلۋب 4 جىل بويى بىرنەشە رەت ارەكەت ەتكەن.
اقىرى سىيلىق يندونەزيا ەلشىلىگىنە ديماشتىڭ كەلۋىنە ءبىر كۇن قالعاندا جەتكىزىلگەن.
«ال 17- ماۋسىمدا يندونەزيالىق فان-كلۋب ناتالينو مەللادان كۇتپەگەن حابارلاما الدى. وندا اتى اڭىزعا اينالعان «دايديداۋ» انىنە تۇسىرىلگەن ۆيدەو قوسا جىبەرىلگەن. ديماشتىڭ بارلىق جانكۇيەرلەرى ءۇشىن سۇيىكتى ءان ولاردىڭ ءداستۇرلى مۋزىكالىق اسپابىندا شىرقالعانىن ەستۋ Dears قا ۇلكەن مارتەبە بولدى»، - دەلىنگەن سايتتا.
ساساندو - يندونەزيانىڭ روتي ارالىنان شىققان ءداستۇرلى مۋزىكالىق اسپاپ. ول بامبۋك تۇتىگىنەن جاسالعان. ونىڭ ىشەكتەرى ارفاداعىداي ساۋساقپەن شەرتىلەدى. ساساندونىڭ كوپتەگەن تۇرلەرى بار، ولاردىڭ ءارقايسىسى قولمەن جاسالعان جانە وزىنشە ەرەكشەلەنەدى.
«ديماشقا سىيعا تارتىلعان ساساندو 45 ىشەكتى جانە ونىڭ ارنايى تۇعىرى بار. سونداي-اق، وعان وسى اسپاپتا ويناۋ بويىنشا وقۋ قۇرالى تابىس ەتىلدى»، - دەلىنگەن اقپاراتتا.