اسقار مامين: مەملەكەتتىك شەكارادا باقىلاۋدى كۇشەيتۋ كەرەك

نۇر- سۇلتان. قازاقپارات - كوروناۆيرۋس قاۋپىنىڭ ارتۋىنا بايلانىستى مەملەكەتتىك شەكارادا باقىلاۋدى كۇشەيتۋ كەرەك. بۇل تۋرالى بۇگىن ۇكىمەت وتىرىسىندا ق ر پرەمەر- ءمينيسترى اسقار مامين ايتتى، دەپ حابارلايدى قازاقپارات ءتىلشىسى.

«جالپى سانيتاريالىق- ەپيدەميولوگيالىق جاعداي باقىلاۋدا. اۋرۋحانالارداعى ورىنداردىڭ جۇكتەمەسى 25 پايىز جانە جانساقتاۋ بولىمدەرىندە 21 پايىزدى قۇراپ وتىر. ەلوردا «قىزىل» ايماقتا، ۆيرۋس جۇقتىرعاندار سانى ازايماي تۇر. بۇل ەلوردادا قابىلدانىپ جاتقان شارالاردىڭ جەتكىلىكسىز ەكەنىن جانە ۆاكسينا سالۋ قارقىنى تومەن ەكەنىن كورسەتەدى. جالپى وڭىرلەردىڭ باسىم بولىگى - «جاسىل» ايماقتا، 5 ءوڭىر - «سارى» ايماقتا»، - دەدى ۇكىمەت باسشىسى.

ونىڭ دەرەگىنشە، بۇگىنگى كۇنى 2,8 ميلليوننان استام ادام ءبىرىنشى كومپونەنتتى، 1,7 ميلليوننان استام ادام ەكىنشى كومپونەنتتى سالدىردى.

«وزدەرىڭىزگە بەلگىلى، ەلوردادا كوروناۆيرۋستىڭ «دەلتا» شتامىنا ءتان مۋتاتسيانىڭ ىقتيمالدىعى انىقتالىپ وتىر. ونىڭ تارالۋ جىلدامدىعى وتە جوعارى، جىلدام ءورشيدى جانە سالدارى اناعۇرلىم اۋىر. وسى رەتتە بۇگىن ۆەدومستۆوارالىق كوميسسيانىڭ وتىرىسىن وتكىزۋدى جانە نۇر- سۇلتان قالاسىنداعى سانيتاريالىق- ەپيدەميولوگيالىق تالاپتاردى قاتاڭداتۋ بويىنشا ءىس- شارالاردى قابىلداۋدى تاپسىرامىن»، - دەدى پرەمەر- مينيستر.

اسقار ءماميننىڭ اتاپ وتۋىنشە، قازىرگى تاڭدا جالپى قازاقستانداعى جاعداي قالىپتى بولعانىمەن، كورشى مەملەكەتتەردەگى جاعداي كۇردەلى كۇيىندە قالىپ وتىر.

«سوندىقتان مەملەكەتتىك شەكارادا باقىلاۋدى كۇشەيتۋ كەرەك. وسى رەتتە سانيتاريالىق - ەپيدەميولوگيالىق تالاپتاردىڭ قاتاڭ ساقتالۋىنا جانە ۆاكتسيناتسيا قارقىنىڭ وسىرۋگە باسا نازار اۋدارۋ قاجەت»، - دەدى ۇكىمەت باسشىسى.