+7 (701) 759 90 19
13 °С : نۇر-سۇلتان
°С : الماتى
USD 425.3 EUR 501.05
RUB 5.85 CNY 65.88
جاڭالىقتار

سەناتتىڭ كەزەكتى وتىرىسىنىڭ كۇن ءتارتىبى ناقتىلاندى

21 ماۋسىم 22:28
:ءبولىسۋ
سەناتتىڭ كەزەكتى وتىرىسىنىڭ كۇن ءتارتىبى ناقتىلاندى

نۇر-سۇلتان. قازاقپارات - سەنات سپيكەرى ماۋلەن اشىمبايەۆتىڭ توراعالىعىمەن پالاتا بيۋروسىنىڭ وتىرىسى ءوتتى.

وندا دەپۋتاتتار 2021-جىلعى 24- ماۋسىمدا وتەتىن سەنات وتىرىسىنىڭ كۇن ءتارتىبىن بەكىتتى، دەپ حابارلايدى قازاقپارات.

پالاتا وتىرىسىندا قاراۋ ءۇشىن «رەسپۋبليكالىق بيۋدجەتتىڭ اتقارىلۋىن باقىلاۋ جونىندەگى ەسەپ كوميتەتىنىڭ مۇشەسى قىزمەتىنە تاعايىنداۋ تۋرالى» ق ر پارلامەنتى سەناتى ءتوراعاسىنىڭ ۇسىنۋى كۇن تارتىبىنە شىعارىلدى.

سونىمەن قاتار سەناتورلار الداعى بەيسەنبىدە جاڭا زاڭنامالىق باستامالار توپتاماسىن تالقىلايدى. ناقتى ايتقاندا، ەندى سالىقتار مەن تولەمدەردىڭ 4 ءتۇرى اۋداندىق دەڭگەيدەن اۋىلدىق وكرۋگ بيۋجەتى دەڭگەيىنە بەرىلەدى.

ولار: ءبىرىڭعاي جەر سالىعى، جەر ۋچاسكەلەرىن پايدالانعانى ءۇشىن تولەم، جەر ۋچاسكەلەرىن ساتۋدان تۇسەتىن تۇسىمدەر جانە جەر ۋچاسكەلەرىن جالداۋ قۇقىعىن ساتقانى ءۇشىن تولەم.

جەرگىلىكتى ءماسليحاتتار مەن ولاردىڭ دەپۋتاتتارىنىڭ قىزمەتىنە قاتىستى دا وزگەرىستەر بار. مۇنداي جاڭاشىلدىقتار «قازاقستان رەسپۋبليكاسىنىڭ كەيبىر زاڭنامالىق اكتىلەرىنە اۋداندىق، قالالىق جانە اۋىلدىق بيلىك دەڭگەيلەرىنىڭ دەربەستىگى مەن جاۋاپكەرشىلىگىن كەڭەيتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىندا جازىلعان.

سونداي-اق، پالاتا وتىرىسىندا «قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنە وزگەرىستەر مەن تولىقتىرۋلار ەنگىزۋ تۋرالى» زاڭ جوباسى قارالادى. بۇل قۇجاتتا اكىمشىلىك قۇقىق بۇزۋشىلىق تۋرالى كەيبىر ىستەردى قاراۋ ءۇشىن ۋچاسكەلىك ينسپەكتورلاردىڭ وكىلەتتىكتەرىن كەڭەيتۋ ۇسىنىلعان. ودان بولەك، زاڭ جوباسىندا جۇمىس بەرۋشىلەردىڭ قىزمەتكەرگە قاتىستى قۇجات ەڭبەكاقى تولەۋ، جۇمىس ۋاقىتى مەن دەمالىس رەجيمى بويىنشا كەمسىتۋشىلىككە جول بەرمەۋ جونىندەگى جاۋاپكەرشىلىگى قاراستىرىلعان. بۇعان قوسا، سەناتورلار الداعى وتىرىستا دەپۋتاتتاردىڭ باستاماشى بولۋىمەن ازىرلەنگەن ەكى زاڭ جوباسىن قارايدى.

ولاردىڭ ءبىرى - «قازاقستان رەسپۋبليكاسىنىڭ كەيبىر زاڭنامالىق اكتىلەرىنە رەيدەرلىككە قارسى كۇرەستى كۇشەيتۋ، كاسىپكەرلىك قىزمەتتى مەملەكەتتىك ورگاندار مەن لاۋازىمدى ادامداردىڭ زاڭسىز ارالاسۋىنان قورعاۋ جانە باعالى مەتالداردىڭ زاڭسىز اينالىمىنا كەدەرگى كەلتىرەتىن شارالاردى كۇشەيتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى.

قۇجات كاسىپكەرلەردىڭ قىزمەتىنە زاڭسىز ارالاسۋدان قورعاۋعا كەپىلدىكتەردى كۇشەيتۋگە مۇمكىندىك بەرەدى.

دەپۋتاتتار باستاماشى بولعان ەكىنشى زاڭ جوباسىندا قاشىقتان جۇمىس ىستەۋدى ەنگىزۋ، جالاقى مولشەرىن، قىزمەتكەردىڭ ۋاقىتشا قاشىقتان جۇمىس ىستەۋگە اۋىساتىن مەرزىمىن، جۇمىس ۋاقىتىنىڭ رەجيمىن بەلگىلەۋ، اقپاراتتىق قاۋىپسىزدىكتى قامتاماسىز ەتۋ ماسەلەلەرىندە جۇمىس بەرۋشى مەن قىزمەتكەردىڭ جاۋاپكەرشىلىگىن ايقىنداۋ ماسەلەلەرى قاراستىرىلعان. مۇنداي نورمالار «قازاقستان رەسپۋبليكاسىنىڭ ەڭبەك كودەكسىنە قاشىقتان جۇمىس ىستەۋدىڭ قۇقىقتىق رەتتەلۋىن جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىندا جازىلعان.

سونىمەن بىرگە پالاتا وتىرىسىندا سەناتورلار «قازاقستان رەسپۋبليكاسىنىڭ كەيبىر زاڭنامالىق اكتىلەرىنە جەر قاتىناستارىن دامىتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن دا قارايدى.

اتالعان قۇجات مەملەكەت باسشىسىنىڭ تاپسىرمالارىن ورىنداۋ ماقساتىمەن جەر رەفورماسى جونىندەگى كوميسسيا جۇمىسىنىڭ قورىتىندىسى بويىنشا ازىرلەندى. بۇل زاڭ جوباسى جەر زاڭناماسىن جەتىلدىرۋگە، اۋىل شارۋاشىلىعى ماقساتىنداعى جەرلەردى جالداۋ ينستيتۋتىن رەتتەۋگە جانە جەردى پايدالانۋعا مەملەكەتتىك باقىلاۋدى كۇشەيتۋگە ارنالعان. سونداي-اق، بيۋرو وتىرىسىندا ماجىلىستەن كەلىپ تۇسكەن زاڭ جوبالارى سەنات كوميتەتتەرىنە ءبولىنىپ بەرىلدى.


:ءبولىسۋ
سونداي-اق... وقىڭىز
پئكئر قالدئرؤ
+7
جئبةرؤ
ونلاين قىزمەتكەرلەر

مۇراعات