جەلىدە ۆاكسينا پاسپورتىنا قاتىستى جالعان اقپارات تارادى

نۇر-سۇلتان. قازاقپارات - مەسسەندجەرلەردە جاقىن ارادا ۆاكسينا پاسپورتى جوق ادامدار ءوز كولىكتەرىن وتالدىرىپ، دەربەس كومپيۋتەرلەر مەن باسقا دا جابدىقتاردى قولدانا الماي قالادى دەگەن حابار تارادى.

بولجام بويىنشا، ۆاكسيناتسيا پاسپورتتارىندا «اقىلدى» قۇرىلعىلاردى ىسكە قوساتىن QR كود بار. بۇل كودتارسىز گادجەتتەردى پايدالانۋ نەمەسە كولىكتى وتالدىرۋ مۇمكىن بولمايدى ەكەن. بۇل جالعان، دەپ حابارلايدى stopfake.kz سايتى.

QR كود، قاراپايىم تىلمەن ايتقاندا، شتريحكودتىڭ جەتىلدىرىلگەن نۇسقاسى. ادەتتە، QR كودتار كەز كەلگەن اقپاراتتى وقۋ ءۇشىن قولدانىلادى. وسىنداي جەتىلدىرىلگەن شتريح- كودتاردىڭ كومەگىمەن تاۋار نەمەسە قىزمەت تۋرالى دەرەكتەردى الۋعا، قۇجاتتىڭ، ءىس- شاراعا نەمەسە قوعامدىق كولىككە بيلەتتىڭ ءتۇپنۇسقالىعىن تەكسەرۋگە بولادى.

ۆاكسيناتسيا پاسپورتىندا QR كود بار. قازاقستاندىق ۆاكسينالاۋ پاسپورتتارىندا ولار قۇجاتتىڭ ءتۇپنۇسقالىعىن تەكسەرۋ ءۇشىن قىزمەت ەتەدى. ەۋرووداق ەلدەرىندەگى ۆاكسيناتسيا پاسپورتتارىندا ادامنىڭ قاشان، قايدا جانە قانداي ۆاكسينامەن ەگىلگەنى تۋرالى ماڭىزدى اقپارات بەرىلگەن. بۇل تۋرالى ەۋروپالىق كوميسسيانىڭ رەسمي سايتىندا ايتىلعان.

مۇنداي QR كودتار وقۋ قۇرىلعىلارىنا زيان كەلتىرە المايدى. كودتى وقۋ ءۇشىن ارنايى قوسىمشاسى بار سمارتفون نەمەسە ينتەرنەتكە قوسىلعان كومپيۋتەر قاجەت. كومپيۋتەردەگى كودتى وقۋ ءۇشىن ارنايى سايتقا كود كەسكىنىن جۇكتەۋ كەرەك. كودتا جازىلعان اقپاراتتى قولمەن دە تەكسەرۋگە بولادى، ءبىراق بۇعان ۋاقىت كەتەدى. كولىكتى باسقارۋدىڭ ەلەكتروندى بلوگى، كومپيۋتەر نەمەسە اينالامىزداعى باسقا قۇرىلعىلار QR كودتى وزدىگىنەن تاني المايدى. دەمەك، ۆاكسيناتسيالانباعان ادامدار ۆاكسيناتسيا پاسپورتىنىڭ QR- نان تۋىنداعان تەرىس اسەرگە بايلانىستى اۆتوموبيلدەر مەن تەحنيكانى پايدالانا المايدى دەگەن حابارلامالار جالعان بولىپ تابىلادى. بۇعان ەشقانداي عىلىمي نەگىزدەمە جوق، ال قۇجاتتارداعى QR- كودتاردىڭ مازمۇنى قۇپيا ەمەس.