كوروناۆيرۋس: قازاقستاندا «ۇندىلىك» شتامنىڭ بولۋ ىقتيمالدىعى انىقتالدى

None
None
نۇر-سۇلتان. قازاقپارات - قازاقستان رەسپۋبليكاسىنىڭ دەنساۋلىق ساقتاۋ مينيسترلىگى اينالىمدا «ۇندىلىك» شتامنىڭ بولۋ ىقتيمالدىلىعىن انىقتادى.

بۇل تۋرالى قازاقپارات COVID-19 تارالۋىنا جول بەرمەۋ جونىندەگى ۆ ا ك تەلەگرام كانالىنا سىلتەمە جاساپ حابارلايدى. نۇر-سۇلتان قالاسىندا كوروناۆيرۋستىق ينفەكسيامەن سىرقاتتانۋشىلىق دەڭگەيىنىڭ كۇرت وسۋىنە بايلانىستى دەنساۋلىق ساقتاۋ مينيسترلىگى ك ۆ ي جۇقتىرعان ناۋقاستاردان الىنعان وڭ زەرتحانالىق ۇلگىلەردىڭ پ ت ر سكرينينگىن وتكىزدى.

سكرينينگ ناتيجەلەرى بويىنشا «دەلتا» شتامىنا («ۇندىلىك» شتامم) ءتان مۋتاتسياعا كۇدىكتى جاعداي انىقتالدى. مۋتاتسيانىڭ بولۋىن جانە ونىڭ «دەلتا» شتامىنا جاتاتىندىعىن تۇپكىلىكتى راستاۋ د ن ق ۇلگىلەرىن تولىق گەنومدىق سەكۆەنيرلەۋ اياقتالعاننان كەيىن بەلگىلى بولادى.

«دەلتا» كوروناۆيرۋس شتامى اسا كونتاگيوزدى جانە انىقتالعان شتامدارعا قاراعاندا جۇقپالىلىعى %60 كە جوعارى، قازىرگى اينالىمداعى شتامدار 1 ادامنان ورتا ەسەپپەن 3-4 ادامعا تارالاتىن بولسا، بۇل شتامم 5-6 ادامعا بىردەن جۇعادى جانە 7 كۇنگە سوزىلاتىن قىسقا ينكۋباتسيالىق كەزەڭمەن سيپاتتالادى. سونىمەن قاتار ىندەتتى جۇقتىرعاندار بۋىندار مەن ءىشتىڭ قاتتى اۋىرسىنۋىن سەزىنەدى، جۇرەك اينىپ، لوقسيدى، اۋرۋ سالدارىنان ادام ساڭىراۋ بولىپ قالۋى ابدەن مۇمكىن جانە اياقتاردىڭ ميكروترومبوزىنا اكەلەدى. سوڭعى زەرتتەۋلەر كورسەتكەندەي، كوروناۆيرۋستىڭ «ۇندىلىك» شتامى اۋرۋحاناعا جاتقىزۋ مەن ءولىم-ءجىتىمنىڭ جوعارى ىقتيمالدىعىمەن بايلانىستى. وسىعان وراي دەنساۋلىق ساقتاۋ مينيسترلىگى ءاربىر قازاقستاندىقتى ءوز دەنساۋلىعى مەن جاقىندارىنىڭ ومىرىنە اسا ساقتىقپەن، جاۋاپكەرشىلىكپەن قاراۋدى سۇرايدى.

ينفەكسيادان قورعانۋ مەن اۋرۋحاناعا جاتۋدان امان قالۋدىڭ بىردەن ءبىر جولى COVID-19 ۆيرۋسىنا قارسى ۆاكتسينانىڭ تولىق كۋرسىن الۋ. ك ۆ ي- گە قارسى ەكپە الۋعا قارسى كورسەتىلىمدەرى جوق ءاربىر ازاماتقا قىسقا مەرزىمدە ۆاكسينالانۋعا كەڭەس بەرەمىز. سونداي-اق ۆيرۋس تارالۋىنىڭ الدىن الۋ ماقساتىندا بارلىق پروفيلاكتيكالىق شارالاردى قاتاڭ ورىنداۋ قاجەت: ماسكا تاعۋ، الەۋمەتتىك اراقاشىقتىقتى ساقتاۋ، قول گيگيەناسى، ءۇي-جايلاردى جەلدەتۋ، ت. ب. دۇنيەجۇزىلىك دەنساۋلىق ساقتاۋ ۇيىمىنىڭ 2021 -جىلعى 20-ماۋسىمداعى مالىمەتتەرى بويىنشا SARS- CoV-2 «دەلتا شتامم» الەمنىڭ 174 ەلىندە انىقتالعان.


سوڭعى جاڭالىقتار