اسقار مامين ۇكىمەتتىڭ بيىلعى نەگىزگى مىندەتتەرىن اتادى
بۇل تۋرالى ق ر پارلامەنتى پالاتالارىنىڭ بىرلەسكەن وتىرىسىندا پرەمەر- مينيستر اسقار مامين ايتتى، دەپ حابارلايدى قازاقپارات ءتىلشىسى.
«2021 -جىلدىڭ قورىتىندىسى بويىنشا ۇكىمەتتىڭ الدىندا ەكونوميكا ءوسىمىن 3,5-4,0 پايىز دەڭگەيىندە قامتاماسىز ەتۋ جانە 1,2 ميلليون ادامدى جۇمىسپەن قامتۋ شارالارىن ىسكە اسىرۋ مىندەتى تۇر. بۇل حالىقتىڭ ناقتى تابىسىن 5 پايىز ارتتىرۋعا مۇمكىندىك بەرەدى. ۇكىمەت سونىمەن قاتار 8 تريلليون تەڭگەگە 415 ينۆەستيتسيالىق جوبانى ىسكە اسىرۋدى كوزدەپ وتىر»، - دەدى اسقار مامين.
ۇكىمەت باسشىسىنىڭ ايتۋىنشا، بيىل 17 ميلليون شارشى مەتر تۇرعىن ءۇيدى پايدالانۋعا بەرۋ، 200 مەكتەپ سالۋ جانە 30 مەدپۋنكت اشۋ، 6 مىڭ شاقىرىم اۆتوجول جوندەۋ جانە سالۋ، حالىقتى اۋىز سۋمەن قالادا - 98 پايىز جانە اۋىلدا - 91,8 پايىز قامتاماسىز ەتۋ جوسپارلانعان.
«اگروونەركاسىپتىك كەشەننىڭ الەۋەتىن پايدالانۋ ءۇشىن 1050 شاقىرىم كانالدى جوندەۋ جوسپارلانىپ وتىر. بۇل سۋارىلاتىن جەرلەردى 78 مىڭ گەكتارعا ۇلعايتۋعا مۇمكىندىك بەرەدى»، - دەدى پرەمەر- مينيستر.